କୋଣାର୍କ,୩୦।୪(ଜ୍ୟୋତିରାଜ ମହାନ୍ତି):ସମୁଦ୍ରର ନୀଳ ଢ଼େଉରେ ଦୁଃସାହସିକ ଜଳକ୍ରୀଡ଼ା ସର୍ଫିଙ୍ଗ ପାଇଁ ଖାଲି ବିଦେଶ ନୁହେଁ, ଭାରତର ଯୁବବର୍ଗଙ୍କ ଆଗ୍ରହ ବଢ଼ିବାରେ ଲାଗିଛି। ପୁରୀ-କୋଣାର୍କ ବେଳାମାର୍ଗରେ ଅବସ୍ଥିତ ରେଞ୍ଜର୍ସ ଆଡ୍ଭେଞ୍ଚର୍ସ ଫାଉଣ୍ଡେଶନ ପକ୍ଷରୁ ସୋମବାର ରାମଚଣ୍ଡୀ ମୁହାଣ ନିକଟ ସ୍ବର୍ଣ୍ଣାଭ ବେଳାଭୂମି, କୁଶଭଦ୍ରା ନଦୀ, ଚନ୍ଦ୍ରଭାଗା ଓ ତାଣ୍ଡାଘର କେଲୁଣି ମୁହାଣ ନିକଟରେ ନିଆରା ଜଳକ୍ରୀଡ଼ା ସର୍ଫିଙ୍ଗ ପ୍ରଶିକ୍ଷଣ ଦିଆଯାଇଛି। ଦେଶ ବିଦେଶରୁ ଆସିଥିତ୍ବା ପ୍ରାୟ ୩୦୦ ପ୍ରଶିକ୍ଷାର୍ଥୀ ଏଠାରେ ତାଲିମ ନେଇ ସାରିଲେଣି। ଭାରତର ବିଭିନ୍ନ ରାଜ୍ୟ ସହିତ ଜାପାନ, ଅଷ୍ଟ୍ରେଲିଆ, ଜର୍ମାନୀ, ସ୍କଟଲାଣ୍ଡ, ଇଂଲଣ୍ଡ ଓ ଚେକ୍ ରିପବ୍ଲିକ ଆଦି ଦେଶରୁ ୮୦ ଜଣ ପ୍ରଶିକ୍ଷଣ ନେଇ ଫେରିଛନ୍ତି। ପ୍ରଥମେ କୁଶଭଦ୍ରା ନଦୀର ସ୍ଥିର ଜଳରାଶିରେ ଓ ପରେ ସମୁଦ୍ର ଢେଉ ମଧ୍ୟରେ ପ୍ରଶିକ୍ଷଣ ଦିଆଯାଉଛି। ସର୍ଫିଙ୍ଗ ପାଇଁ ଉତ୍କୃଷ୍ଟ ସମୟ ହେଉଛି ସକାଳ ୬ରୁ ୭ଟା। ପବନ କମ୍ ରହିବା ଦରକାର। ପର୍ଯ୍ୟଟକଙ୍କୁ ଆକୃଷ୍ଟ କରିବାକୁ ସର୍ଫିଙ୍ଗ ସହିତ ସ୍ବର୍ଣ୍ଣାଭ ବେଳାଭୂମିରେ ଜଳକ୍ରୀଡ଼ା, ସାଇକେଲ ଚାଳନା, ଯୋଗ ଓ ରହିବା ଖାଇବା ବ୍ୟବସ୍ଥା ରହିଛି। ଓଡ଼ିଶା ପର୍ଯ୍ୟଟନକୁ ଆଗକୁ ନେବାକୁ ସର୍ଫିଙ୍ଗ ଏକ ଭଲ ମାଧ୍ୟମ। ଏଠାକାର ସୁନ୍ଦର ଓ ସ୍ବଚ୍ଛ ବେଳାଭୂମି ସହ ସମୁଦ୍ରକୂଳ ଓ ପରିଷ୍କାର ଜଳରାଶି ସର୍ଫିଙ୍ଗ ପାଇଁ ବେଶ ଉପଯୋଗୀ। ଏହା ସାରା ବିଶ୍ୱ ପର୍ଯ୍ୟଟନରେ ସ୍ଥାନ ପାଇବ ବୋଲି ଆମେ ପ୍ରୟାସ କରୁଛୁ, ଏବେ ଭାରତୀୟ ଯୁବବର୍ଗଙ୍କ ଆଗ୍ରହ ବଢୁଥିବା ସହ ଏହା ଆଗାମୀ ଦିନରେ ସର୍ଫିଙ୍ଗ୍ ହବ୍ ପାଲଟିବ ବୋଲି ରେଞ୍ଜର୍ସର ପ୍ରତିଷ୍ଠାତା ସଞ୍ଜୟ କୁମାର ସାମନ୍ତରାୟ କହିଛନ୍ତି। ରେଞ୍ଜର୍ସ ଆଡଭେଞ୍ଚର୍ସ ଫାଉଣ୍ଡେଶନ ପକ୍ଷରୁ ବିଗତ ବର୍ଷଗୁଡ଼ିରେ ରାମଚଣ୍ଡୀ ନଦୀ ମୁହାଣରେ ଅନ୍ତର୍ଜାତୀୟ ସର୍ଫିଙ୍ଗ ଫେଷ୍ଟିଭାଲ ଆୟୋଜିତ ହେଉଥିଲା। କେତେକ ସମସ୍ୟା ଯୋଗୁ ଏହା ବନ୍ଦ ରହିଛି। ୨୦୨୫ ମସିହାରୁ ପୁଣି ଏହି ଉତ୍ସବ ଆୟୋଜନ କରାଯିବ। ପ୍ରାୟ ୧୦ରୁ ଊଦ୍ଧର୍ବ ଦେଶର ଅନ୍ତର୍ଜାତୀୟ ସର୍ଫର୍ସଙ୍କ ସହ ଦେଶର ବିଭିନ୍ନ ରାଜ୍ୟରୁ ପ୍ରାୟ ୨୦୦ ପ୍ରତିଯୋଗୀ ଭାଗ ନେବେ। ଏହା ଦ୍ୱାରା ସର୍ଫ ପର୍ଯ୍ୟଟନ ବୃଦ୍ଧି ପାଇବ। ସ୍ଥାନୀୟ ଲୋକଙ୍କ ବ୍ୟବସାୟ ସହ କୋଣାର୍କ ଓ ପୁରୀର ପର୍ଯ୍ୟଟନ ମଧ୍ୟ ଗୁରୁତ୍ୱ ରହିବ ବୋଲି ସାମନ୍ତରାୟ ସୂଚନା ଦେଇଛନ୍ତି।
