ବରଗଡ଼ ଅଫିସ,୩ା୧୦: ବରଗଡ଼ ଟାଉନ ଥାନା ପୋଲିସ ସ୍ଥାନୀୟ ଗୋରୁ ମାର୍କେଟ ଅଞ୍ଚଳରୁ ବିପୁଳ ପରିମାଣରେ କଫ୍ ସିରପ ଜବତ କରିଛି। ଏହା ସହିତ ଏହି କାରବାରରେ ବ୍ୟବହୃତ ୨ଟି ୪ଚକିଆ ଗାଡ଼ିକୁ ଜବତ କରିବା ସହିତ ୫ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ, ବଲାଙ୍ଗୀର କଂସାରିପଡ଼ାର ସନ୍ତୋଷ କୁମାର ମେହେର, ଭାଲେର ଗ୍ରାମର ଶ୍ରୀକାନ୍ତ ନାୟକ, ବରଗଡ଼ ପୌର ପରିଷଦ ଅଧୀନ ଓ୍ବାର୍ଡ ନଂ ଓଆର ୧୧ର ଏମ୍ଡି ନିଶାଦ, ନୌସଦ ଖାଁ ଓ ସରୋଜ ଭୁଏ। ସେମାନଙ୍କ ପାଖରୁ ୧୧୭୦ ବୋତଲ କଫ୍ ସିରପ, ୨ଟି ଜାରକିନରେ ରହିଥିବା ମିଶ୍ରିତ କଫ୍ ସିରପ, ୫ ଷ୍ଟ୍ରିପ ନିଶା ବଟିକା ଜବତ ହୋଇଛି। ଅଭିଯୁକ୍ତମାନେ ଶୁକ୍ରବାର ବିଳମ୍ବିତ ରାତ୍ରିରେ ଗୋରୁ ମାର୍କେଟ ଅଞ୍ଚଳରେ କଫ୍ ସିରପ ଚାଲାଣ କାରବାର କରୁଥିବା ସମୟରେ ପୋଲିସ ସୂଚନା ପାଇ ସେମାନଙ୍କୁ ଗିରଫ କରିବା ସହିତ ସେମାନଙ୍କ ନିକଟରୁ ୨ଟି ଗାଡ଼ି ଜବତ କରିଥିବା ଟାଉନ ଥାନା ଆଇଆଇସି ସଦାନନ୍ଦ ପୂଜାହାରୀ ସୂଚନା ଦେଇଛନ୍ତି। ଏ ନେଇ ବରଗଡ଼ ଟାଉନ ଥାନାରେ କେସ୍ ନଂ ୪୧୨/୨୦ରେ ଏକ ମାମଲା ରୁଜୁ ହୋଇଛି।
