ନୂଆଦିଲ୍ଲୀ, ୨୩ା୧୨: ନୂଆ କୁସ୍ତି ମହାସଂଘ (ଡବ୍ଲ୍ୟୁଏଫ୍ଆଇ) ଗଠନ ହେବାର ଦିନକ ପରେ ସେଥିରେ ବିବାଦଦେଖାଦେଇଛି। ଜାତୀୟ ଜୁନିୟର ପ୍ରତିଯୋଗିତାକୁ ସ୍ଥଗିତ ରଖିବା ଲାଗି ଏହି କ୍ରୀଡ଼ା ପରିଷଦର ଜେନେରାଲ ସେକ୍ରେଟାରୀ ପ୍ରେମଚାନ୍ଦ ଲୋଚାବ ଦାବି କରିଛନ୍ତି। ପ୍ରତିଯୋଗିତାର ଦିନ ଧାର୍ଯ୍ୟ କରିବା ବେଳେ ସଭାପତି ନିୟମାବଳୀର ଅନୁସରଣ କରୁନାହାନ୍ତି।
୧୫ବର୍ଷରୁ କମ୍ ଓ ୨୦ ବର୍ଷରୁ କମ୍ ଜାତୀୟ ପ୍ରତିଯୋଗିତା ଡିସେମ୍ବର ୨୮ରୁ ୩୦ ଉତ୍ତରପ୍ରଦେଶର ଗୋଣ୍ଡାଠାରେ ହେବ ବୋଲି ନବଗଠିତ କୁସ୍ତି ମହାସଂଘର ସଭାପତି ସଞ୍ଜୟ ସିଂ ଘୋଷଣା କରିଥିଲେ। ବିଭିନ୍ନ ପଦବୀ ପାଇଁ ନିର୍ବାଚନ ହେବାର କିଛି ଘଣ୍ଟା ପରେ ଏକ ବୈଠକରେ ନବ ନିର୍ବାଚିତ ସଦସ୍ୟମାନେ ଏହି ନିଷ୍ପତ୍ତି ନେଇଛନ୍ତି। ବିପକ୍ଷ ଅନୀତା ଶେଓରାନ ଗୋଷ୍ଠୀ ତରଫରୁ ନିର୍ବାଚନ ଜିତିଥିବା ଆରଏସପିବି (ରେଲଓ୍ବେ ସ୍ପୋଟର୍ସ ପ୍ରମୋଶନ ବୋର୍ଡ)ର ପୂର୍ବତନ ସମ୍ପାଦକ ଲୋଚାବ ଏହି ବୈଠକରେ ଯୋଗ ଦେଇ ନ ଥିଲେ। ସମସ୍ତ ନିଷ୍ପତ୍ତି ଡବ୍ଲ୍ୟୁଏଫ୍ଆଇ ସେକ୍ରେଟାରୀ ଜେନେରାଲଙ୍କ ଜରିଆରେ ହେବା ଉଚିତ ବୋଲି ସେ କହିଛନ୍ତି। ଜବାବରେ ସଞ୍ଜୟ ସିଂ ତାଙ୍କ ନିଷ୍ପତ୍ତି ଯଥାର୍ଥ ବୋଲି କହିଛନ୍ତି।
ଜୁନିୟର କୁସ୍ତିଯୋଦ୍ଧାଙ୍କ ହିତ ଓ ସ୍ବାର୍ଥକୁ ଦୃଷ୍ଟିରେ ରଖି ଏହା କରାଯାଇଥିବା ସେ କହିଛନ୍ତି। ଡବ୍ଲ୍ୟୁଏଫ୍ଆଇ ସମ୍ବିଧାନର ବାଇ-ଲ’ ଅନୁସାରେ ସେ ନିଷ୍ପତ୍ତି ନେଇଛନ୍ତି। ସେକ୍ରେଟାରୀ ଜେନେରାଲ ତାହା ଗ୍ରହଣ କରିବାକୁ ବାଧ୍ୟ ବୋଲି ସେ କହିଛନ୍ତି। ଲୋଚାବ ଶୁକ୍ରବାର ଏହି ପ୍ରସଙ୍ଗରେ ସଞ୍ଜୟ ସିଂକ ନିକଟକୁ ଏକ ଚିଠିି ଲେଖିଥିଲେ। ଜାତୀୟ ଜୁନିୟର ପ୍ରତିଯୋଗିତା କାର୍ଯ୍ୟସୂଚୀରେ ପରିବର୍ତ୍ତନକୁ ନେଇ କିଛି ରାଜ୍ୟ ଆପତ୍ତି ଉଠାଇଛନ୍ତି। ଡବ୍ଲ୍ୟୁଏଫ୍ଆଇର ସମ୍ବିଧାନ ଅନୁସାରେ ୨୧ ତାରିଖରେ ନୂଆ କାର୍ଯ୍ୟନିର୍ବାହୀ ପରିଷଦ ଗଠନ ପରେ କାର୍ଯ୍ୟନିର୍ବାହୀ କମିଟିର ବୈଠକ ବସି ନାହିଁ।
