ଦେବଗଡ଼,୧୩।୬(ଡି.ଏନ୍.ଏ.): ଦେବଗଡ଼ ପୌରପରିଷଦ ରଜାମୁଣ୍ଡା ନିକଟସ୍ଥ ତିୱାରୀ ଢାବା ସମ୍ମୁଖରେ ୪୯ ନମ୍ବର ଜାତୀୟ ରାଜପଥରେ ସୋମବାର ରାତିରେ ଠିଆ ହୋଇଥିବା ଏକ ଟ୍ରକ୍କୁ ଧକ୍କାଦେଇ ଅନ୍ୟ ଏକ ଲୁହା ପଥର ବୋଝେଇ ଟ୍ରକ୍ ଜଳିଯାଇଥିବା ଜଣାପଡିଛି । ଏଥିସହ ଟ୍ରକ୍ ଚାଳକ ନିଆଁରେ ପୋଡ଼ି ଗୁରୁତର ଆହତ ହୋଇଥିବା ଜଣାପଡିଛି ।
ସୂଚନାନୁଯାୟୀ, ତିୱାରୀ ଢାବା ସମ୍ମୁଖରେ ୪୯ ନମ୍ବର ଜାତୀୟ ରାଜପଥରେ ଦେବଗଡ଼ ଆଡକୁ ମୁହଁ କରି ଠିଆ ହୋଇଥିବା ଏକ ଟ୍ରକ(ନଂ-ଡବ୍ଲୁବି-୨୩-ଡି-୮୬୬)କୁ ପଛପଟୁ ଆସୁଥିବା ଏକ ଲୁହା ପଥର ବୋଝେଇ ଟ୍ରକ (ଓଡି-୧୪-ପି-୮୫୭୧)ଧକ୍କା ଦେଇଥିଲା । ଫଳରେ ଉକ୍ତ ଲୁହା ପଥର ବୋଝେଇ ଟ୍ରକର ଇଞ୍ଜିନ୍ରେ ହଠାତ ନିଆଁ ଲାଗିଯାଇ ବିଦ୍ୟୁତ ବେଗରେ ଏହା ଟ୍ରକ୍ର କ୍ୟାବିନକୁ ବ୍ୟାପୀ ଯାଇଥିଲା । ଏହି ସମୟରେ ଟ୍ରକ୍ର ଚାଳକ
ମଣ୍ଟୁ କିଶାନ ଜୀବନ ବଞ୍ଚାଇବାକୁ ଯାଇ ଟ୍ରକ୍ କ୍ୟାବିନର କବାଟ ଖୋଲି ବାହାରକୁ ଡେଇଁ ପଡିଥିଲେ। ମାତ୍ର ଏହା ପୂର୍ବରୁ ତାଙ୍କ ଶରୀରର ବିଭିନ୍ନ ଅଂଶ ନିଆଁରେ ପୋଡି ଯାଇଥିଲା । ଅନ୍ୟପକ୍ଷରେ ଠିଆ ହୋଇଥିବା ଟ୍ରକ୍ର ପଛପଟେ ମଧ୍ୟ ନିଆଁ ଲାଗିଯାଇଥିଲା। ତେବେ ଉକ୍ତ ଟ୍ରକର ଚାଳକ ଉପସ୍ଥିତ ବୁଦ୍ଧି ପ୍ରୟୋଗ କରି ଟ୍ରକଟିକୁ ନିକଟସ୍ଥ ଏକ ସର୍ଭିସିଂ(ୱାସ ସେଣ୍ଟର)କୁ ନେଇଯାଇ ନିଆଁ ଲିଭାଇବାରେ ସଫଳ ହୋଇଥିଲେ ।
ସୂଚନାପାଇ ଦେବଗଡ଼ ଦମକଳ ବାହୀନୀ ଘଟଣାସ୍ଥଳରେ ପହଞ୍ଚିବା ସହ ନିଆଁ ଲାଗିଥିବା ଲୁହା ପଥି ବୋଝେଇ ଟ୍ରକରୁ ନିଆଁକୁ ଲିଭାଇଥିଲେ। ତେବେ ଟ୍ରକ୍ର ଇଞ୍ଜିନଟି ସମ୍ପୂର୍ଣ୍ଣ ଭାବେ ପୋଡି ଯାଇଥିବା ଜଣାପଡିଛି । ଆହତ ହୋଇଥିବା ଟ୍ରକ୍ ଚାଳକ ମଣ୍ଟୁଙ୍କ ଘର ସମ୍ବଲପୁର ଜିଲା ଢୁଡିଖୋଳ (କୁଚିଣ୍ଡା)ବୋଲି ଜଣାପଡିଛି। ଆହତ ଚାଳକ ମଣ୍ଟୁଙ୍କୁ ଅଧିକ ଚିକିତ୍ସା ପାଇଁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି।
