ଦାରିଙ୍ଗବାଡ଼ି,୪ା୬(ଅରୁଣ ସାହୁ): ଓଡ଼ିଶାର କଶ୍ମୀର ଦାରିଙ୍ଗବାଡ଼ି ପର୍ଯ୍ୟଟନକ୍ଷେତ୍ରକୁ ଏବେ ରାଜ୍ୟ ସରକାର ବିଶ୍ୱସ୍ତରୀୟ କରିବା ପାଇଁ ବଡ଼ ପଦକ୍ଷେପ ନେଇଛନ୍ତି। ଏଥିପାଇଁ ସାଂଜାସରୁ ଉନ୍ନୟନ ଟ୍ରଷ୍ଟର ଅଧ୍ୟକ୍ଷା ତଥା ବାଲିଗୁଡ଼ା ଉପଜିଲାପାଳ ଆଇଏଏସ୍ ଅଧିକାରୀ ପ୍ରଣୀତା ଦାସଙ୍କ ନିର୍ଦ୍ଦେଶ କ୍ରମେ ଦାରିଙ୍ଗବାଡ଼ି ବିଡିଓ ପ୍ରୀତିରଞ୍ଜନ ରଥଙ୍କ ତତ୍ତ୍ୱାବଧାନରେ ଦାରିଙ୍ଗବାଡ଼ିକୁ ସଫେଇ କାର୍ଯ୍ୟକ୍ରମ ପ୍ରତି ଗୁରୁବାର କରାଯାଉଛି। ଏହି କ୍ରମରେ ଗୁରୁବାର ସକାଳୁ ପୂର୍ବଭଳି ଏହି ସଫେଇ କାର୍ଯ୍ୟକ୍ରମ ବିଡିଓ ରଥଙ୍କ ନେତୃତ୍ୱରେ କରାଯାଇଥିବା ବେଳେ ପ୍ରଥମଥର ପାଇଁ ଜି. ଉଦୟଗିରି ନିର୍ବାଚନ ମଣ୍ଡଳୀର ପୂର୍ବତନ କଂଗ୍ରେସ ବିଧାୟକ ତଥା ଯୁବ ପୁରୁଷ ଖ୍ରୀଷ୍ଟିଆନ ସଂଘ ବୋର୍ଡର ସଭାପତି ଯାକବ ପ୍ରଧାନ ହାତରେ ଝାଡୁ ଧରି ସଫେଇ କାର୍ଯ୍ୟକ୍ରମରେ ସାମିଲ ହୋଇଥିଲେ।
ଅନ୍ୟମାନଙ୍କ ମଧ୍ୟରେ ବୋର୍ଡର ଉପସଭାପତି ବିମ୍ବାଧର ପ୍ରଧାନ, ସମ୍ପାଦକ ରମେଶ ପ୍ରଧାନ ସକ୍ରିୟ ସଦସ୍ୟ ସଞ୍ଜୀବ ପ୍ରଧାନ, ସୁନିଲ ପ୍ରଧାନ, ସନାତନ ପ୍ରଧାନ ପ୍ରେମ ଅନୁଷ୍ଠାନର ସୁଧୀର ଦିଗାଲ, ଯୁବ ସମାଜସେବୀ ନୀରଜ ପ୍ରଧାନଙ୍କ ସମେତ ଶତାଧିକ ଯୁବତୀ, ଯୁବକ ଏହି ସଫେଇ କାର୍ଯ୍ୟକ୍ରମରେ ସାମିଲ ହୋଇଥିଲେ। ସମସ୍ତଙ୍କ ଗୋଟିଏ ଲକ୍ଷ୍ୟ ଦାରିଙ୍ଗବାଡ଼ିକୁ ସ୍ବଚ୍ଛତା ରଖିବା ସହ ପ୍ଲାଷ୍ଟିକ ମୁକ୍ତ ଦାରିଙ୍ଗବାଡ଼ି ଭାବେ ପରିଚୟ ସୃଷ୍ଟି କରିବା।
ଏହି ସଫେଇ ଦାରିଙ୍ଗବାଡ଼ ଲାଲବାହାଦୂର ବିଦ୍ୟାପୀଠ ସାମ୍ନାରୁ ଆରମ୍ଭ କରାଯାଇ ୩ ଛକ, ବଜାର, ୪ ଛକ ହୋଇ ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ସଫେଇ କରାଯାଇଥିଲା। ସଦସ୍ୟମାନେ ହାତରେ ଝାଡୁ ଏବଂ ଆବର୍ଜନା ସଂଗ୍ରହ ବ୍ୟାଗ ଧରି ରାସ୍ତାଘାଟ ଓ ସାର୍ବଜନୀନ ସ୍ଥାନଗୁଡ଼ିକୁ ସଫା କରିବା ସହିତ ସାଧାରଣ ଲୋକଙ୍କୁ ମଧ୍ୟ ସ୍ବଚ୍ଛତା ପ୍ରତି ସଚେତନ କରିଥିଲେ। ସ୍ବଚ୍ଛତା ଏକ ଭଲ ଅଭ୍ୟାସ ଏବଂ ଏହା ଏକ ସେବା ଓ ଦେଶପ୍ରେମର ପ୍ରତୀକ। ଆମେ ସମସ୍ତେ ଯଦି ନିଜ ଅଞ୍ଚଳକୁ ସ୍ବଚ୍ଛ ରଖିବାକୁ ସଂକଳ୍ପ କରିବା, ତେବେ ଆମ ସମାଜ ଏକ ସୁସ୍ଥ ଓ ସୁନ୍ଦର ପରିବେଶରେ ପରିଣତ ହେବ ବୋଲି ପୂର୍ବତନ ବିଧାୟକ ଯାକବ ପ୍ରଧାନ ମତ ରଖିଛନ୍ତି। ସେ ଆହୁରି କହିଛନ୍ତି ଯୁବ ପୁରୁଷ ଖ୍ରୀଷ୍ଟିଆନ ସଂଘ ବୋର୍ଡ ସଦା ସମାଜର ସେବା ଓ ଯୁବ ସଚେତନତା ପାଇଁ କାମ କରୁଥିବାବେଳେ, ଆଗାମୀ ଦିନରେ ମଧ୍ୟ ଏପରି ସେବାମୂଳକ କାର୍ଯ୍ୟ ଜାରି ରହିବ ବୋଲି ପ୍ରତିଶ୍ରୁତି ଦେଇଛନ୍ତି।
ସେହିପରି ବିଡିଓ ରଥ ତାଙ୍କ ପ୍ରତିକ୍ରିୟାରେ କହିଛନ୍ତି, ସ୍ବଚ୍ଛ ଭାରତ ମିଶନ କେବଳ ସରକାରଙ୍କ ଏକ ଯୋଜନା ନୁହେଁ, ଏହା ଜନସାଧାରଣଙ୍କ ଭାଗୀଦାରୀ ଦ୍ୱାରା ସଫଳ ହେବାକୁ ଥିବା ଏକ ଜନଆନ୍ଦୋଳନ। ଦାରିଙ୍ଗବାଡ଼ିର ପ୍ରାକୃତିକ ସୌନ୍ଦର୍ଯ୍ୟକୁ ଅବିକୃତ ଓ ସ୍ବଚ୍ଛ ରଖିବା ପାଇଁ ସମସ୍ତଙ୍କ ସହଯୋଗ ଆବଶ୍ୟକ। ଆମେ ସମସ୍ତେ ମିଳିମିଶି କାମ କଲେ ସରକାରଙ୍କ ଉଦ୍ଦେଶ୍ୟ ସଫଳ ହେବ ଏବଂ ଆମ ଅଞ୍ଚଳ ଆଦର୍ଶ ସ୍ବଚ୍ଛ ଅଞ୍ଚଳରେ ପରିଣତ ହେବ ବୋଲି କହିଥିଲେ।
