ଦିଗପହଣ୍ଡି,୧୦।୨(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ କାର୍ଯ୍ୟାଳୟ ସମ୍ମୁଖରେ ମଙ୍ଗଳବାର ଭାରତୀୟ କମ୍ୟୁନିଷ୍ଟ ପାର୍ଟି(ସିପିଆଇ) ପକ୍ଷରୁ ବିଭିନ୍ନ ଦାବି ପୂରଣ ପାଇଁ ବିକ୍ଷୋଭ ପ୍ରଦର୍ଶନ କରାଯାଇଛି। ବିକ୍ଷୋଭ ପୂର୍ବରୁ ବହୁ ସଂଖ୍ୟକ ଦଳୀୟକର୍ମୀ ଶୋଭାଯାତ୍ରାରେ ଆସି ବ୍ଲକ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ। ଆୟୋଜିତ ପ୍ରତିବାଦ ସଭାରେ ସିପିଆଇ ଗଞ୍ଜାମ ଜିଲା ସହସମ୍ପାଦକ ପ୍ରଦୀପ ସେଠୀ,କୃଷକ ସଙ୍ଗଠକ ବୃନ୍ଦାବନ ପଣ୍ଡା କେନ୍ଦ୍ର ଓ ରାଜ୍ୟ ସରକାରଙ୍କ ସାମଗ୍ରିକ ବିଫଳତା , ଚାଷୀ ମାରଣ ନୀତି, କଳା ଶ୍ରମ କୋଡ଼ ବାତିଲ କରାଯିବା ସହ ଦରଦାମ ବୃଦ୍ଧି ବିରୋଧରେ ଉଦ୍ବୋଧନ ଦେଇଥିଲେ। ସିପିଆଇ ଦିଗପହଣ୍ଡି ଶାଖା ସମ୍ପାଦକ ତପନ କୁମାର ମିଶ୍ର, ଭଗବାନ ପଟ୍ଟନାୟକ, ଆର. ଦୀନବନ୍ଧୁ ଦୈତାରି ରେଡ୍ଡୀ, ପ୍ରକାଶ ସେଠୀ, ଅଶୋକ ସେଠୀ,ମୂଷା ବେହେରା,ଉଗ୍ରସେନ ସେଠୀ, ବୀର ପ୍ରଧାନ,ବିଜୟ ସ୍ବାଇଁ,ନରସିଂହ ରଣା,ପବିତ୍ର ରଣା,ପ୍ରଦୀପ ପରିଡ଼ା, ପ୍ରଶାନ୍ତ ପ୍ରଧାନ, ପିଣ୍ଟୁ ବେହେରା,ସୁରେନ୍ଦ୍ର ସେଠୀ ପ୍ରମୁଖ ବହୁ ସଂଖ୍ୟକ ଦଳୀୟକର୍ମୀ ଉପସ୍ଥିତ ଥିଲେ। କେନ୍ଦ୍ର ସରକାରଙ୍କ ଘୋଷିତ ଧାନ କିଣ୍ଟାଲ ପ୍ରତି ସର୍ବନିମ୍ନ ସହାୟକ ମୂଲ୍ୟ ୮ ଶହ ଟଙ୍କା ଚାଷୀଙ୍କୁ ପ୍ରଦାନ କରିବା, ଧାନ ମଣ୍ଡିରେ କଟନିଛଟନି ବନ୍ଦ କରିବା, ସମସ୍ତ କୃଷିଜାତ ପଦାର୍ଥର ସର୍ବନିମ୍ନ ସହାୟକ ମୂଲ୍ୟ ପ୍ରଦାନକୁ ଆଇନଗତ ଗ୍ୟାରେଣ୍ଟି ପ୍ରଦାନ କରିବା, ପ୍ରଦୂଷଣ ସାର୍ଟିଫିକେଟ ନାଁରେ ଫାଇନ ଆଦାୟ ବନ୍ଦ କରିବା, ଏମଜିଏନଆରଜିଏସ ଯୋଜନାର ନାଁ ବଦଳାଇ ଶ୍ରମିକମାନଙ୍କୁ ଠକିବା ପାଇଁ ନୂଆ ଯୋଜନାକୁ ବାତିଲ କରିବା ଦାବି କରାଯାଇଛି। ସେହିପରି ଭାଜପା ନେତୃତ୍ୱାଧୀନ କେନ୍ଦ୍ର ଓ ରାଜ୍ୟ ସରକାର ଭୋଟ ପାଇଁ ସାମ୍ପ୍ରଦାୟିକ ବିଦ୍ୱେଷ ସୃଷ୍ଟିକରି ଆଦିବାସୀ,ଦଳିତ,ସଂଖ୍ୟାଲଘୁ,ମହିଳା ଓ ଶିଶୁଙ୍କ ଉପରେ ପାଶବିକ ଅତ୍ୟାଚାର ବନ୍ଦ କରିବା , ଦଳୀୟ ସ୍ବାର୍ଥ ଦୃଷ୍ଟିରୁ ଯୋଗ୍ୟ ଭୋଟରଙ୍କୁ ହଟାଇବା ପାଇଁ ଭୋଟର ତାଲିକା ସଘନ ସଂଶୋଧନ(ଏସଆଇଆର) କୁ ବନ୍ଦ କରିବା, ଟାଟା ପାୱାର ପକ୍ଷରୁ ସ୍ମାର୍ଟ ମିଟର ସଂଯୋଗ ପାଇଁ ବିଦ୍ୟୁତ ଉପଭୋକ୍ତାଙ୍କୁ ବାଧ୍ୟତାମୂଳକ ବ୍ୟବସ୍ଥା ବନ୍ଦ କରିବା, ଶିଳ୍ପାୟନ ଓ ବିକାଶ ନାଁରେ ବେଆଇନ ଉଚ୍ଛେଦ ଓ ବିସ୍ଥାପନ ବନ୍ଦ ସହ ସମସ୍ତ ଯୋଗ୍ୟ ହିତାଧିକାରୀଙ୍କୁ ନିର୍ଦ୍ଧାରିତ ସମୟ ସୀମା ମଧ୍ୟରେ ବାର୍ଦ୍ଧକ୍ୟ,ବିଧବା ଓ ଦିବ୍ୟାଙ୍ଗ ଭତ୍ତା ପ୍ରଦାନ କରିବା, ବାସହୀନଙ୍କୁ ଘର ପଟ୍ଟା ପ୍ରଦାନ ସହ ଗୃହ ଋଣ ପ୍ରଦାନ କରିବା, ସ୍ବାସ୍ଥ୍ୟସେବା କ୍ଷେତ୍ରରେ ବ୍ୟବସାୟକରଣ ବନ୍ଦ କରିବା, ବର୍ଷାଋତୁ ପୂର୍ବରୁ ସମସ୍ତ ଜଳସେଚନ ପ୍ରକଳ୍ପ ,ଜଳାଶୟ ଓ କେନାଲ ଗୁଡ଼ିକର ମରାମତି ଓ ରକ୍ଷଣାବେକ୍ଷଣ କରାଯିବା ପ୍ରଭୃତି ମୌଳିକ ସମସ୍ୟାର ସ୍ଥାୟୀ ସମାଧାନ ପାଇଁ ପ୍ରତିନିଧି ଦଳ ବିଡ଼ିଓ ଅନାମିକା ପାଣ୍ଡେଙ୍କୁ ସାକ୍ଷାତ କରି ଆଲୋଚନା କରିବା ସହ ସମସ୍ତ ଦାବି ପୂରଣ ପାଇଁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦସ୍ତଖତ ସମ୍ବଳିତ ସ୍ମାରକପତ୍ର ପ୍ରଦାନ କରିଛନ୍ତି।
Dharitri – Odisha’s No.1 Odia Daily
