ବରଗଡ଼,୧୨।୧୨(ପ୍ରେମାନନ୍ଦ ଖମାରୀ): ଓଡ଼ିଶା କ୍ରିକେଟ ଆସୋସିଏଶନ ଆନୁକୂଲ୍ୟରେ ଏବଂ ଜିଲା କ୍ରିକେଟ ଆସୋସିଏଶନ ସହଯୋଗରେ ବରଗଡ଼ କ୍ରିଷ୍ଣା ବିକାଶ ଗ୍ରାଉଣ୍ଡରେ ଅନୁଷ୍ଠିତ ୧୯ବର୍ଷରୁ କମ୍ କୁଚ୍ ବିହାର ଟ୍ରଫିରେ ହାଇଦ୍ରାବାଦ-ଓଡ଼ିଶା ମ୍ୟାଚ୍ ଅମୀମାଂସିତ ଭାବେ ଶେଷ ହୋଇଛି । ହାଇଦ୍ରାବାଦ ପ୍ରଥମ ଇନିଂସରେ ଅଗ୍ରଣୀ ଭିତ୍ତିରେ ୩ ପଏଣ୍ଟ ଏବଂ ଓଡ଼ିଶାକୁ ୧ ପଏଣ୍ଟରେ ସନ୍ତୁଷ୍ଟ ହେବାକୁ ପଡ଼ିଛି। ହାଇଦ୍ରାବାଦର ପ୍ରଥମ ଇନିଂସ ସ୍କୋର ୫୦୩ ଜବାବରେ ଓଡ଼ିଶା ଅସମାପ୍ତ ୧୮୯/୪ରୁ ଖେଳ ଆରମ୍ଭ କରିଥିଲା। ପୂର୍ବଦିନର ଅପରାଜିତ ବ୍ୟାଟର ଶ୍ରେୟାଂଶ ଭରଦ୍ୱାଜ ନିଜର ଦ୍ୱିଶତକ ପୂରଣ କରିବା ସହିତ ୩୯୧ ବଲର ସାମ୍ନା କରି ୨୫୬ରନ୍ କରିଥିଲେ। ଏହି ଇନିଂସରେ ୨୬ ଚୌକା ଓ ୧୧ ଛକା ସାମିଲ ଥିଲା। ସମ୍ବିତ ବେଜା ୭୯ ରନ୍ କରିଥିଲେ। ଉଭୟ ଖେଳାଳି ଆଉଟ ହେବା ସହିତ ଦଳର ବ୍ୟାଟିଂ ବିପର୍ଯ୍ୟୟ ଘଟିଥିଲା। ନିମ୍ନକ୍ରମରେ ମହମ୍ମଦ ସୋହେଲ ଖାଁ ୫୪ର ଓ ଶୁଭମ ପ୍ରିୟଦର୍ଶୀଙ୍କ ୨୮ରନ୍ ସତ୍ତ୍ବେ ଦଳ ୪୮୧ରନ୍ କରି ଅଲଆଉଟ୍ ହୋଇଥିଲା। ହାଇଦ୍ରାବାଦ ଦଳ ପକ୍ଷରୁ ପ୍ରଣବ ବର୍ମା ୪, ଏସ୍. ନିଶାନ୍ତ ୩ ଓ ଦିନେଶ ରାଠୋର ୨ ଉଇକେଟ୍ ନେଇଥିଲେ।
ମ୍ୟାଚ୍ ପରେ ଜିଲା କ୍ରିକେଟ୍ ଆସୋସିଏଶନର ଯୁଗ୍ମ ସମ୍ପାଦକ ସଚ୍ଚିଦାନନ୍ଦ ପଣ୍ଡାଙ୍କ ସଂଯୋଜନାରେ ଖେଳାଳି ଏବଂ ମ୍ୟାଚ୍ ଅଫିସିଆଲଙ୍କୁ ସମ୍ବର୍ଦ୍ଧନା ଦିଆଯାଇଥିଲା। ଏହି ସମୟରେ ଓଡ଼ିଶାର ସମସ୍ତ ଖେଳାଳିଙ୍କ ସମେତ ପୂର୍ବତନ ରଣଜୀ ଖେଳାଳି ତଥା ମୁଖ୍ୟ କୋଚ୍ ନଟରାଜ ବେହେରା, ବସନ୍ତ ମହାନ୍ତି, ପର୍ଯ୍ୟବେକ୍ଷକ ତଥା ରଣଜୀ ଖେଳାଳି ପ୍ରଭଞ୍ଜନ ମଲ୍ଲିକ, ମ୍ୟାନେଜର ପ୍ରଦୀପ ନନ୍ଦ ପ୍ରମୁଖଙ୍କୁ ସ୍ମାରକୀ ପ୍ରଦାନ କରାଯାଇଥିଲା। ସେହିପରି ହାଇଦ୍ରାବାଦ ଦଳର ସମସ୍ତ ସପୋର୍ଟ ଷ୍ଟାଫଙ୍କୁ ମଧ୍ୟ ସ୍ମାରକୀ ପ୍ରଦାନ କରାଯାଇଥିଲା। ପୁରସ୍କାର ପ୍ରଦାନ କାର୍ଯ୍ୟକ୍ରମରେ ବିକାଶ ଗ୍ରୁପ୍ର ପ୍ରବନ୍ଧନ ନିର୍ଦ୍ଦେଶକ ଡି. ବିବେକ, ଜିଲା କ୍ରିକେଟ ଆସୋସିଏଶନ ସଭାପତି ହରିହର ପ୍ରଧାନ, ସମ୍ପାଦକ ରବି ପଣ୍ଡା, ଉପସଭାପତି ଶୁଭ୍ରାଂଶୁ ଶେଖର ମହାପାତ୍ର, କୋଷାଧ୍ୟକ୍ଷ ଗୁରୁଦତ୍ତ ଦାଶ, ପୂର୍ବତନ ସମ୍ପାଦକ ସୁବ୍ରତ ଚାଟାର୍ଜୀ, ଗିରିଜା ପ୍ରସାଦ ନାଥ, ସନ୍ତୋଷ ପଣ୍ଡା, ପ୍ରଦୀପ ନନ୍ଦ୍, ବିକାଶ ଗ୍ରୁପ୍ର କ୍ରୀଡ଼ା ଅଧିକାରୀ ପୀତାମ୍ବର ପ୍ରଧାନ, କ୍ରିକେଟ କୋଚ୍ ଅଶୋକ ସିଂ, ରୂପକ ପ୍ରଧାନ, ଓସିଏ କ୍ୟୁରେଟର କେଶବ ସିଂ, ବିକାଶ ଗ୍ରାଉଣ୍ଡ କ୍ୟୁରେଟର ରେଣ୍ଟୁ ସିଂ ପ୍ରମୁଖ ଉପସ୍ଥିତ ଥିଲେ।
