କୃଷ୍ଣପ୍ରସାଦ,୬।୧୦(କୈଳାସ ଚନ୍ଦ୍ର ପଟ୍ଟନାୟକ): ପୁରୀ ଜିଲା କୃଷ୍ଣପ୍ରସାଦ ବ୍ଲକ ଅଧୀନ ରାମଲେଙ୍କା ପଞ୍ଚାୟତ ପାଇକେରାପୁରଠାରୁ ଜହ୍ନିକୁଦା ଘାଟ ପର୍ଯ୍ୟନ୍ତ ପୂର୍ତ୍ତ ବିଭାଗ ରାସ୍ତା ଶୋଚନୀୟ ହୋଇପଡିଛି। ବିଶେଷକରି ବ୍ରାହ୍ମଣଦେଓ ହାଡ଼ି ପୋଖରୀ, ପିଟିଶାଳ ବିଟ ହାଉସ, ବଜ୍ରକୋଟ ବାଙ୍କ ଓ ପୋଖରୀ, ଗିଲିନାଶୀ, କୃଷ୍ଣପ୍ରସାଦ, ତିଛିଣି, ନୂଆପଡାଠାରେ ରାସ୍ତା ଖାଲଖମା ହୋଇଛି। ଫଳରେ ଲୋକେ ଯାତାୟାତ କରିବାରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ପ୍ରତିଦିନ ଛୋଟବଡ଼ ଦୁର୍ଘଟଣା ଘଟୁଥିବା ନଜିର ରହିଛି। ମରାମତି ନ ହେବାରୁ ଉଭୟ ପାର୍ଶ୍ୱରେ ଥିବା କଣ୍ଟାଗଛ ରାସ୍ତା ଉପରକୁ ମାଡ଼ିଯାଇଥିବା ଦେଖିବାକୁ ମିଳିଛି। ଅନ୍ୟପକ୍ଷରେ ଏହି ରାସ୍ତାରେ ଥିବା ଶିଆଳ, ତିଛିଣି, ନୂଆପଡା ପହିଶାଣ ପୋଲର ମରାମତି ନ ହେବାରୁ ବିପଦସଙ୍କୁଳ ଅବସ୍ଥାରେ ରହିଛି। କୌଣସି ପୋଲ ଭାଙ୍ଗିଲେ ଉକ୍ତ ଅଞ୍ଚଳକୁ ଗମନାଗମନ ଠପ୍ ହେବାର ଆଶଙ୍କା ରହିଛି। ସେହିପରି କୃଷ୍ଣପ୍ରସାଦ ଅଞ୍ଚଳରେ ବସୁଧା ଯୋଜନାରେ ପାଣି ପାଇପ୍ ଲାଇନ ବିଛାଇବା ପାଇଁ ରାସ୍ତା ଖୋଳାଯାଇଥିଲେ ମଧ୍ୟ ମରାମତି କରାଯାଉନାହିଁ। ଏନେଇ ସ୍ଥାନୀୟ ଅଞ୍ଚଳର ଟୁଇଟର ବୟ ଭାବେ ପରିଚିତ ପ୍ରଦ୍ୟୁମ୍ନ କୁମାର ବିଶ୍ୱାଳ ସମସ୍ୟା ସମ୍ପର୍କରେ ଆର୍ଡବ୍ଲ୍ୟୁଏସ୍ଏସ୍ ଜେଇ ଏବଂ କୃଷ୍ଣପ୍ରସାଦ ବିଡିଓଙ୍କୁ ଜଣାଇଥିଲେ ମଧ୍ୟ ସୁଫଳ ମିଳିନାହିଁ। ରାସ୍ତା ସମସ୍ୟାର ସମାଧାନ ଦିଗରେ ଦୃଷ୍ଟି ଦିଆଯାଉ ନ ଥିବାରୁ ଟୁଇଟ୍ ମାଧ୍ୟମରେ ମୁଖ୍ୟ ଶାସନସଚିବ, ୫-ଟି ସଚିବ, ପୂର୍ତ୍ତ ବିଭାଗ, ଜିଲାପାଳଙ୍କ ନିକଟରେ ଅଭିଯୋଗ କରାଯାଇଛି। ତୁରନ୍ତ ଜିଲା ପ୍ରଶାସନ ଓ ବିଭାଗୀୟ ଅଧିକାରୀ ରାସ୍ତା ମରାମତି ପାଇଁ ପଦକ୍ଷେପ ନେବାକୁ ବ୍ରାହ୍ମଣଦେଓ ଗ୍ରାମର ଲଲାଟେନ୍ଦୁ ରଣସିଂହ, ବଜ୍ରକୋଟ ଗ୍ରାମର ଅଜିତ୍ କୁମାର ପଣ୍ଡା, ସମାଜସେବୀ ବିଷ୍ଣୁପ୍ରସାଦ ବେହେରା, ପ୍ରଦ୍ୟୁମ୍ନ କୁମାର ବିଶ୍ୱାଳ, ପ୍ରଜ୍ଞାରେଖା ଜେନା, ଗୁରୁବାଇ ଗ୍ରାମର ଲିଟୁ ପ୍ରଧାନ ପ୍ରମୁଖ ଦାବି କରିଛନ୍ତି।
