ଭୋପାଳ,୩୦ା୭: ମଧ୍ୟପ୍ରଦେଶର ସିହୋର ଜିଲାର ବୁଦ୍ଧନୀ ସ୍ବାସ୍ଥ୍ୟ ବିଭାଗର ବେପରୁଆ ନୀତି ସାମ୍ନାକୁ ଆସିଛି। ଜଣେ କରୋନା ରୋଗୀ ଆମ୍ବୁଲାନ୍ସ ଡାକିଥିଲେ ମଧ୍ୟ ନ ଆସିବାରୁ ନିଜେ ବାଇକ୍ ଚଲାଇ ହସ୍ପିଟାଲରେ ପହଞ୍ଚିବା ଘଟଣା ବେଶ୍ ଚର୍ଚ୍ଚା ହେଉଛି।
ହୋଶଙ୍ଗାବାଦ ଜିଲାର ଜଣେ ଯୁବକ କରୋନା ପରୀକ୍ଷା ବୁଦ୍ଧନୀରେ କରାଇଥିଲେ। ପରେ ତାଙ୍କର ପଜିଟିଭ୍ ଆସିଥିଲା। ସ୍ବାସ୍ଥ୍ୟ ବିଭାଗ ରିପୋର୍ଟ ଆଣିବା ପାଇଁ କୋଭିଡ୍ ସେଣ୍ଟରକୁ ଯିବା ପାଇଁ ଡାକି ପିପିଇ କିଟ୍ ଦେଇଥିଲା। ମାତ୍ର ଦୀର୍ଘ ସମୟ ଅପେକ୍ଷା କରିଥିଲେ ମଧ୍ୟ ଆମ୍ବୁଲାନ୍ସ ଆସି ନ ଥିଲା। ତେଣୁ ଯୁବକ ଜଣକ ପିପିଇ କିଟ୍ ପିନ୍ଧି ନଜର ବାଇକ୍ ଚଲାଇ ହସ୍ପିଟାଲ ପଳାଇଲେ।
ଏହି ଘଟଣା ସିସିଟିଭିରେ କଏଦ ହେବା ପରେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ଭାଇରାଲ ହୋଇଥିବା ଭିଡିଓରେ ଯୁବକ ଜଣକ ପିପିଇ କିଟ୍ ପିନ୍ଧି ନିଜ ବାଇକ୍ରେ ଯାଉଥିବା ନଜର ଆସିଛନ୍ତି।
ସୂଚନାଯୋଗ୍ୟ, ସିହୋର ଜିଲା ବୁଦ୍ଧନୀର ହୋଶଙ୍ଗାବାଦ ଜିଲାର ଆନନ୍ଦନଗର ନିକଟରେ ରହୁଥିବା ଯୁବକ ଜଣକ କରୋନା ଆକ୍ରାନ୍ତ ହୋଇଥିଲେ। ରବିବାର ତାଙ୍କର ନମୁନା ପରୀକ୍ଷା ପାଇଁ ଦେଇଥିଲେ। ମଙ୍ଗଳବାର ସକାଳେ ତାଙ୍କ ରିପୋର୍ଟ ପଜିଟିଭ୍ ଆସିଥିଲା।
