କୁଡୁମୁଲୁଗୁମ୍ମା,୫ା୧୨(ଡି.ଏନ.ଏ.):ଓଡ଼ିଶା ସରକାରଙ୍କ ପରିବାର ଓ ସ୍ବାସ୍ଥ୍ୟ କଲ୍ୟାଣ ବିଭାଗ ପକ୍ଷରୁ ନିର୍ମିତ ଦମନ ଚଳଚ୍ଚିତ୍ରର କଳାକାରମାନେ କୁଡୁମୁଲୁଗୁମ୍ମା ସ୍ବାସ୍ଥ୍ୟକେନ୍ଦ୍ରର କର୍ମଚାରୀଙ୍କୁ ଭେଟିଛନ୍ତି। ମ୍ୟାଲେରିଆ ନିରାକରଣ କାର୍ଯ୍ୟକ୍ରମ ‘ଦମନ’କୁ ଆଧାର କରି ମାଲକାନଗିରି ଜିଲାର ସ୍ବାଭିମାନ ଅଞ୍ଚଳ ଜଳଭଣ୍ଡାର ଆଖପାଖରେ ଏହି ଚଳଚ୍ଚିତ୍ର ଶୁଟିଂ ହୋଇଥିଲା। ଏହାର ନିର୍ଦ୍ଦେଶକ ଭିଷାଲ ମିରିୟା, ସହ ପ୍ରଯୋଜକ ବିଜୟ ପାତ୍ର, ସହ ନିର୍ଦ୍ଦେଶକ ଇମରାନ ଓ ସମ୍ବିତ ଜେନା କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରି କର୍ମଚାରୀମାନଙ୍କୁ ଭେଟିଥିଲେ। ସୂଚନାଯୋଗ୍ୟ, ଚଳଚ୍ଚିତ୍ର ଦମନରେ ପ୍ରଦର୍ଶିତ ସ୍ବାଭିମାନ ଅଞ୍ଚଳ ଯାନବାଇ, ଯୋଡାମ୍ବ, ଧୂଳିପୁଟ, ରାଲେଗଡ଼ା ଓ ପାପରମେଟଲା ଅଞ୍ଚଳ କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ରହିଛି। ଏହି ଅବହେଳିତ ଅଞ୍ଚଳବାସୀ ମ୍ୟାଲେରିଆ ଜ୍ୱରରେ କବଳିତ ହୋଇ ମୃତ୍ୟୁମୁଖରେ ପଡୁଥିଲେ। ରାଜ୍ୟ ସରକାରଙ୍କ ପରିବାର ଓ ସ୍ବାସ୍ଥ୍ୟକଲ୍ୟାଣ ବିଭାଗ, ମାଲକାନଗିରି ଜିଲା ପ୍ରଶାସନ ଓ କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର କର୍ମଚାରୀ ଓ ଡାକ୍ତରଙ୍କ ସେବା ଯୋଗୁ ଏହି ଅଞ୍ଚଳ ବର୍ତ୍ତମାନ ମ୍ୟାଲେରିଆମୁକ୍ତ ହୋଇପାରିଛି। ଏଭଳି ଏକ ପ୍ରସଙ୍ଗକୁ ଆଧାର କରି ଦମନ ଚଳଚ୍ଚିତ୍ର ନିର୍ମାଣ ହୋଇଛି। ଇତିମଧ୍ୟରେ ରାଜ୍ୟ ସରକାର ଉକ୍ତ ଚଳଚ୍ଚିତ୍ରକୁ କରମୁକ୍ତ କରିବା ସହ ଓଡ଼ିଶାର ସମସ୍ତ ସଦରମହକୁମାର ସିନେମା ହଲରେ ଏହି ଚଳଚ୍ଚିତ୍ର ଦେଖିବାପାଇଁ ପରାମର୍ଶ ଦେଇଛନ୍ତି। ଏହି ଅବସରରେ ମାଲକାନଗିରି ଜିଲାକୁ ଆସିଥିବା ଦମନ ଚଳଚ୍ଚିତ୍ରର ପ୍ରଯୋଜକ ଓ ନିର୍ଦ୍ଦେଶକ କୁଡୁମୁଲୁଗୁମ୍ମା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ କରି ସ୍ବାଭିମାନ ଅଞ୍ଚଳରେ ସ୍ବାସ୍ଥ୍ୟସେବା ଯୋଗାଉଥିବା ଡାକ୍ତର ଓ ଅନ୍ୟ କର୍ମଚାରୀଙ୍କୁ ଭେଟି ସେମାନଙ୍କ ସହ ଚଳଚ୍ଚିତ୍ର ସମ୍ପର୍କରେ ଆଲୋଚନା କରିଥିଲେ। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ଡ.ସନ୍ତୋଷ ଷଡ଼ଙ୍ଗୀଙ୍କ ସହ ସମସ୍ତ କର୍ମଚାରୀଙ୍କୁ ସମ୍ବର୍ଦ୍ଧିତ କରିଥିଲେ।
