କଟକ ଅଫିସ,୯। ୮: ଏସ୍ସିବି ଆଇସୋଲେଶନ ୱାର୍ଡରେ ଚିକିତ୍ସା ଅବହେଳାରୁ ଜଣେ କରୋନା ଆକ୍ରାନ୍ତଙ୍କ ମତ୍ୟୁ ଘଟିଥିବା ଅଭିଯୋଗ ହୋଇଛି। ତାଙ୍କର ଡାଏଲିସିସ୍ କରାଗଲା ନାହିଁ କି ଆବଶ୍ୟକ ଚିକିତ୍ସା ମଧ୍ୟ ଦିଆଗଲା ନାହିଁ ବୋଲି ପରିବାର ଲୋକେ କହିଛନ୍ତି। ମୃତ୍ୟୁ ପରେ ଏସ୍ସିବି ମେଡିକାଲ ଫାଣ୍ଡିରେ ଅଭିଯୋଗ କରାଯିବାରୁ ପୋଲିସ ଏତଲା ନେଲାନାହିଁ ବୋଲି ମୃତକଙ୍କ ବଡ଼ଭଉଣୀ ଅଭିଯୋଗ କରିଛନ୍ତି।
ସୂଚନା ଅନୁଯାୟୀ, ଗତ ୫ ତାରିଖ ଜଗତ୍ସିଂହପୁର ଜିଲା ବାଗଲପୁର ଗ୍ରାମର ସୁଶାନ୍ତ ଦାସ (୨୦)ଙ୍କୁ ଏସ୍ସିବି କାଜୁଆଲିଟିକୁ ଅଣାଯାଇଥିଲା। ଆଣ୍ଟିଜେନ ଟେଷ୍ଟ ରିପୋର୍ଟ ପଜିଟିଭ ଆସିବାରୁ ତାଙ୍କୁ ଆଇସୋଲେଶନ ୱାର୍ଡରେ ରଖାଗଲା। ସୁଶାନ୍ତ ଜଣେ ପୁରୁଣା କିଡ୍ନୀ ରୋଗୀ ହୋଇଥିବାରୁ ଗତ ୧ ତାରିଖ ଏସ୍ସିବିରେ କରୋନା ଟେଷ୍ଟ ପରେ ଡାଏଲିସିସ୍ କରାଇ ଘରକୁ ଫେରିଥିଲେ। ସପ୍ତାହକୁ ୨ଥର ଡାଏଲିସିସ କରାଯିବା କଥା। ଗତ ୫ ତାରିଖ ସେ ଏସ୍ସିବିରେ ଭର୍ତ୍ତି ହେବା ଦିନ ହିଁ ଡାଏଲିସିସ୍ ହେବାର ଥିଲେ ମଧ୍ୟ ତାହା ୨ ଦିନ ଯାଏ ହୋଇ ନ ଥିବା ପରିବାର ଲୋକ ଅଭିଯୋଗ କରିଛନ୍ତି। ଫଳରେ ସୁଶାନ୍ତଙ୍କ ପେଟ ଫୁଲିଯାଇ ଅବସ୍ଥା ଗୁରୁତର ହେବାରୁ ପରିବାର ଲୋକେ ତାଙ୍କ ପାଖରେ ରହିବାକୁ ଅନୁରୋଧ କରିଥିଲେ ମଧ୍ୟ ଡାକ୍ତର ଅନୁମତି ଦେଲେନାହିଁ। ଶୁକ୍ରବାର ରାତିରେ ସୁଶାନ୍ତ ବାଥ୍ରୁମ୍ ଯାଇଥିବା ବେଳେ ସେଇଠାରେ ହିଁ ପଡ଼ିଯାଇଥିଲେ। ଖବର ପାଇ ତାଙ୍କ ଭାଇ ହସ୍ପିଟାଲ ଷ୍ଟାଫ୍ଙ୍କଠାରୁ ପିପିଇ କିଟ୍ ମାଗି ସୁଶାନ୍ତଙ୍କ ପାଖରେ ପହଞ୍ଚତ୍ଲା ବେଳକୁ ତାଙ୍କର ମୃତ୍ୟୁ ହୋଇସାରିଥିବା ପରିବାର ଲୋକେ କହିଛନ୍ତି। ଏନେଇ ନେଫ୍ରୋଲୋଜି ବିଭାଗର ଡା. ଚିତ୍ତରଞ୍ଜନ କର କହିଛନ୍ତି, ରୋଗୀ ଜଣକ ହେପାଟାଇଟିସ୍ ସି ପଜିଟିଭ ସାଙ୍ଗକୁ ଜଣେ କ୍ରନିକ କିଡ୍ନୀ ପେସେଣ୍ଟ ହୋଇଥିବା ବେଳେ କରୋନା ପଜିଟିଭ ମଧ୍ୟ ଥିଲେ। ତେଣୁ ପରିବାର ଲୋକେ ତାଙ୍କୁ ଘରୋଇ ହସ୍ପିଟାଲକୁ ନେବେ କି ନା, ଦ୍ୱନ୍ଦ୍ୱରେ ଥିଲେ। ସେଥିପାଇଁ କାଗଜପତ୍ର ପ୍ରକ୍ରିୟା ଠିକ୍ ସମୟରେ ସେମାନେ କରିପାରି ନ ଥିଲେ କିମ୍ବା ଠିକ୍ ସମୟରେ ଡାଇଲିସିସ୍ ପାଇଁ ଆଣିପାରି ନ ଥିଲେ। ଅନ୍ୟପକ୍ଷରେ ଶନିବାର ହସ୍ପିଟାଲ ପକ୍ଷରୁ ପରିବାର ଲୋକଙ୍କ ଉପସ୍ଥିତିରେ କଟକ ମହାନଗର ନିଗମକୁ ସଂସ୍କାର ପାଇଁ ମୃତଦେହ ହସ୍ତାନ୍ତର କରାଯାଇଛି।
