ଓ୍ବାଶିଂଟନ,୨୭।୧୧ : ପୁଣି ପୃଥିବୀ ଉପରେ ବିପଦ ମାଡ଼ି ଆସୁଛି। ବୈଜ୍ଞାନିକମାନେ ୪୮୫ ଶହ ବର୍ଷ ଧରି ସାଇବେରିଆର ପର୍ମାଫ୍ରୋଷ୍ଟ ବରଫରେ ଶୋଇଥିବା ବହୁ ଭୂତାଣୁକୁ ପୁନର୍ଜୀବିତ କରିଛନ୍ତି। ଏହି ସମସ୍ତ ଭୂତାଣୁ ରୁଷିଆର ଦୂର ପୂର୍ବ ଅଞ୍ଚଳରେ ଅବସ୍ଥିତ ସାଇବେରିଆର ପର୍ମାଫ୍ରୋଷ୍ଟର ପାଞ୍ଚଟି ଭିନ୍ନ ଭିନ୍ନ ପ୍ରଜାତିର ଭୂତାଣୁ। ସେମାନଙ୍କର ନାମ ମେଗାଭାଇରସ ମାମୋଥ।
ଏହି ଭୂତାଣୁଙ୍କ ଆରମ୍ଭ ସେହି ସମୟରୁ ହୋଇଥିଲା ଯେତେବେଳେ ହାତୀମାନଙ୍କର ପୂର୍ବବଂଶଧର ମାମୋଥମାନେ ସାଇବେରିଆରେ ବୁଲୁଥିଲେ। ସେତେବେଳେ ବରଫ ଯୁଗର ସମୟ ଥିଲା। ବରଫ ଯୁଗରୁ ସାଇବେରିଆର ପର୍ମାଫ୍ରୋଷ୍ଟ ବରଫରେ ବହୁ ଭୂତାଣୁ ପୋତି ହୋଇ ରହିଛନ୍ତି।
ଯଦି ହଠାତ ଏସବୁ ଭୂତାଣୁର ସଂକ୍ରମଣ ହୁଏ ତେବେ ବିପଦ ସଙ୍କଟ ଜନକ ହେବ ବୋଲି କୁହାଯାଉଛି।
ବୈଜ୍ଞାନିକମାନେ ଏଥିରୁ କିଛି ବାହାର କରି ଜୀବନ୍ତ କରି ଦେଇଛନ୍ତି। ସେମାନେ କହିଛନ୍ତି ଯେ ଜଳବାୟୁ ପରିବର୍ତ୍ତନ ଯୋଗୁ ବରଫ ଯେପରି ଶୀଘ୍ର ତରଳି ଯାଉଛି, ଏପରି ପରିସ୍ଥିତିରେ ଯଦି ହଠାତ ଜୀବାଣୁ ସଂକ୍ରମଣ ବିସ୍ତାର ହୁଏ, ତେବେ ବିପଦ ଜନକ ସ୍ଥିତି ସୃଷ୍ଟି ହେବ। ସେଥିପାଇଁ ଆମେ ଏହି ଭୂତାଣୁମାନଙ୍କୁ ଆଗରୁ ଖୋଜିବାକୁ ଏବଂ ସେଗୁଡିକ ଉପରେ ଅଧ୍ୟୟନ କରିବାକୁ ଚାହୁଁଛୁ। ଯାହା ଦ୍ୱାରା ଆମେ ସେମାନଙ୍କ ସଂକ୍ରମଣରୁ ରକ୍ଷା ପାଇବା ପାଇଁ ଏକ ଉପାୟ ଖୋଜି ପାଇ ପାରିବା।
ସେଥିମଧ୍ୟରୁ ତିନୋଟି ଭୁତାଣୁର ବୟସ ୨୭ ହଜାର ବର୍ଷ। ଏହି ଭୂତାଣୁଗୁଡିକ ମାମୋଥ ମଳରୁ ବାହାର କରାଯାଇଛି। ଯାହା ମାମୋଥ କେଶରେ ଆବୃତ ଥିଲା। ବରଫରେ ଜମାଟ ବାନ୍ଧିଥିବା ଏହି ଭୂତାଣୁଗୁଡ଼ିକୁ ମେଗାଭାଇରସ ମାମୋଥ, ପିଥୋଭାଇରସ ମାମୋଥ ଏବଂ ପାଣ୍ଡୋରାଭାଇରସ ମାମୋଥ ନାମରେ ନାମିତ କରାଯାଇଛି। ଏହା ବ୍ୟତୀତ ବରଫରେ ପୋତି ହୋଇଥିବା ମୃତ ସାଇବେରିଆ ଗଧିଆ ପେଟରୁ ଦୁଇଟି ନୂତନ ଜୀବାଣୁ ଆବିଷ୍କୃତ ହୋଇଛି। ସେମାନଙ୍କର ନାମ ହେଉଛି ପାକମାନଭାଇରସ ଲୁପୁସ ଏବଂ ପାଣ୍ଡୋରାଭାଇରସ ଲୁପୁସ ।
