କୋରାପୁଟ,୨ା୯(ସ୍ବ.ପ୍ର.): ଜିଲାରେ ବୁଧବାର ପୁଣି ୮୯ ଜଣ ପଜିଟିଭ୍ ଚିହ୍ନଟ ହୋଇଥିବା ଜଣାଯାଇଛି। ଆକ୍ରାନ୍ତମାନଙ୍କ ମଧ୍ୟରୁ ୬୧ ପୁରୁଷ ଏବଂ ୨୮ ମହିଳା ଅଛନ୍ତି। ଏହାକୁ ମିଶାଇ ଜିଲାରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୩,୬୯୭କୁ ବୃଦ୍ଧିପାଇଛି। କୋରାପୁଟ ଭାରତୀୟ ଷ୍ଟେଟ୍ ବ୍ୟାଙ୍କ ଶାଖାରେ କିଛି କର୍ମଚାରୀ କରୋନା ପଜିଟିଭ୍ ଚିହ୍ନଟ ହେବା ପରେ ଗତ ସୋମବାରଠାରୁ ଏହି ଶାଖାକୁ ବନ୍ଦ କରିଦିଆଯାଇଛି। ବୁଧବାର ଚିହ୍ନଟ ପଜିଟିଭ୍ଙ୍କ ମଧ୍ୟରେ ଟିଏମ୍ସିରୁ ୮ ଜଣ ପୂର୍ବରୁ ପଜିଟିଭ୍ଙ୍କ ସଂସ୍ପର୍ଶରେ ଆସି ୫୩ ଜଣ ଓ ୨୮ଜଣ ସ୍ଥାନୀୟ ସଂକ୍ରମିତ ରହିଛନ୍ତି। ଏମାନଙ୍କ ମଧ୍ୟରୁ ୪ ଜଣ ଆନ୍ଧ୍ରପ୍ରଦେଶ ଫେରନ୍ତା ହୋଇଥିବା ବେଳେ ମାଲକାନଗିରି, ମହାରାଷ୍ଟ୍ର, ନବରଙ୍ଗପୁର ଏବଂ ଗଞ୍ଜାମରୁ ଜଣେ ଲେଖାଏ ଫେରନ୍ତା ରହିଛନ୍ତି। ଜିଲାର ୪ଟି ପୌରାଞ୍ଚଳରୁ ଚିହ୍ନଟ ୪୩ ଜଣଙ୍କ ମଧ୍ୟରେ ଜୟପୁର ମ୍ୟୁନିସିପାଲଟିରୁ ୭, କୋରାପୁଟ ମ୍ୟୁନିସପାଲଟିରୁ ୬, ସୁନାବେଡ଼ା ମ୍ୟୁନିସିପାଲଟି ଅଞ୍ଚଳରୁ ୨୧ ଓ କୋଟପାଡ଼ ଏନ୍ଏସିରୁ ୯ ଜଣ ରହିଛନ୍ତି। ସେହିପରି ଗ୍ରାମାଞ୍ଚଳରୁ ଚିହ୍ନଟ ହୋଇଥିବା ୪୬ଜଣଙ୍କ ମଧ୍ୟରେ କୋରାପୁଟ ବ୍ଲକ ଅଞ୍ଚଳରୁ ୪, ବନ୍ଧୁଗାଁ ବ୍ଲକର ବିକ୍ରମପୁରରୁ ୫, ବୈପାରୀଗୁଡା ବ୍ଲକ ଅଞ୍ଚଳରୁ ୩, ଦଶମନ୍ତପୁର ବ୍ଲକ ଅଞ୍ଚଳରୁ ଜଣେ, କୋଟପାଡ଼ ବ୍ଲକର ଅଞ୍ଚଳରୁ ୪, କୁନ୍ଦ୍ରା ୬, ଲମତାପୁଟରୁ ୬, ଲକ୍ଷ୍ମୀପୁରରୁ ୧୦ଜଣ, ନାରାୟଣପାଟଣାରୁ ୨, ସେମିଳିଗୁଡ଼ାରୁ ୫ ଜଣ ପଜିଟିଭ୍ ଚିହ୍ନଟ ହୋଇଥିବା ଜଣାଯାଇଛି। ସ୍ବାବ୍ ଦେଉଥିବା ବ୍ୟକ୍ତିମାନେ ଘରେ ରହିବାକୁ ଜିଲାପାଳ ପରାମର୍ଶ ଦେଇଛନ୍ତି। ସେହିଭଳି ସମସ୍ତ ଜିଲାବାସୀଙ୍କୁ ମାସ୍କ ବ୍ୟବହାର, ସାମାଜିକ ଦୂରତା ଅବଲମ୍ବନ କରିବା, କୋଭିଡ୍ର ଏସ୍ଓପି ମାନିବାକୁ ଜିଲାପାଳ ପୁଣିଥରେ ପରାମର୍ଶ ଦେଇଛନ୍ତି। ନଚେତ୍ ସେମାନଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
