ରାୟଗଡ଼ା,୧୧।୯(ଆଶିଷ ରଞ୍ଜନ ପଣ୍ଡା): ଅପରାଧ ଘଟାଇବା ପାଇଁ ଅପରାଧୀ ବିଭିନ୍ନ ପ୍ରକାର ଗାଡ଼ି ବ୍ୟବହାର କରୁଛନ୍ତି। ଚୋରି, ଡକାୟତି, ଗଞ୍ଜେଇ ଚାଲାଣ ଆଦି ବିଭିନ୍ନ ଆପରାଧିକ ମାମଲାରେ ବ୍ୟବହୃତ କିମ୍ବା ଦୁର୍ଘଟଣା ଘଟିଥିବା ଦୁଇ ଚକିଆଠାରୁ ଆରମ୍ଭ କରି ଚାରି ଚକିଆ ଯାନବାହନକୁ ପୋଲିସ ଜବତ କରି ଥାନାରେ ରଖୁଛି। ଅଧିକାଂଶ ଗାଡ଼ିରେ ନକଲି ନମ୍ବର ପ୍ଲେଟ ବ୍ୟବହାର କରାଯାଇଥିବାରୁ ଗାଡ଼ିର ପ୍ରକୃତ ମାଲିକଙ୍କ ପରିଚୟ ମିଳି ପାରୁ ନାହିଁ। ସେହିପରି କୌଣସି ଦୁର୍ଘଟଣାଗ୍ରସ୍ତ ଗାଡ଼ି ପୋଲିସ ହେପାଜତରେ ରହିଥିଲେ ଗାଡ଼ି ମାଲିକ ପୋଲିସ ନିକଟକୁ ପରିଚୟ ପ୍ରଦାନ କରି ଗାଡ଼ି ଆଣିବାକୁ ମଧ୍ୟ ଭୟ କରୁଛନ୍ତି। ଫଳରେ ଗାଡ଼ିଗୁଡ଼ିକ ବର୍ଷ ବର୍ଷ ଧରି ପଡ଼ି ରହୁଥିବାରୁ ଥାନା ପରିସର କବାଡିଖାନାରେ ପରିଣତ ହେବାରେ ଲାଗିଛି। ଅପରପକ୍ଷେ ଖରାବର୍ଷାରେ ଗାଡିଗୁଡ଼ିକ ପଡ଼ି ଅକାମୀ ହେବା ସହ ସେଥିରେ କଳଙ୍କି ଲାଗି ନଷ୍ଟ ହେବାକୁ ବସିଲାଣି। ଜିଲାର ରାୟଗଡ଼ା ଟାଉନ ଥାନା ସମେତ ଚାନ୍ଦିଲି, ବିଷମକଟକ, ମୁନିଗୁଡ଼ା, ଗୁଣପୁର, ପଦ୍ମପୁର ସମେତ ପ୍ରାୟ ଥାନାରେ ସଂଖ୍ୟାଧିକ ବାଇକ ଜବତ ହୋଇ ପଡ଼ିରହିଛି।
ଜବତ ହୋଇଥିବା ଗାଡିକୁ ପାଇବା ପାଇଁ କିଛି ମାଲିକ ଆଇନ ଅନୁସାରେ ଥାନାରେ ଆବେଦନ କରି ଗାଡ଼ି ଫେରି ପାଇଥାନ୍ତି ତ ଆଉ କିଛି କୋର୍ଟରେ ଧାରା ୪୫୭ ଅନୁସାରେ ଆବେଦନ କରି କୋର୍ଟ ନିର୍ଦ୍ଦେଶ ପ୍ରକାରେ ପୋଲିସ ନିକଟରୁ ଗାଡ଼ି ପାଇଥାନ୍ତି। ତେବେ ପୋଲିସର ଚାର୍ଜଶିଟ୍ ଦାଖଲରେ ବିଳମ୍ବ ଓ ନ୍ୟାୟିକ ପ୍ରକ୍ରିୟାରେ ବିଳମ୍ବ କାରଣରୁ ଗାଡ଼ିଗୁଡ଼ିକ ପଡ଼ି ପଡ଼ି ନଷ୍ଟ ହୋଇଯାଇଥିବାରୁ ଅଧିକାଂଶ ମାଲିକ ସେଗୁଡିକୁ ନେଇ ଆଉ ଖର୍ଚ୍ଚାନ୍ତ ହେବାକୁ ଚାହୁଁନାହାନ୍ତି। ଯେଉଁ ଥାନା ପରିସର ବଡ଼ ରହିଥାଏ, ସେଠାରେ ଗାଡ଼ିଗୁଡ଼ିକ ଥାନା ଭିତରେ ରହୁଛି। ହେଲେ ଯେଉଁ ଥାନା ପରିସର ଛୋଟ ଆକାରର ସେଠାରେ ଗାଡ଼ିଗୁଡ଼ିକ ରାସ୍ତା ଉପରେ ପଡ଼ି ରହୁଥିବାରୁ ସେଗୁଡ଼ିକର କିଛି ପାର୍ଟସ ମଧ୍ୟ ଚୋରି ହୋଇଯାଇଥିବା ଅଭିଯୋଗ ହୋଇଛି। ଏସମ୍ପର୍କରେ ରାୟଗଡ଼ା ଏସଡିପିଓ ରଶ୍ମୀ ରଞ୍ଜନ ସେନାପତିଙ୍କୁ ପଚାରିବାରୁ ପୋଲିସ ପାଖରେ ନିଲାମ କ୍ଷମତା ନାହିଁ। ଗାଡ଼ିଗୁଡ଼ିକ ନିଲାମ କରିବା ପାଇଁ ସରକାରୀ ନିୟମାବଳୀ ଅନୁଯାୟୀ କୋର୍ଟ ଅନୁମତି ପାଇଁ ଆବେଦନ କରାଯାଇଛି। ସମସ୍ତ ପ୍ରକ୍ରିୟା ଶେଷ ହୋଇ ଅନୁମତି ମିଳିବା ପରେ ଗାଡ଼ିଗୁଡ଼ିକ ନିଲାମ କରାଯିବ। ଏଥିସହିତ ଯେଉଁ ବ୍ୟକ୍ତି ନିଜ ଗାଡ଼ିର ପ୍ରମାଣପତ୍ର ଓ କୋର୍ଟ ଅନୁମତି ଦେଖାଇବେ ସେମାନଙ୍କୁ ଗାଡ଼ି ଫେରାଇ ଦିଆଯିବ ବୋଲି ସେ କହିଛନ୍ତି।
ଏ ବିଷୟରେ ଅଧିକ ତଥ୍ୟ ପାଇଁ ବରିଷ୍ଠ ଆଇନଜୀବୀ ମଙ୍ଗଳମୂର୍ତ୍ତି ବେଉରିଆଙ୍କୁ ପଚାରିବାରୁ ପୋଲିସ ୩ଟି ମାମଲାରେ ଗାଡ଼ି ଜବତ କରିପାରିବ ବୋଲି କହିଛନ୍ତି। ଦୁର୍ଘଟଣାଗ୍ରସ୍ତ ଗାଡ଼ି ଜବତ ପରେ ପରିବହନ ବିଭାଗଠାରୁ ଗାଡ଼ି ଓ ମାଲିକ ବିଷୟରେ ସବିଶେଷ ତଥ୍ୟ ପାଇବା ପରେ ପୋଲିସ ଗାଡ଼ି ମାଲିକଙ୍କୁ ଗାଡ଼ି ଫେରାଇ ପାରିବ। ସେହିଭଳି ଯଦି ଡ୍ରଙ୍କେନ ଡ୍ରାଇଭ ମାମଲାରେ ପୋଲିସ ଗାଡ଼ି ଜବତ କରି କିଛି ଚାପରେ ଛାଡ଼ି ଦେଉଥିବା ବେଳେ ଅନ୍ୟ କିଛି ମାମଲା କୋର୍ଟକୁ ପଠାଉଛନ୍ତି। ତେବେ କୋର୍ଟକୁ ପଠାଇବା ସମୟରେ ଗାଡ଼ିର ସମସ୍ତ ତଥ୍ୟ ଓ ଫଟୋ ଆଦି ସହିତ କୋର୍ଟରେ ଦାଖଲ କରିବା କଥା। କିନ୍ତୁ ସେଗୁଡ଼ିକ ପୋଲିସ ପକ୍ଷରୁ ହେଉନାହିଁ। ଫଳରେ ଗାଡ଼ି ମାଲିକ ନିଜେ ସେ ସବୁ କରି କୋର୍ଟରେ ଦାଖଲ କରି ଗାଡ଼ି ଛାଡ଼ିବା ପାଇଁ କୋର୍ଟରେ ଆବେଦନ କରୁଥିବା ଆଇନଜୀବୀ ମଙ୍ଗଳମର୍ତ୍ତି କହିଛନ୍ତି। ଅପରପକ୍ଷେ ଗଞ୍ଜେଇ,ମଦ ଆଦି ଅବକାରୀ ମାମଲାରେ ଗାଡ଼ି ଜବତ ହୋଇଥିଲେ ମାମଲା କୋର୍ଟରେ ପ୍ରମାଣିତ ହେବା ପରେ ଜିଲାପାଳଙ୍କ ସ୍ବୀକୃତିରେ ଉକ୍ତ ଗାଡ଼ିଗୁଡ଼ିକୁ ବାଜ୍ୟାପ୍ତି କରାଯାଇପାରିବ ବୋଲି ସେ କହିଛନ୍ତି। ତେବେ ଗାଡ଼ିଗୁଡ଼ିକ ନିଲାମ ମାଧ୍ୟମରେ ବାଜ୍ୟାପ୍ତି କରି ଉକ୍ତ ଅକ୍ସନ ଟଙ୍କାକୁ ଜମା କରାଯିବ ବୋଲି ଏ ନେଇ ରାଜ୍ୟ ସରକାର ଏକ ବିଜ୍ଞପ୍ତି ଜାରି କରିଥିଲେ। ଗାଡ଼ିଗୁଡ଼ିକ ଫାଇନାନ୍ସ ରହୁଥିବାରୁ ସେଗୁଡ଼ିକର ବାଜ୍ୟାପ୍ତି ହୋଇପାରୁନାହିଁ। ତେଣୁ କୋର୍ଟକୁ ମାମଲା ପଠାଇବା ସମୟରେ ପୋଲିସ ଯଦି ଆବଶ୍ୟକ ତଥ୍ୟ ଓ ଫଟୋ ଆଦି ଦାଖଲ କରିବେ ତେବେ ଗାଡ଼ି ମୁକ୍ତ ପାଇଁ କୋର୍ଟ ନିର୍ଦ୍ଦେଶରେ ବିଳମ୍ବ ହେବ ନାହିଁ ବୋଲି ଆଇନଜୀବୀ ମଙ୍ଗଳମୂର୍ତ୍ତି ବେଉରିଆ କହିଛନ୍ତି।
