ମୁମ୍ବାଇ: ଡ୍ରଗ୍ସ ମାମଲାରେ ଗିରଫ ହୋଇଥିବା ବଲିଉଡ ବାଦଶାହା ଶାହାରୁଖ ଖାଁଙ୍କ ପୁଅ ଆର୍ୟନ ଖାଁ ଅକ୍ଟୋବର ୭ ପର୍ଯ୍ୟନ୍ତ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନ୍ସିବି) ହେପାଜତରେ ରହିବେ ବୋଲି ଜଣାପଡିଛି । ମିଳିଥିବା ସୂଚନା ଅନୁଯାୟୀ, ଆର୍ୟନଙ୍କ ବିରୋଧରେ ଏନ୍ଡିପିଏସ୍ ଧାରା ୨୭(କୌଣସି ମାଦକ ପଦାର୍ଥ ସେବନ କରିବା) ୮ସି (ମାଦକ ପଦାର୍ଥର ଉତ୍ପାଦନ, ପ୍ରସ୍ତୁତି, ପାଖରେ ରଖିବା, ବିକ୍ରି କରିବା ବା କ୍ରୟ କରିବା) ଓ ଅନ୍ୟ ଧାରା ଆଧାରରେ ମାମଲା ରୁଜୁ କରାଯାଇଛି । ସତିଶ ମାନସିନ୍ଦେ ଆର୍ୟନଙ୍କ ତରଫରୁ ଲଢୁଛନ୍ତି । ସେ କୋର୍ଟଙ୍କୁ କହିଛନ୍ତି, ଆର୍ୟନଙ୍କଠାରୁ କୌଣସି ମାଦକ ପଦାର୍ଥ ଜବତ କରାଯାଇ ନାହିଁ । ଯଦି ତାଙ୍କୁ ଜାମିନ ମିଳିବ ତେବେ ସେ ଏନ୍ସିବିର ଯାଞ୍ଚରେ ସାମିଲ ହୋଇ ପାରିବେ । ଆର୍ୟନଙ୍କ ସହ ଅନ୍ୟ ୨ଜଣ ମଧ୍ୟ ୭ ଅକ୍ଟୋବର ପର୍ଯ୍ୟନ୍ତ ପଚରା ଉଚରା ପାଇଁ ଏନ୍ସିବି ହେପାଜତରେ ରହିବେ ବୋଲି ଜଣାପଡିଛି । ସୂଚନାଯୋଗ୍ୟ, ଶନିବାର ରାତିରେ ମୁମ୍ବାଇରୁ ଗୋଆ ଯାଉଥିବା ଏକ ସିପରେ ଚାଲିଥିବା ଡ୍ରଗ୍ସ ପାର୍ଟିରେ ଆର୍ୟନ ଖାଁ ଯାଇଥିଲେ । ପାର୍ଟି ସମ୍ପର୍କରେ ପୂର୍ବରୁ ସୂଚନା ପାଇ ଏନ୍ସିବି ଟିମ୍ ସାଦା ପୋଷାକରେ ଯାଇ ପାର୍ଟି ଉପରେ ଚଢଉ କରିବା ସହ ପ୍ରାୟ ୧୧ ଜଣଙ୍କୁ ଗିରଫ କରିଥିଲା । ଯେଉଁଥିରେ ବଲିଉଡ୍ ତାରକା ଶାହାରୁଖ ଖାଁଙ୍କ ପୁଅ ଆର୍ୟନ ଖାଁ ରହିଥିଲେ ।
