ଯାଜପୁର ଅଫିସ୍,୨୫।୯: ରିଲିଫ୍ ଚାଉଳ ହଡ଼ପ କରାଯାଇଥିବା ନେଇ ଜିଲାପାଳଙ୍କୁ ଅଭିଯୋଗ ହେବାର ଗୋଟିଏ ଦିନ ପରେ ଦୁର୍ନୀତିଗ୍ରସ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପରିବର୍ତ୍ତେ ଯାଜପୁର ବ୍ଲକ ଏରାବାଙ୍କ ପଞ୍ଚାୟତ ନିର୍ବାହୀ ଅଧିକାରୀ(ପିଇଓ) ବିପନ୍ନ ପରିବାରକୁ ନୋଟିସ୍ ଜାରି କରିଛନ୍ତି। ନୋଟିସରେ ଦର୍ଶାଯାଇଛି ଯେ, ୩ ଜଣ ଗୃହକର୍ତ୍ତାଙ୍କ ନାମରେ ଆସିଥିବା ରିଲିଫ୍ ଚାଉଳ ଓ ସହାୟତା ଅର୍ଥରାଶି ୨୫ ତାରିଖ ପର୍ଯ୍ୟନ୍ତ ପଞ୍ଚାୟତ କାର୍ଯ୍ୟାଳୟରେ ଗଚ୍ଛିତ ରହିବ। ଏହି ସମୟ ମଧ୍ୟରେ ରିଲିଫ୍ ସାମଗ୍ରୀ ନ ନଲେ ଏହା ବ୍ଲକ କାର୍ଯ୍ୟାଳୟକୁ ଫେରସ୍ତ କରାଯିବ ବୋଲି ନୋଟିସ୍ରେ ଦର୍ଶାଯାଇଥିବା ଗୁରୁଚରଣ ଜେନା ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଗତ ୧୮ ତାରିଖରେ ଯାଜପୁର ବ୍ଲକ ଏରବାଙ୍କ ପଞ୍ଚାୟତର ଇନ୍ଦାରୋଇ ଗ୍ରାମରେ ରିଲିଫ ଚାଉଳ ବଣ୍ଟନ କରାଯାଉଥିଲା। ୨ଜଣ ସ୍କୁଲ ଶିକ୍ଷକଙ୍କ ଉପସ୍ଥିତିରେ ଚାଉଳ ବଣ୍ଟନ କରାଯାଉଥିବା ବେଳେ ମୁଣ୍ଡପିଛା ୩ କିଲୋଗ୍ରାମ ଲେଖାଏଁ ଚାଉଳ ଏବଂ ୧୦ ଟଙ୍କା ଲେଖାଏଁ ଆଦାୟ କରାଯାଉଥିଲା। ଏହାକୁ ଗ୍ରାମବାସୀ ବିରୋଧ କରିଥିଲେ। ହେଲେ ପ୍ରତିବାଦକାରୀଙ୍କୁ ଧମକ ଦିଆଯାଇ ଚାଉଳ ନିଅ ନ ହେଲେ ଫେରାଇ ଦିଆଯିବ ବୋଲି କୁହାଯାଇଥିଲା। ଏହାସହ ରିଲିଫ ଚାଉଳ ହାତେଇବାକୁ ଏକାଠି ରହୁଥିବା ପରିବାରଙ୍କୁ ବାପ ଓ ପୁଅ ନାମରେ ୨ ଭାଗ କରାଯାଇ ହିତାଧିକାରୀ ପ୍ରସ୍ତୁତ କରାଯାଇଛି। ଏଥିଯୋଗୁ ବାସ୍ତବ ବନ୍ୟା ବିପନ୍ନମାନଙ୍କ ନାମ ତାଲିକାରେ ନ ଥିବା ଅଭିଯୋଗ ହୋଇଥିଲା। ଯାଜପୁର ଜିଲାପାଳ ଆଇଏଏସ୍ ପ୍ରବେସନର ସଚିନ ପାୱାରଙ୍କୁ ଏହାର ତଦନ୍ତ ଦାୟିତ୍ୱ ଦେଇଥିଲେ। ସେ ଗତ ୨୩ ତାରିଖରେ ଇନ୍ଦାରୋଇ ଗ୍ରାମକୁ ଯାଇ ତଦନ୍ତ କରି ଫେରିଛନ୍ତି। ଏ ଦିଗରେ କୌଣସି ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯାଇ ନ ଥିବାବେଳେ ଗୁରୁବାର ସେହି ପଞ୍ଚାୟତର ପିଇଓ ଇନ୍ଦାରୋଇ ଗ୍ରାମକୁ ଯାଇ ଏକ କାଗଜରେ ଦସ୍ତଖତ କରିବାକୁ ଅଭିଯୋଗକାରୀମାନଙ୍କୁ କହିଥିଲେ। ସେମାନେ ମନା କରିବାରୁ ସେହି ଗ୍ରାମର ଅନ୍ୟ ୨ ଜଣଙ୍କୁ ସାକ୍ଷୀ ରଖି ଅଭିଯୋଗକାରୀମାନେ ଦସ୍ତଖତ କଲେନାହିଁ ବୋଲି ଦସ୍ତଖତ ନେଇ ଫେରିଥିବା ଜଣାପଡିଛି। ଏ ସଂକ୍ରାନ୍ତରେ ଜିଲା ଯୋଗାଣ ବିଭାଗ ଏସିଏସ୍ଓ ପ୍ରହ୍ଲାଦ ସେଠୀଙ୍କୁ ପଚାରିବାରେ ପଞ୍ଚାୟତଗୁଡ଼ିକୁ ରିଲିଫ ଚାଉଳ ବଣ୍ଟନ ଦାୟିତ୍ୱ ଦିଆଯାଇଛି। ଇନ୍ଦାରୋଇ ଦୁର୍ନୀତି ଅଭିଯୋଗ ଉପରେ ଜିଲାପାଳ ତଦନ୍ତ କରୁଛନ୍ତି।
