ଶେରଗଡ଼,୨୭।୬(ଡି.ଏନ୍.ଏ.): ଗଞ୍ଜାମ ଜିଲା ଶେରଗଡ଼ ବ୍ଲକ ୨୨ଟି ପଞ୍ଚାୟତକୁ ନେଇ ଗଠିତ। କରୋନା ମୁକିବିଲା ନେଇ ରାଜ୍ୟ ସରକାରଙ୍କ ପକ୍ଷରୁ ଯେଉଁସବୁ ନିର୍ଦ୍ଦେଶନାମା ରହିଛି ତାକୁ ଶେରଗଡ଼ ବ୍ଲକରେ ପାଳନ କରାଯାଉଛି। ଏହି ପରିପ୍ରେକ୍ଷୀରେ ଶନିବାର ବ୍ଲକର ସମସ୍ତ ଗ୍ରାମପଞ୍ଚାୟତରେ କୋଭିଡ୍ କେୟାର ହୋମ୍ ଆରମ୍ଭ କରାଯାଇଛି। ପ୍ରତି ପଞ୍ଚାୟତରେ ୧୦ଜଣ ଲୋକଙ୍କ ପାଇଁ ଏହି ବ୍ୟବସ୍ଥା କରାଯାଇଛି। ମହୁପଦର ଓ ଶେରଗଡ଼ ପଞ୍ଚାୟତ ଆମ୍ବୁଆବାଡ଼ି ଗ୍ରାମ ଛକରେ ଥିବା ଏକ ସରକାରୀ କୋଠାରେ ଏହି ବ୍ୟବସ୍ଥା ଆରମ୍ଭ ହୋଇଥିବା ବେଳେ ଅନ୍ୟ ୨୦ଟି ପଞ୍ଚାୟତରେ ରାଜୀବସେବା କେନ୍ଦ୍ରଗୁଡ଼ିକରେ କେୟାର ହୋମ୍ ବ୍ୟବସ୍ଥା କରାଯାଇଛି। ପ୍ରତି କେନ୍ଦ୍ରରେ ସମସ୍ତ ଆନୁସଙ୍ଗିକ ବ୍ୟବସ୍ଥା ସହ ଜଣେ ଏଏନ୍ଏମ୍, ଜଣେ ଶିକ୍ଷକ, ଜଣେ ଅଙ୍ଗନବାଡି କର୍ମୀ, ଜଣେ ଫାର୍ମାସିଷ୍ଟ ରହି କାର୍ଯ୍ୟ ତଦାରଖ କରିବେ। ଏହା ସମ୍ପୃକ୍ତ ପଞ୍ଚାୟତର ଗ୍ରାମ ସେବକ ବା ନୋଡାଲ ଅଧିକାରୀଙ୍କ ତତ୍ତ୍ୱାବଧାନରେ ପରିଚାଳନା ହେବ। ପଞ୍ଚାୟତ ପାଣ୍ଠି ବା ସରକାରଙ୍କ ଦ୍ବାରା ଦିଆଯାଇଥିବା ୧୦ହଜାରରୁ ଏହି ଖର୍ଚ୍ଚ ଭରଣା କରାଯିବ। ପ୍ରତି ପଞ୍ଚାୟତର ସରପଞ୍ଚ ନିଜ ପଞ୍ଚାୟତକୁ ଫେରୁଥିବା ପ୍ରବାସୀଙ୍କୁ ଉପଯୁକ୍ତ ଯାଞ୍ଚ ପରେ କରୋନା ରୋଗୀଙ୍କୁ ଉକ୍ତ ପଞ୍ଚାୟତ କୋଭିଡ୍ କେୟାର ହୋମରେ ରଖିବେ। ଏହାକୁ ବଡିଓ ସୁରଞ୍ଜନ କୁମାର ସାହୁ ଶନିବାର ଦିନ ପରିଦର୍ଶନ କରିବା ସହ ପଞ୍ଚାୟତର ସରପଞ୍ଚ ଓ ଗ୍ରାମ ସେବକମାନଙ୍କ ସହ କଥାବାର୍ତ୍ତା ହୋଇ ଆସିଛନ୍ତି।
