ନୂଆଦିଲ୍ଲୀ,୮ା୧୦: ଭାରତ ସମେତ ସାରା ବିଶ୍ୱରେ ଦାରିଦ୍ର୍ୟ ହ୍ରାସର ଧାରାକୁ କୋଭିଡ୍-୧୯ ମହାମାରୀ ବଦଳାଇଦେଇଛି। ୨୦୨୦ରେ ଭାରତରେ ଦାରିଦ୍ର୍ୟ ସଂଖ୍ୟା ୨.୩ରୁ ୫.୬ କୋଟି ମଧ୍ୟରେ ବୃଦ୍ଧି ପାଇଥିବା ବିଶ୍ୱବ୍ୟାଙ୍କର ନୂଆ ରିପୋର୍ଟରୁ ଜଣାପଡ଼ିଛି। ୧୯୯୮ରୁ ବିଶ୍ୱସ୍ତରରେ ଦାରିଦ୍ର୍ୟ ହ୍ରାସ ପାଇବା ଆରମ୍ଭ କରିଥିବାବେଳେ ୨୦୨୦ରେ ପ୍ରଥମ ଥର ପାଇଁ ଏହା ବୃଦ୍ଧି ପାଇଥିଲା। ଭାରତରେ ୨୦୧୧ରୁ ଗରିବୀ କମିବା ଆରମ୍ଭ ଧାରା ୨୦୨୦ରେ ପ୍ରଥମ ଥର ପାଇଁ ବିପରୀତମୁଖୀ ହୋଇଥିବା ରିପୋର୍ଟରେ କୁହାଯାଇଛି।
ବିଶ୍ୱବ୍ୟାଙ୍କର ‘ଦାରିଦ୍ର୍ୟ ଓ ଭାଗୀଦାରି ସମୃଦ୍ଧି ୨୦୨୨’ ରିପୋର୍ଟ ଅନୁଯାୟୀ ୨୦୨୦ରେ ଅତ୍ୟଧିକ ଦାରିଦ୍ର୍ୟ (ଯେଉଁମାନଙ୍କ ଦୈନିକ ଖର୍ଚ୍ଚ ୧୭୭ ଟଙ୍କାରୁ କମ୍) ୯.୩ ପ୍ରତିଶତକୁ ବୃଦ୍ଧି ପାଇଛି। ୨୦୧୯ରେ ଏହା ୮.୪ ପ୍ରତିଶତ ରହିଥିଲା। ଅର୍ଥାତ୍ ବିଶ୍ୱସ୍ତରରେ ଗରିବଙ୍କ ସଂଖ୍ୟା ୭.୧ କୋଟି ବଢ଼ିଛି, ଯେଉଁଥିରୁ ୩୩ରୁ ୮୦ ପ୍ରତିଶତ ଭାରତରେ ରହିଛନ୍ତି। ଭାରତଠାରୁ ଚାଇନା ଜନସଂଖ୍ୟା ଅଧିକ ହୋଇଥିଲେ ମଧ୍ୟ ବିଶ୍ୱ ଦାରିଦ୍ର୍ୟ ବୃଦ୍ଧିରେ ଏହାର ଭାଗ ଯଥେଷ୍ଟ କମ୍ ରହିଛି। ୨୦୨୦ରେ ଭାରତରେ ଦାରିଦ୍ର୍ୟ କେତେ ବଢ଼ିଛି, ତାହା ସରକାରଙ୍କ ପକ୍ଷରୁ ଆକଳନ କରାଯାଇ ନାହିଁ। ତେଣୁ ବିଶ୍ୱବ୍ୟାଙ୍କ ଦାରିଦ୍ର୍ୟ ଆକଳନ ଲାଗି ବିଭିନ୍ନ ପଦ୍ଧତି ଆପଣାଇଛି। ଭାରତର ଜାତୀୟ ଆକାଉଣ୍ଟସ୍ ଆଧାରରେ ହୋଇଥିବା ଆକଳନ ଅନୁଯାୟୀ ୨୦୨୦ରେ ଦାରିଦ୍ର୍ୟ ସଂଖ୍ୟା ୨.୩ କୋଟି ବଢ଼ିଛି। ଅନ୍ୟପକ୍ଷରେ ଘରୋଇ ଡାଟା କମ୍ପାନୀ ସେଣ୍ଟର ଫର୍ ମନିଟରିଂ ଇଣ୍ଡିଆନ୍ ଇକୋନୋମି (ସିଏମ୍ଆଇଇ)ର ସର୍ଭେ ଆଧାରରେ ହୋଇଥିବା ଆକଳନରୁ ଦେଶରେ ଦାରିଦ୍ର୍ୟ ୫.୬ କୋଟି ବଢ଼ିଥିବା କୁହାଯାଇଛି।
୨୦୧୧ରୁ ଭାରତର ଗ୍ରାମାଞ୍ଚଳରେ ଦାରିଦ୍ର୍ୟ ଯଥେଷ୍ଟ ହ୍ରାସ ପାଇବା ଆରମ୍ଭ ହୋଇଥିଲା। ୨୦୧୭ରେ ବିଶ୍ୱବ୍ୟାଙ୍କର ଏକ ଆକଳନ ଅନୁଯାୟୀ ଭାରତରେ ୧୩.୬ ପ୍ରତିଶତ ଲୋକ ଅତ୍ୟଧିକ ଦାରିଦ୍ର୍ୟ ମଧ୍ୟରେ ରହିଥିଲେ, ଯେଉଁମାନଙ୍କ ଦୈନିକ ଖର୍ଚ୍ଚ ୧୫୬ ଟଙ୍କା ୩୪ ପଇସାରୁ କମ୍ ଥିଲା। ୨୦୧୯ରୁ ଅତ୍ୟଧିକ ଦାରିଦ୍ର୍ୟ ବ୍ୟକ୍ତିଙ୍କ ଦୈନିକ ଖର୍ଚ୍ଚ ସୀମା ୧୭୭ ଟଙ୍କା ଧାର୍ଯ୍ୟ ହୋଇଥିଲା। ସେହି ଅନୁଯାୟୀ ୨୦୧୯-୨୦ ବର୍ଷରେ ଭାରତରେ ଦାରିଦ୍ର୍ୟ ହାର ୧୦ ପ୍ରତିଶତ ରହିଥିଲା। ସେହି ସମୟରେ ଗ୍ରାମାଞ୍ଚଳରେ ଦାରିଦ୍ର୍ୟ ହାର ୧୨% ଏବଂ ସହରାଞ୍ଚଳରେ ୬% ଥିଲା।
