ନୂଆଦିଲ୍ଲୀ, ୧୮।୪ : କ୍ରମାଗତ ୧୧ ସପ୍ତାହ ହ୍ରାସ ପରେ, ଭାରତରେ ପୁଣିଥରେ ଚଳିତ ସପ୍ତାହରେ କରୋନା ସଂକ୍ରମଣ ମାମଲାରେ ବୃଦ୍ଧି ଘଟିଛି। ଦିଲ୍ଲୀ, ହରିୟାଣା, ଉତ୍ତରପ୍ରଦେଶ ଏବଂ ଏହାର ଆଖପାଖ ରାଜ୍ୟରେ ଗତ ସାତ ଦିନ ମଧ୍ୟରେ ସଂକ୍ରମଣରେ ୩୫ ପ୍ରତିଶତ ବୃଦ୍ଧି ହୋଇଛି।
ଏହି ବୃଦ୍ଧି ତିନିଟି ରାଜ୍ୟରେ ସୀମିତ ରହିଛି। କିନ୍ତୁ ବୃଦ୍ଧି ପାଉଥିବା ସଂଖ୍ୟା ସରକାରଙ୍କ ଚିନ୍ତା ବଢ଼ାଇଛି। ଟାଇମ୍ସ ଅଫ ଇଣ୍ଡିଆର କୋଭିଡ୍ ଡାଟାବେସ ଅନୁଯାୟୀ, ରବିବାର (ଏପ୍ରିଲ ୧୧-୧୭) ଶେଷ ହୋଇଥିବା ସପ୍ତାହରେ ଭାରତରେ ୬,୬୧୦ଟି ନୂଆ ମାମଲା ରିପୋର୍ଟ ହୋଇଛି। ଯାହା ଗତ ସାତ ଦିନ ତଳର ୪,୯୦୦ ତୁଳନାରେ ଅଧିକ ରହିଛି।
ଏହା ପୂର୍ବରୁ ଗତ ସପ୍ତାହରେ ପ୍ରାୟ ୭,୦୧୦ ମାମଲା ପଞ୍ଜିକୃତ ହୋଇଥିଲା। କିନ୍ତୁ ଏଥର ତାଲିକାରେ କେରଳର ଆକଳନ ଅନ୍ତର୍ଭୁକ୍ତ ନାହିଁ। କାରଣ ରାଜ୍ୟ ଚଳିତ ସପ୍ତାହରୁ କୋଭିଡ ତଥ୍ୟ ପ୍ରକାଶ କରିବା ବନ୍ଦ କରି ଦେଇଛି। ଗତ ସପ୍ତାହରେ (ଏପ୍ରିଲ ୪-୧୦) କେରଳରେ ୨,୧୮୫ ମାମଲା ରିପୋର୍ଟ କରିଥିଲା।
ଦେଶରେ ଦୈନିକ ମୃତ୍ୟୁ ସଂଖ୍ୟା ହ୍ରାସ ପାଇବାରେ ଲାଗିଛି। ସପ୍ତାହରେ କେବଳ ୨୭ ଜଣ ଆକ୍ରାନ୍ତଙ୍କ ମୃତ୍ୟୁ ରେକର୍ଡ ହୋଇଛି। ଯାହା ୨୦୨୦ ମାର୍ଚ୍ଚ ୨୩-୨୯ ପରଠାରୁ ଦୁଇ ବର୍ଷ ମଧ୍ୟରେ ସର୍ବନିମ୍ନ। ଗତ ସପ୍ତାହରେ ସମୁଦାୟ ୫୪ ଜଣଙ୍କର ମୃତ୍ୟୁ ହୋଇଥିବା ଜଣାଯାଇଛି। ଯେଉଁଥିରୁ ୧୩ ଜଣ କେରଳରୁ ଥିଲେ।
ସଂକ୍ରମଣରେ ବୃଦ୍ଧି ଘଟିଥିବା ସମସ୍ତ ତିନୋଟି ରାଜ୍ୟରେ ଏକ ସପ୍ତାହ ମଧ୍ୟରେ ନୂଆ ଆକ୍ରାନ୍ତଙ୍କ ସଂଖ୍ୟା ଦୁଇଗୁଣରୁ ଅଧିକ ହୋଇଛି। ଗତ ସପ୍ତାହର ୯୪୩ ଆକ୍ରାନ୍ତଙ୍କ ତୁଳନାରେ ଦିଲ୍ଲୀରେ ଏହା ୨,୩୦୭ ରହିଛି। ଏହାର ବୃଦ୍ଧି ହାର ୧୪୫ ପ୍ରତିଶତ ରହିଛି। ଦେଶରେ ରିପୋର୍ଟ ହୋଇଥିବା ସମସ୍ତ ମାମଲାର ଏକ ତୃତୀୟାଂଶରୁ ଅଧିକ ରାଜଧାନୀରେ ରହିଛି।
ରବିବାର ଦିଲ୍ଲୀରେ ୫୧୭ ଟି ନୂଆ ମାମଲା ରିପୋର୍ଟ ହୋଇଥିଲା ଏବଂ ସଂକ୍ରମଣ ହାର ୪.୨୧ ପ୍ରତିଶତ ରେକର୍ଡ କରାଯାଇଥିଲା। ସ୍ବାସ୍ଥ୍ୟ ବିଭାଗ ଦ୍ୱାରା ଜାରି କରାଯାଇଥିବା ବୁଲେଟିନ ଅନୁଯାୟୀ ସହରରେ କରୋନା ସଂକ୍ରମଣ ଯୋଗୁ ରବିବାର କାହାର ମୃତ୍ୟୁ ଘଟିନାହିଁ।
ହରିୟାଣାରେ, ସାପ୍ତାହିକ ମାମଲା ୧,୧୧୯ କୁ ବୃଦ୍ଧି ପାଇଛି, ଯାହା ପୂର୍ବ ସପ୍ତାହର ୫୧୪ ଥିଲା। ରାଜ୍ୟରେ ଆକ୍ରାନ୍ତଙ୍କ ସଂଖ୍ୟାରେ ୧୧୮ ପ୍ରତିଶତ ବୃଦ୍ଧି ପାଇଛି। ଉତ୍ତରପ୍ରଦେଶରେ ଚଳିତ ସପ୍ତାହରେ ୫୪୦ଟି ମାମଲା ରେକର୍ଡ କରିଛି ଯାହା ଗତ ସପ୍ତାହଠାରୁ ୨୨୪ ଅଧିକ। ଏଠାରେ ବୃଦ୍ଧି ହାର ୧୪୧ ପ୍ରତିଶତ ରହିଛି।
