ପାରାଦୀପ,୧୭।୭(ସ୍ବ.ପ୍ର.): କରୋନା ଭୂତାଣୁ ଏବେ ହୁହୁ ହୋଇ ବଢ଼ିଚାଲିଛି। ଫଳରେ ଏହାକୁ ନେଇ ଲୋକଙ୍କ ମଧ୍ୟରେ ଭୟ ବଢ଼ୁଛି। କିନ୍ତୁ ଏହାରି ଭିତରେ ପାରାଦୀପ ମାଛଧରା ବନ୍ଦରରେ ମାଛ ଉତ୍ପାଦନ ଆରମ୍ଭ ହୋଇଛି। ପ୍ରାୟ ୧୧୫ ମାଛଧରା ଟ୍ରଲର ସମୁଦ୍ରକୁ ଗଲାଣି। ଏହିସବୁ ଟ୍ରଲରରେ ୧୧ ଶହରୁ ଅଧିକ ମତ୍ସ୍ୟଜୀବୀ ରହିଛନ୍ତି। ଏହାବାଦ ମାଛ ପ୍ରକ୍ରିୟାକରଣ କାମରେ ପ୍ରାୟ ୨ ହଜାର ଲୋକ କାମ କରୁଛନ୍ତି। ଏହି ସମସ୍ତ ଲୋକଙ୍କ ମଧ୍ୟରୁ ଅଧିକାଂଶ ବାହାର ରାଜ୍ୟରୁ ଆସିଛନ୍ତି। ମାତ୍ର ଯେଉଁମାନେ ବାହାରୁ ଆସିଛନ୍ତି ସେମାନଙ୍କ ପାଇଁ କୋଭିଡ୍-୧୯ ନିୟମ କାମରେ ଲାଗୁନି। ଯଥା-ସେମାନଙ୍କୁ କ୍ୱାରାଣ୍ଟାଇନରେ ରଖାଯାଉନାହିଁ। କୋଭିଡ ଟେଷ୍ଟ ବ୍ୟବସ୍ଥା ମଧ୍ୟ ନାହିଁ। ସମ୍ପୃକ୍ତ ମତ୍ସ୍ୟଜୀବୀଙ୍କୁ ମାଲିକମାନେ ଆଣିବା ପରେ ପାରାଦୀପ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସାଧାରଣ ଜ୍ବର ଟେଷ୍ଟ କରାଇ ସିଧା ମାଛଧରିବା ପାଇଁ ପଠାଉଛନ୍ତି। ଏହାଦ୍ବାରା ସମସ୍ତ ମତ୍ସ୍ୟଜୀବୀ ଓ ସେମାନଙ୍କ ସହିତ ମିଶୁଥିବା ଲୋକଙ୍କ ମନରେ ଅଜଣା ଭୟ ରହୁଛି ବୋଲି ସେଠାକାର ବ୍ୟବସାୟୀ ପ୍ରତାପ ସାହୁ କହିଛନ୍ତି। ଏତଦ୍ବ୍ୟତୀତ ସେଠାରେ ସାପ୍ତାହିକ ଶଟ୍ଡାଉନ ନିୟମ ପାଳନ ହେଉନାହିଁ। କାରଣ ମାଛ ଉତ୍ପାଦନ ପ୍ରକ୍ରିୟା ଅନବରତ ଚାଲିଥାଏ। ଏ ସମ୍ପର୍କରେ ସାମୁଦ୍ରିକ ମତ୍ସ୍ୟ ଅଧିକାରୀ ମଧୁମୟ ସାମଲ କୁହନ୍ତି, ଏଠାରେ କ୍ବାରାଣ୍ଟାଇନ ବ୍ୟବସ୍ଥା ନାହିଁ। ସେମାନେ ସ୍ବାସ୍ଥ୍ୟକେନ୍ଦ୍ରରୁ କ୍ଲିୟରାନ୍ସ ଆଣୁଛନ୍ତି। ଆମ୍ଭର ପ୍ରବେଶ ପଥରେ କେବଳ ଥର୍ମାଲ ସ୍କ୍ରିନିଂ ବ୍ୟବସ୍ଥା କରିଛୁ। ଏଥିରେ ଜ୍ବର ମପାଯାଉଛି। ଆଉ କିଛି ନାହିଁ।
ଇ-ଅଭିଯୋଗ କାମ କରୁନି
ପାରାଦୀପ ମତ୍ସ୍ୟ ବିଭାଗରେ ଏବେବି ପୁରୁଣା ପ୍ରଥା ଚାଲିଛି। ଯଥା: କାର୍ଯ୍ୟାଳୟରେ ଲୋକେ ପୂର୍ବବତ ଯାତାୟାତ, ଟଙ୍କା ଜମା କରିବା, କାଗଜପତ୍ର ପଞ୍ଜୀକରଣ କରିବା ଆଦି କାମ କରୁଛନ୍ତି। ଜିଲାପାଳ କରୋନା ପାଇଁ ସରକାରୀ ଅଫିସ ପ୍ରବେଶ ଉପରେ କଟକଣା ଲଗାଇଛନ୍ତି। କିନ୍ତୁ ଏହି ନିୟମ ଏଠାରେ କାମରେ ଲାଗୁନି। ଏ ପ୍ରସଙ୍ଗରେ ମତ୍ସ୍ୟ ଅଧିକାରୀ ସାମଲ କୁହନ୍ତି ଅଫିସରେ ଇ-ଅଭିଯୋଗ ବ୍ୟବସ୍ଥା ନାହିଁ। ଅନ୍ୟପକ୍ଷରେ ମତ୍ସ୍ୟଜୀବୀମାନେ ମଧ୍ୟ ଅନଲାଇନ କାମ ଜାଣିନାହାନ୍ତି।
