ଲାଞ୍ଜିଗଡ଼,୨୪।୧୦(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକର ପ୍ରତିଯୋଗୀମାନେ ରାଜ୍ୟସ୍ତରୀୟ ୬୧ତମ ବାର୍ଷିକ ସୁଟିଙ୍ଗ ପ୍ରତିଯୋଗିତାରେ ଭାଗ ନେଇ ୪ଟି ସ୍ବର୍ଣ୍ଣ, ୨ଟି ରୌପ୍ୟ ଏବଂ ୩ଟି କାଂଶ୍ୟ ପଦକ ସହ ୯ଟି ପଦକ ହାସଲ କରିଛନ୍ତି I ଅନୁଗୋଳ ଜିଲା ତାଳଚେର ସ୍ଥିତ ରାଜା ହରିଶ୍ଚନ୍ଦ୍ର ଦେବ ସୁଟିଂ କମ୍ପ୍ଲେକ୍ସଠାରେ ଦୁଇଦିନ ଧରି ଏହି ପ୍ରତିଯୋଗିତା ଅନୁଷ୍ଠିତ ହୋଇଥିଲା।
ପ୍ରତିଯୋଗିତାରେ ଓଡ଼ିଶାରୁ ୨୬୫ଜଣ ପ୍ରତିଯୋଗୀ ଭାଗ ନେଇଥିଲେ। ପ୍ରତିଯୋଗିତାରେ ଲାଞ୍ଜିଗଡ଼ ବ୍ଲକରୁ ଭାଗ ନେଇଥିବା ଦେବେନ୍ଦ୍ର ପଧାନଙ୍କୁ ୧୦ ମିଟର ଏଆର୍ ରାଇଫଲରେ ସ୍ବର୍ଣ୍ଣ, ୫୦ ମିଟର ପଏଣ୍ଟ ୨-୨ ରାଇଫଳ ଷ୍ଟାଣ୍ଡିଙ୍ଗରେ ଗୋଟିଏ ସ୍ବର୍ଣ୍ଣ, ବ୍ୟକ୍ତିଗତ ଟ୍ରାପ ସୁଟିଙ୍ଗରେ ଗୋଟିଏ ରୌପ୍ୟ, ଗୋଷ୍ଠୀ ଟ୍ରାପ ସୁଟିଂରେ ଗୋଟିଏ ରୌପ୍ୟ, ୩ପି ପଏଣ୍ଟ ୨-୨ ରାଇଫଲ ସୁଟିଙ୍ଗରେ ଗୋଟିଏ କାଂଶ୍ୟ ଓ ପଏଣ୍ଟ ୨-୨ ରାଇଫଲ ପ୍ରନ ସୁଟିଙ୍ଗରେ ଗୋଟିଏ କାଂଶ୍ୟ, ହେମନ୍ତ ପଧାନଙ୍କୁ କନିଷ୍ଠ ୧୦ ମିଟର ଏଆର ରାଇଫଲ ସୁଟିଙ୍ଗରେ ସ୍ବର୍ଣ୍ଣ, କନିଷ୍ଠ ଟ୍ରାପ ସୁଟିଙ୍ଗରେ କାଂଶ୍ୟ ପଦକ ପାଇଥିବା ବେଳେ ପ୍ରଦୀପ କୁମାର ଘଡେଇଙ୍କୁ ବରିଷ୍ଠ ଟ୍ରାପ ସୁଟିଙ୍ଗ ମାଷ୍ଟରରେ ସ୍ବର୍ଣ୍ଣ ପଦକ ମିଳିଛି I
ପ୍ରତିଯୋଗୀମାନେ ରାଇଫଲ ସୁଟିଙ୍ଗ କୋଚ୍ ବିଜୟ କିଶୋର ପଟ୍ଟନାୟଙ୍କଠାରୁ ପ୍ରଶିକ୍ଷଣ ନେଉଛନ୍ତି। ଅନୁଷ୍ଠିତ ପ୍ରତିଯୋଗିତାରେ ମୁଖ୍ୟ ଅତିଥି ଭାବେ ତାଳଚେର ବିଧାୟକ ବ୍ରଜ କିଶୋର ପ୍ରଧାନ ଉପସ୍ଥିତ ରହି ପ୍ରତଯୋଗୀତାରେ ଭାଗ ନେଇ ବିଜୟ ଲାଭ କରିଥିବା କୃତି ପ୍ରତିଯୋଗୀଙ୍କୁ ପୁରସ୍କୃତ କରିଥିଲେ I ୩ ପ୍ରତିଯୋଗୀ ୯ଟି ପଦକ ହାସଲ କରିଥିବା ବେଳେ କଳାହାଣ୍ଡି ଜିଲା ଓ ଲାଞ୍ଜିଗଡ ବ୍ଲକକୁ ଗୌରାନିତ୍ୱ କରିଛନ୍ତି। ଏନେଇ ଅଞ୍ଚଳରେ ଖୁସିର ଲହର ଖେଳିଯାଇଛି।
