କେନ୍ଦ୍ରାପଡା,୨୬।୨(ଜଗନ୍ନାଥ ଧଳ): କେନ୍ଦ୍ରାପଡ଼ା ଗୁଲୁନଗର ଗାଁରେ ବଡ଼ ଅଘଟଣ । ବାଣ ବିସ୍ଫୋରଣରେ ୧୦ରୁ ଉର୍ଦ୍ଧ୍ବ ବ୍ୟକ୍ତି ଆହତ ହୋଇଛନ୍ତି । ସାମାନ୍ୟ ଭୁଲରୁ ଉତ୍ସବ ସ୍ଥଳ ବାଣ ବିସ୍ଫୋରଣ ପାଇଁ କ୍ରନ୍ଦନ ସ୍ଥଳ ହୋଇଯାଇଛି । ଜଣେ ବ୍ୟକ୍ତି ଗୁରୁତର ହେବାରୁ କଟକ ବଡ଼ ମେଡ଼ିକାଲକୁ ପଠାଯାଇଛି । ସେହିପରି ୪ଜଣ ଶିଶୁଙ୍କ ସମେତ ୫ରୁ ଉର୍ଦ୍ଧ୍ବ ଲୋକ ଆହତ ଅବସ୍ଥାରେ ଜିଲା ହସ୍ପିଟାଲରେ ଭର୍ତ୍ତି ହୋଇଛନ୍ତି ।
ସୂଚନା ଅନୁସାରେ, ଗ୍ରାମରେ ବିଶ୍ୱଶାନ୍ତି ମହାଯଜ୍ଞ ପାଇଁ ୧୦୮ କଳସ ଯାତ୍ରା ନିକଟସ୍ଥ ଗୋବରୀ ନଦୀକୁ ଯାଉଥିଲା ।ଏଥିରେ ତିନି ଶହରୁ ଉର୍ଦ୍ଧ୍ବ ମହିଳା, ପୁରୁଷ ଓ ଶିଶୁ ମାନେ ଥିଲେ । ନଦୀ କୂଳରେ ପାଣି ଉଠାଇବା ପାଇଁ ପୂଜା ଚାଲିଥିବା ସମୟରେ କେତେକ ଲୋକ ଅତି ଉତ୍ସାହିତ ହୋଇ ନିକଟ ଅଞ୍ଚଳରେ ସଟ୍ସ ବାଣ ଲଗାଇ ଥିଲେ । ବାଣ ସଠିକ ସ୍ଥାନରେ ନଥିବାରୁ ଗୋଟିଏ ପାର୍ଶ୍ୱକୁ ଢଳି ପଡିଥିଲା। ଫଳରେ ବାଣ ନିକଟସ୍ଥ ଜନ ଗହଳିରେ ପଡିଥିଲା। ବାଣ ବିସ୍ଫୋରଣ ଘଟିବାରୁ ପାଖରେ ଥିବା ଅନେକ ଆହତ ହୋଇଥିଲେ । ଏକ ବଡ଼ ଦୁର୍ଘଟଣା ଟଳିଯାଇଛି କହିଲେ ଅତ୍ୟୁକ୍ତି ହେବ ନାହିଁ ।
