ଦିଗପହଣ୍ଡି, ୧୩।୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଅନ୍ତର୍ଗତ ବଡଡୁମ୍ବୁଳା ଗ୍ରାମରେ ଦଣ୍ଡାସି କୁଳ ବଡ଼ଖେମୁଣ୍ଡି ମୁଠା ପକ୍ଷରୁ ଏକ ଗୁରୁତ୍ୱପୂର୍ଣ୍ଣ ଆଲୋଚନା ସଭା ଅନୁଷ୍ଠିତ ହୋଇଯାଇଛି। ସ୍ଥାନୀୟ ମା’ ସିଦ୍ଧ ବାଙ୍କେଶ୍ୱରୀ ମନ୍ଦିର ସଂଲଗ୍ନ କଲ୍ୟାଣ ମଣ୍ଡପରେ ଆୟୋଜିତ ଏହି ସଭାରେ କୁଳର ସାଙ୍ଗଠନିକ ସୁଦୃଢ଼ୀକରଣ ଏବଂ ଆଗାମୀ କାର୍ଯ୍ୟପନ୍ଥା ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା। ସଭାରେ କୁଳର ଅଭିବୃଦ୍ଧି ପାଇଁ ନୂତନ କର୍ମକର୍ତ୍ତାଙ୍କୁ ସର୍ବସମ୍ମତି କ୍ରମେ ଚୟନ କରାଯାଇଥିଲା। ପ୍ରମୋଦ ନାୟକଙ୍କୁ ଦଣ୍ଡାସି କୁଳର ବଡ଼ଖେମୁଣ୍ଡି ତାଲୁକା ବଡ଼ଡୁମ୍ବୁଳା ମୁଠା ସଭାପତି ଭାବେ ସର୍ବସମ୍ମତି କ୍ରମେ ଚୟନ କରାଯାଇଥିବା ବେଳେ ଉପସଭାପତି ଭାବେ ଦେବରାଜ ନାୟକ, କୋଷାଧ୍ୟକ୍ଷ ଭାବେ ବାରିକ ନାୟକ ଏବଂ କୁଳ ବେହେରା ଭାବେ ପଞ୍ଚାନନ ନାୟକଙ୍କୁ ଚୟନ କରାଯାଇଥିଲା।
ସଭାରେ ଦଣ୍ଡାସି କୁଳର ବିଭିନ୍ନ ସାଙ୍ଗଠନିକ ସମସ୍ୟା ଉପରେ ଆଲୋକପାତ କରାଯିବା ସହ ସାମାଜିକ ବିକାଶ ପାଇଁ ଏକାଧିକ ପ୍ରସ୍ତାବ ଗୃହୀତ ହୋଇଥିଲା। ଏହି ଅବସରରେ କାଳୁ ନାୟକ, ଅଭି ନାୟକ, ରାଜେନ୍ଦ୍ର ନାୟକ, ଏବଂ ସନିଆ ନାୟକଙ୍କ ସମେତ କୁଳର ବହୁ ସଂଖ୍ୟକ ସଭ୍ୟ ଉପସ୍ଥିତ ରହି ନିଜ ନିଜର ମତାମତ ରଖିଥିଲେ। କୁଳର ଏକତା ଏବଂ ସାମାଜିକ ସଂସ୍କାରକୁ ପ୍ରାଧାନ୍ୟ ଦେବା ପାଇଁ ସଭାରେ ସଂକଳ୍ପ ନିଆଯାଇଥିଲା।
