ବ୍ରହ୍ମପୁର,୧୯ା୯ (ସ୍ମୃତି ରଞ୍ଜନ ମହାଲିକ): ଧାନ ଭଳି ମକା ଚାଷ ମଧ୍ୟ ଗଞ୍ଜାମ ଜିଲାରେ ଚାଷୀଙ୍କ କ୍ଷେତ୍ରରେ ଆଗ୍ରହ ବୃଦ୍ଧି ପାଇବାରେ ଲାଗିଛି। ଜିଲାରେ ପ୍ରାୟ ୩୦ ହଜାରରୁ ଉର୍ଦ୍ଧ୍ୱ ମକା ଚାଷୀ ପରିବାର ରହିଥିବା ଅନୁମାନ କରାଯାଉଛି। ଏହି ଚାଷରେ କମ ପରିମାଣର ପାଣି ଆବଶ୍ୟକ ହେଉଥିବା ବେଳେ କମ ଖର୍ଚ୍ଚରେ ଚାଷୀ ଅଧିକ ଲାଭବାନ ହୋଇଥାଏ। ଫଳରେ ଜିଲାରେ ମକା ଚାଷୀଙ୍କ ସଂଖ୍ୟା କ୍ରମଶଃ ବୃଦ୍ଧି ପାଇଛି। ମକା ମାଟିରୁ ଅଧିକ ଖାଦ୍ୟ ସାର ଗ୍ରହଣ କରିଥାଏ। ଯାହାଦ୍ୱାରା ମକାକୁ ଅଧିକ ପ୍ରୋଟିନଯୁକ୍ତ ଖାଦ୍ୟ ଭାବେ ଗ୍ରହଣ କରାଯାଇଥାଏ। କିନ୍ତୁ ମକା ଚାଷୀଙ୍କୁ ସରକାରୀ ପ୍ରୋତ୍ସାହନ ମିଳୁ ନାହିଁ। ଫଳରେ ଚାଷୀ ନିଜସ୍ବ ଉଦ୍ୟମରେ ଜିଲା ଏବଂ ଜିଲା ବାହାର ବ୍ୟବସାୟୀଙ୍କୁ ରପ୍ତାନୀ କରି ଅର୍ଥ ଉପାର୍ଜନ କରିଥାଏ। ଅନ୍ୟପଟେ ଚାଷର କ୍ଷତି ପୂରଣ ଦିଗରେ କାୈଣସି ସରକାରୀ ସହାୟତା ମିଳୁ ନ ଥିବା କାରଣରୁ ବହୁ ଚାଷୀ ଅସନ୍ତୋଷ ପ୍ରକାଶ କରିଛନ୍ତି।
ସୂଚନା ମୁତାବକ, ଗଞ୍ଜାମ ଜିଲାରେ ବିଶେଷ କରି ଦେଶୀ ତଥା ଉନ୍ନତ କିସମ, ଶଙ୍କରଜାତୀୟ ଓ ମିଠା ମକା ଚାଷ ହୋଇଥାଏ। ଚଳିତ ଖରିଫ ଋତୁରେ ଜିଲାରେ ୩୭ ହଜାର ୫୩୦ ହେକ୍ଟର ମକା ଚାଷ ପାଇଁ ଲକ୍ଷ୍ୟ ରଖାଯାଇଥିଲା। ବର୍ତ୍ତମାନ ଜିଲାରେ ୩୧ ହଜାର ୫୧୩ ହେକ୍ଟର ଜମିରେ ଚାଷ ହେଉଥିବା ଜିଲା ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟ ସୂତ୍ରରୁ ସୂଚନା ମିଳିଛି। ଏଥିମଧ୍ୟରୁ ଆସ୍କା ବ୍ଲକରେ ୧୪୦୫ ହେକ୍ଟର, ଶେରଗଡ ୮୨୫, ଧରାକୋଟ ୧୬୬୦, ସୋରଡା ୧୯୪୫, ପାତ୍ରପୁର ୧୫୨୬, ଚିକିଟି ୭୩୦, ରଙ୍ଗେଇଲୁଣ୍ଡା ୩୪୫, ଭଞ୍ଜନଗର ୩୧୮୫, ବେଲଗୁଣ୍ଠା ୨୦୬୮, ଜଗନ୍ନାଥପ୍ରସାଦ ୩୮୦୦, ବୁଗୁଡା ୨୮୪୧, ଛତ୍ରପୁର ୧୫୫, ପୁରୁଷୋତ୍ତମପୁର ୬୮୩, ଗଞ୍ଜାମ ୨୩୫୦, ହିଞ୍ଜିଳିକାଟୁ ୨୬୫, ଦିଗପହଣ୍ଡି ୬୫୦, ସାନଖେମୁଣ୍ଡି ୮୪୧, କୁକୁଡାଖଣ୍ଡି ୫୧୫, ଖଲିକୋଟ ୨୧୯୫, ବେଗୁନିଆପଡା ୧୩୧୧, କବିସୂର୍ଯ୍ୟନଗର ୭୭୩, ପୋଲସରା ୧୪୦୫ ହେକ୍ଟର ଜମିରେ ମକା ଚାଷ ହୋଇଥିବା ସୂଚନା ମିଳିଛି। ତେବେ ଜିଲାରେ ପ୍ରାୟ ୩୦ ହଜାରରୁ ଊର୍ଦ୍ଧ୍ୱ ମକା ଚାଷୀ ପରିବାର ରହିଥିବା ସୂଚନା ମିଳିଛି। ତେବେ ଆସିକା ଅଞ୍ଚଳର ଚେରମାଳିଆ, ସାନରାମଚନ୍ଦ୍ରପୁର, ବୁଗୁଡା, ଗଞ୍ଜାମ ଓ ରମ୍ଭା ଅନ୍ତର୍ଗତ ବିରୁଡିଗଡ ଅଞ୍ଚଳରେ ଅଧିକ ପରିମାଣର ମକା ଉପତ୍ାଦନ ହେଉଛି। ମକା ବିହନ ଯୋଗାଇବା କ୍ଷେତ୍ରରେ ସରକାରଙ୍କ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିବା କାରଣରୁ ଚାଷୀମାନେ ବିଭିନ୍ନ ବେସରକାରୀ ସଂସ୍ଥାରୁ ବିହନ କିଣି ଚାଷ କରିଥାନ୍ତି। ଗୋଟିଏ ହେକ୍ଟର ମକା ଚାଷ ନିମନ୍ତେ ୭୪ ହଜାର ୨୫୦ ଟଙ୍କା ଖର୍ଚ୍ଚ ହୋଇଥାଏ। ଚାଷରେ ଯଦି କୌଣସି କ୍ଷତି ଘଟେ ତେବେ ଚାଷୀଙ୍କୁ ସେ କରିଥିବା ବୀମା ଅନୁଯାୟୀ କ୍ଷତିପୂରଣ ମିଳିଥାଏ ବୋଲି ଜିଲା ମୁଖ୍ୟ କୃଷି ଅଧିକାରୀ ସୁବ୍ରତ କୁମାର ସାହୁ କହିଛନ୍ତି। କିନ୍ତୁ ମକା ଚାଷରେ ପାରା କିମ୍ବା ବାରହା ଖାଇଗଲେ ସରକାରଙ୍କ ପକ୍ଷରୁ କୌଣସି କ୍ଷତିପୂରଣ ବ୍ୟବସ୍ଥା ନ ଥିବା ସେ କହିଛନ୍ତି।
ତେବେ ଜିଲାରେ ମକା ଚାଷୀଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ତଦନୁଯାୟୀ ସରକାର ଚାଷୀଙ୍କୁ ଉତ୍ତମ କିସମର ବିହନ ଯୋଗାଇବା ସହ ଫସଲ ନଷ୍ଟ ବାବଦକୁ କ୍ଷତିପୂରଣ ଯୋଗାଇବା ପାଇଁ ମକା ଚାଷୀମାନେ ଦାବି କରିଛନ୍ତି। ଆସ୍କା ଅଞ୍ଚଳର ଚାଷୀ ଜିତେନ୍ଦ୍ର କୁମାର ବିଶୋୟୀ କହିଛନ୍ତି ଯେ, ମକା ଚାଷ କରିବା ପରେ ପାରା, ବାରହା ଓ ବିଲୁଆ ଖାଇ ଦେବା ଭୟ ରହୁଛି। ଯେଉଁଥିପାଇଁ ୨୪ ଘଣ୍ଟା ଜମିରେ ଜଗିବାକୁ ପଡୁଛି। ତଥାପି ପଶୁ ଉପଦ୍ରବରେ କ୍ଷତି ସହୁଛୁ। କିନ୍ତୁ କ୍ଷତି ପୂରଣ ବାବଦକୁ ସରକାରଙ୍କ ପକ୍ଷରୁ କୌଣସି କ୍ଷତି ପୂରଣ ମିଳି ନାହିଁ। ଏପରିକି ମକା ଚାଷ ପାଇଁ ବିହନ ମଧ୍ୟ ବେସରକାରୀ ସଂସ୍ଥାରୁ କିଣି ଚାଷ କରୁଛୁ। ଫଳରେ ଦର ମଧ୍ୟ ଅଧିକ ରହୁଛି। ଏଣୁ ଧାନ ଭଳି ସୋସାଇଟି ମାଧ୍ୟମରେ ମକା ବିହନ ପ୍ରଦାନ କରାଗଲେ ଚାଷୀ ଉପକୃତ ହେବା ସାଙ୍ଗକୁ ଅଧିକ ଖର୍ଚ୍ଚାନ୍ତର ଶିକାର ହେବେ ନାହିଁ ବୋଲି ସେ କହିଛନ୍ତି। ସେହିଭଳି ଋଷିକୁଲ୍ୟା ରୟତ ମହାସଭାର ସଂପାଦକ ସୀମାଞ୍ଚଳ ନାହାକ କହିଛନ୍ତି ଯେ, ଜିଲାରେ ମକା ଚାଷୀଙ୍କ ନିମନ୍ତେ ସରକାର କୌଣସି ସହାୟତାର ବ୍ୟବସ୍ଥା କରି ନାହାନ୍ତି। ଫଳରେ ଜିଲାରେ ଅନେକ ମକା ଚାଷୀ ଫସଲ କ୍ଷତିରେ ଦୁଃଖ ଦୁର୍ଦ୍ଦଶା ଭୋଗୁଛନ୍ତି। ଏଣୁ ଧାନ ଭଳି ମକା ଚାଷୀଙ୍କୁ ମଧ୍ୟ ସରକାରୀ ସହାୟତା ସାଙ୍ଗକୁ ପ୍ରୋତ୍ସାହନ ପ୍ରଦାନ କରିବା ପାଇଁ ସେ ଦାବି କରିଛନ୍ତି।
