ମୁମ୍ବାଇ,୧୬।୪: ମହେନ୍ଦ୍ର ସିଂ ଧୋନୀ ଶୁକ୍ରବାର ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ପାଇଁ ପ୍ରଥମ ଖେଳାଳି ଭାବେ ୨୦୦ ତମ ମ୍ୟାଚ୍ ଖେଳିଛନ୍ତି। ଧୋନୀଙ୍କ ଏହି ମାଇଲଷ୍ଟୋନ ମ୍ୟାଚ୍ରେ ସିଏସ୍କେ ୨୨ ବଲ ବାକି ଥାଇ ୬ ଉଇକେଟରେ ପଞ୍ଜାବ କିଙ୍ଗ୍ସକୁ ହରାଇ ଦେଇଛି।
ଦୀପକ ଚହରଙ୍କ ଘାତକ ବୋଲିଂ ଓ ରବୀନ୍ଦ୍ର ଜାଡେଜାଙ୍କ ଫିଲ୍ଡିଂ ଯୋଗୁ ପଞ୍ଜାବ ଦଳ ୨୦ ଓଭରରେ ୮ ଉଇକେଟ ହରାଇ ୧୦୬ ରନ୍ କରିବାକୁ ସକ୍ଷମ ହୋଇଥିଲା। ଶାହାରୁଖ ଖାନ (୪୭ ରନ୍, ୪ ଚୌକା ଓ ୨ ଛକା)ଙ୍କୁ ଛାଡ଼ି ଦେଲେ ଫେଲ୍ ମାରିଲେ ସମସ୍ତ ବ୍ୟାଟ୍ସମ୍ୟାନ। ଦୀପକ ୪ ଉଇକେଟ ନେଇଥିବାବେଳେ ମୋଇନ ଅଲି, ଡ୍ବେନ ବ୍ରାଭୋ ଓ ସାମ କୁରାନ ଗୋଟିଏ ଲେଖାଏ ଉଇକେଟ ନେଇଥିଲେ।
ଛୋଟିଆ ସ୍କୋରକୁ ସିଏସ୍କେ ୧୫.୪ ଓଭରରେ ୪ ଉଇକେଟ ହରାଇ ହାସଲ କରି ନେଇଥିଲା। ଦଳ ପାଇଁ ଫାଫ୍ ଡୁ’ପ୍ଲେସି ୩୬* (୩ ଚୌକା ଓ ୧ ଛକା) ଓ ମୋଇନ ଅଲି ୪୬ (୭ ଚୌକା ଓ ୧ ଛକା) ରନ୍ କରିଥିଲେ। ବୋଲିଂରେ ୨ ଉଇକେଟ ହାତେଇଥିଲେ ମହମ୍ମଦ ଶାମି।
