ମୁମ୍ବାଇ,୨୭।୯: ମୁମ୍ବାଇ କ୍ରାଇମ ବ୍ରାଞ୍ଚର ଏଇସି (ଆଣ୍ଟି ଏକ୍ସଟୋରସନ ସେଲ) ଅଣ୍ଡରୱାଲର୍ଡ ଡନ୍ ଦାଉଦ ଇବ୍ରାହିମ ସହଯୋଗୀ ତଥା ଗ୍ୟାଙ୍ଗର ସଦସ୍ୟ ରିୟାଜ ଭାଟ୍ଟିଙ୍କୁ ଗିରଫ କରିଛି। ରିୟାଜ ଭାଟ୍ଟି ଏବଂ ଛୋଟା ଶକିଲଙ୍କ ସମ୍ପର୍କୀୟ ସଲିମ ଫ୍ରୁଟ ଅନ୍ଧେରୀର ଜଣେ ବ୍ୟବସାୟୀଙ୍କୁ ହତ୍ୟା କରିବାକୁ ଧମକ ଦେଇ ଏକ ମହଙ୍ଗା କାର ଏବଂ ଟଙ୍କା ଲୁଟି ନେଇଥିଲେ। ଉକ୍ତ ମାମଲାର ତଦନ୍ତ ବେଳେ କ୍ରାଇମ ବ୍ରାଞ୍ଚ ଟିମ ରିୟାଜଙ୍କୁ ଅନ୍ଧେରି ଅଞ୍ଚଳରୁ ଗିରଫ କରିଛି। ଆସନ୍ତାକାଲି ପୋଲିସ ରିୟାଜ ଭାଟ୍ଟିଙ୍କୁ କୋର୍ଟରେ ହାଜର କରିବ।
ରିୟାଜ ଜଣେ କୁଖ୍ୟାତ ଗ୍ୟାଙ୍ଗଷ୍ଟର। ରିୟାଜଙ୍କ ବିରୋଧରେ ଚୋରା ଚାଲାଣ, ଜମି ଦଖଲ, ପ୍ରତାରଣା, ଜାଲିଆତି ଭଳି ଅନେକ ମାମଲା ରୁଜୁ ହୋଇଛି। କୋର୍ଟଙ୍କ ଆଦେଶର ଉଲ୍ଲଂଘନ କରି ରିୟାଜ ୨୦୧୫ ଏବଂ ୨୦୨୦ରେ ନକଲି ପାସପୋର୍ଟ ମାଧ୍ୟମରେ ଦେଶ ଛାଡି ପଳାଇବାକୁ ଚେଷ୍ଟା କରିଥିଲେ।
