ନୂଆଦିଲ୍ଲୀ,୩୦।୪: ଆଇପିଏଲ୍ ୨୦୨୪ରେ ରାଜସ୍ଥାନ ରୟାଲ୍ସ ଜବରଦସ୍ତ ପ୍ରଦର୍ଶନ ଜାରି ରଖିଛି। ଯଦି ଏହିପରି ଚାଲେ ତେବେ ଦଳ ଟାଇଟଲ ଜିତିବା ଏକ ପ୍ରକାର ନିଶ୍ଚିତ ବୋଲି କୁହାଯାଉଛି। ଅନ୍ୟ ଏକ ସଂଯୋଗ କ୍ରମେ ରାଜସ୍ଥାନ ଟ୍ରଫି ଜିତିଲେ ଟିମ୍ ଇଣ୍ଡିଆ ମଧ୍ୟ ଚଳିତ ଥର ବିଶ୍ୱକପ୍ ଜିତିବ ବୋଲି ଚର୍ଚ୍ଚା ହେଉଛି। ଉଭୟ ଟିମ୍ ମଧ୍ୟରେ ସ୍ବତନ୍ତ୍ର ସମାନତା ରହିଛି।
କହିବାକୁ ଗଲେ ଦୀର୍ଘ ଏକ ଦଶକରୁ ଅଧିକ ସମୟ ଧରି ଟିମ୍ ଇଣ୍ଡିଆ ଆଇସିସି ଟୁର୍ନାମେଣ୍ଟ ଜିତିବାକୁ ଅପେକ୍ଷା କରି ରହିଛି। ଠିକ୍ ସେମିତି ରାଜସ୍ଥାନ ମଧ୍ୟ ଆଇପିଏଲ୍ ଟ୍ରଫି ଜିତିବା ଲକ୍ଷ୍ୟରେ ରହିଛି। ୨୦୧୩ରେ ଶେଷ ଥର ପାଇଁ ଧୋନୀଙ୍କ ନେତୃତ୍ୱରେ ଦଳ ଆଇସିସି ଟାଇଟଲ ଜିତିଥିଲା। ରାଜସ୍ଥାନ ମଧ୍ୟ ୨୦୦୮ ପରେ ଆଇପିଏଲ୍ ଚାମ୍ପିୟନ ହୋଇପାରିନାହିଁ। ଶେନ ଓ୍ବାର୍ନଙ୍କ ନେତୃତ୍ୱରେ ଦଳ ଆଇପିଏଲ୍ର ପ୍ରଥମ ସିଜନ ହିଁ ଜିତିପାରିଥିଲା।
ଏଯାବତ ଉଭୟର ପ୍ରଦର୍ଶନ ଦେଖିଲେ ଟୁର୍ନାମେଣ୍ଟ ଆରମ୍ଭରୁ ସମସ୍ତେ ନିଜର ପ୍ରଦର୍ଶନ ବଳରେ ଅନ୍ୟ ଟିମ୍କୁ ଡୋମିନେଟ୍ କରିଥାନ୍ତି। କିଛିବର୍ଷ ଧରି ରାଜସ୍ଥାନ ସର୍ବଦା ଶ୍ରେଷ୍ଠ ୨ ଟିମ୍ରେ ରହି ଆସୁଥିବା ବେଳେ ଟିମ୍ ଇଣ୍ଡିଆ ମଧ୍ୟ ସେଭଳି ରହି ଆସିଛି। ହେଲେ ଏସବୁ ସତ୍ତ୍ୱେ ସବୁଥର ଫାଇନାଲ ନଚେତ ତା’ ପୂର୍ବରୁ ଦଳଗୁଡ଼ିକ ପ୍ରଶଂସକଙ୍କ ହୃଦୟ ଭାଙ୍ଗିଥାନ୍ତି।
ଆଇପିଏଲ୍ ୨୦୨୪ରେ ରାଜସ୍ଥାନ ଶୀର୍ଷରେ ରହିଛି। ଏମିତିରେ ଯଦି ଦଳ ସେଭଳି ପ୍ରଦର୍ଶନ କରି ଟାଇଟଲ ଜିତିବାରେ ସଫଳ ହୁଏ, ତେବେ ଟିମ୍ ଇଣ୍ଡିଆ ମଧ୍ୟ ନିଜର ଆଇସିସି ଟାଇଟଲ ଜିତିବାର ସ୍ବପ୍ନ ପୂରଣ କରିପାରେ ବୋଲି କୁହାଯାଉଛି।
