ନୂଆଦିଲ୍ଲୀ,୧୮।୯: କରୋନାର ତୃତୀୟ ଲହରକୁ ଦୃଷ୍ଟିରେ ରଖି ବିଶେଷଜ୍ଞମାନେ ଚେତାବନୀ ଦେଇଛନ୍ତି। କରୋନାର ଦ୍ୱିତୀୟ ଲହର ଥମିବାରେ ଲାଗିଛି। କିନ୍ତୁ ଆସନ୍ତା ତିନି ମାସ ମଧ୍ୟରେ ଲୋକମାନେ ସତର୍କ ରହିବା ଆବଶ୍ୟକ। ବିଶେଷଜ୍ଞମାନେ କହିଛନ୍ତି ଯେ ଆସନ୍ତା ତିନି ମାସ ମଧ୍ୟରେ ପାର୍ବଣ ଋତୁରେ ଅଧିକରୁ ଅଧିକ ଜନସମାଗମ ହେବାର ସମ୍ଭାବନା ରହିଛି। ଏଭଳି ହେଲେ କରୋନା ମହମାରୀର ତୃତୀୟ ଲହରକୁ ନିୟନ୍ତ୍ରଣରେ ଆଣିବା କଷ୍ଟକର ହୋଇ ପଡ଼ିବ। ସେଥିପାଇଁ ଲୋକମାନେ ସଜାଗ ରହିବା ସହିତ ଘରେ ରହି ପର୍ବ ପାଳନ କରିବା ଆବଶ୍ୟକ ବୋଲି ବିଶେଷଜ୍ଞ ମତପୋଷଣ କରିଛନ୍ତି।
ମହାମାରୀ ଉପରେ ଗବେଷଣା କରୁଥିବା ବୈଜ୍ଞାନିକମାନେ ଅଗଷ୍ଟରେ ଆଶଙ୍କା ପ୍ରକାଶ କରିଥିଲେ ଯେ, ଯଦି ସେପ୍ଟେମ୍ବର ସୁଦ୍ଧା ଭାରତରେ ନୂଆ ଭାରିଆଣ୍ଟ ଆସେ, ତେବେ ଅକ୍ଟୋବରରୁ ନଭେମ୍ବର ମଧ୍ୟରେ କରୋନାର ତୃତୀୟ ଲହର ଶୀର୍ଷରେ ପହଞ୍ଚିବାର ଆଶଙ୍କା ରହିଛି। ପାର୍ବଣ ସମୟରେ କରୋନା ମାର୍ଗଦର୍ଶିକା ପାଳନକରିବା ଆବଶ୍ୟକ ବୋଲି ଜାତୀୟ ଟିକାକରଣ ବୈଷୟିକ ପରାମର୍ଶଦାତା ଡ. ଏନ.କେ ଆରୋରା ଚେତାବନୀ ଦେଇଛନ୍ତି। ଗତ କିଛି ମାସ ଧରି ଦ୍ରୁତ ଟିକାକରଣ ପରେ ପରିସ୍ଥିତି ନିୟନ୍ତ୍ରଣରେ ରହିଛି ଏବଂ କରୋନାର କୌଣସି ନୂତନ ପ୍ରକାର ଭାରିଆଣ୍ଟ୍ ଆସି ନାହିଁ। ଏବେ ତୃତୀୟ ଲହର ବଡ ବିପଦ ଭାବେ ପାର୍ବଣ ଋତୁରେ ଦେଖା ଦେବାର ଆଶଙ୍କା ରହିଛି। ଲୋକମାନେ ପାର୍ବଣ ସମୟରେ ଯଦି କରୋନା ମାର୍ଗଦର୍ଶିକା ପାଳନ ନ କରନ୍ତି ତେବେ ପରିସ୍ଥିତି ପୁଣି ଖରାପ ହୋଇପାରେ ବୋଲି ସେ କହିଛନ୍ତି।
ସେହିପରି ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସର ନିର୍ଦ୍ଦେଶକ ରଣଦୀପ ଗୁଲେରିଆ କହିଛନ୍ତି ଯେ, ଭିଡ଼ ଜମିଲେ ପରିସ୍ଥିତି ପୁଣି ବିପଜ୍ଜନକ ହୋଇପାରେ। ଦେଶର ପରିସ୍ଥିତିକୁ ସୁଦୃଢ଼଼ କରିବା ପାଇଁ କଣ୍ଟେଣ୍ଟମେଣ୍ଟ ରଣନୀତି ପାଇଁ ଆଗାମୀ ଦୁଇରୁ ତିନି ମାସ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି।
