ଭୁବନେଶ୍ୱର, ୩୦।୬: ପରୋଲ୍ରେ ଜେଲରୁ ମୁକ୍ତି ପାଇବା ପରେ ଫେରାର ହୋଇଯାଇଥିବା ଜଣେ ଆଜୀବନ କାରାଦଣ୍ଡପ୍ରାପ୍ତ ଦୋଷୀଙ୍କୁ ଦୀର୍ଘ ୯ ବର୍ଷ ପରେ କମିଶନରେଟ୍ ପୋଲିସ ଗିରଫ କରିଛି। ଅଭିଯୁକ୍ତ ସାଜିତ ଖାନ୍ଙ୍କୁ ପଞ୍ଜାବର ଅମୃତସରରୁ ଗିରଫ କରାଯାଇଛି।
ସୂଚନା ଅନୁଯାୟୀ, ସାଜିତ ଖାନ୍ ୨୦୦୮ ମସିହାରେ ଚୌଦ୍ୱାର ଅଞ୍ଚଳରେ ଘଟିଥିବା ଜଣେ ମହିଳାଙ୍କ ହତ୍ୟାକାଣ୍ଡରେ ଦୋଷୀ ସାବ୍ୟସ୍ତ ହୋଇ ଆଜୀବନ କାରାଦଣ୍ଡ ଭୋଗୁଥିଲେ। ୨୦୧୭ ମସିହାରେ ତାଙ୍କୁ ତିନି ମାସ ପାଇଁ ପରୋଲ୍ ମଞ୍ଜୁର ହୋଇଥିଲା। ମାତ୍ର ପରୋଲ୍ ଅବଧି ଶେଷ ହେବା ପରେ ସେ ଜେଲକୁ ଫେରି ନ ଥିଲେ ଏବଂ ଫେରାର ହୋଇଯାଇଥିଲେ।
ଦୀର୍ଘ ଦିନ ଧରି ତାଙ୍କ ସନ୍ଧାନ ଚାଲିଥିବା ବେଳେ ସେ ଅମୃତସରରେ ନିଜ ପରିଚୟ ଲୁଚାଇ ‘ଫୟାଜ ଖାନ୍’ ନାମରେ ରହୁଥିଲେ। ସେଠାରେ ସେ ଜଣେ ହକର ଭାବେ କାମ କରୁଥିବା ଜଣାପଡ଼ିଛି।
ପୋଲିସର ସୂଚନା ଅନୁଯାୟୀ, ୨୦୨୫ ମସିହାରେ ଏହି ଫେରାର ଦୋଷୀଙ୍କ ସମ୍ପର୍କରେ ଏକ ଗଣମାଧ୍ୟମ ରିପୋର୍ଟ ପ୍ରକାଶ ପାଇବା ପରେ କମିଶନରେଟ୍ ପୋଲିସ ପୁନର୍ବାର ତଦନ୍ତକୁ ତ୍ୱରାନ୍ୱିତ କରିଥିଲା। ବିଭିନ୍ନ ରାଜ୍ୟରେ ଖୋଜାଖୋଜି ଓ ଗୁଇନ୍ଦା ସୂଚନା ଆଧାରରେ ଶେଷରେ ଅମୃତସରରେ ତାଙ୍କ ଠିକଣା ଚିହ୍ନଟ କରାଯାଇଥିଲା।
କମିଶନରେଟ୍ ପୋଲିସର ଏକ ସ୍ୱତନ୍ତ୍ର ଟିମ୍ ଅମୃତସରରେ ପହଞ୍ଚି ସ୍ଥାନୀୟ ପୋଲିସର ସହଯୋଗରେ ସାଜିତ ଖାନ୍ଙ୍କୁ ଗିରଫ କରି ଓଡ଼ିଶାକୁ ଆଣିଛି। ପରବର୍ତ୍ତୀ ଆଇନଗତ ପ୍ରକ୍ରିୟା ପରେ ତାଙ୍କୁ ପୁନର୍ବାର ଜେଲକୁ ପଠାଯିବ।
ଏନେଇ ପୋଲିସ କମିଶନର କହିଛନ୍ତି ଯେ, “୨୦୨୫ରେ ଏହି ଘଟଣା ସମ୍ପର୍କିତ ରିପୋର୍ଟ ପ୍ରକାଶ ପାଇବା ପରେ ଆମେ ମାମଲାକୁ ପୁନଃ ଗୁରୁତ୍ୱର ସହ ନେଇ ତଦନ୍ତ ଆରମ୍ଭ କରିଥିଲୁ। ସେହି ପ୍ରୟାସର ଫଳସ୍ୱରୂପ ଅଭିଯୁକ୍ତଙ୍କୁ ଚିହ୍ନଟ କରି ଗିରଫ କରିବାରେ ସଫଳ ହୋଇଛୁ।”
Dharitri – Odisha’s No.1 Odia Daily
