ଯାଜପୁର,୫ା୫(ହର୍ଷବର୍ଦ୍ଧନ ବେହେରା)ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳର ଜିନ୍ଦଲ ଷ୍ଟେନ୍ଲେସ୍ ଷ୍ଟିଲ୍ (ଜେଏସ୍ଏଲ୍)ରେ ନିୟୋଜିତ ଏକ ଅଣଓଡ଼ିଆ ଠିକାସଂସ୍ଥା ଜିଏମ୍ ଏଣ୍ଟରପ୍ରାଇଜର୍ସ ୪୬ ଜଣ ଗରିବ ଶ୍ରମିକଙ୍କୁ ଦରମା ନ ଦେଇ ମାନସିକ ନିର୍ଯାତନା ଦେଉଥିବା ଅଭିଯୋଗ ହୋଇଛି। ହେଲେ ଶ୍ରମ ବିଭାଗ ଅଧିକାରୀ ସମ୍ପୃକ୍ତ ଠିକାସଂସ୍ଥା ଏବଂ କମ୍ପାନୀ କର୍ତ୍ତୃପକ୍ଷଙ୍କୁ ୧ ବର୍ଷରୁ ଊର୍ଦ୍ଧ୍ୱ ହେବ କେବଳ ନୋଟିସ ଦେଇ ନୀରବିଯାଇଛନ୍ତି। ଫଳରେ ଶ୍ରମିକମାନେ ଆର୍ଥିକ ଦୁର୍ଦ୍ଦିନ ମଧ୍ୟକୁ ଠେଲି ହୋଇଯାଇଛନ୍ତି। ଏହିମର୍ମରେ ପ୍ରଭାବିତ ଠିକା ଶ୍ରମିକମାନେ ଶନିବାର ଜିଲାପାଳ ନିଖିଳ ପଓ୍ବନ କଲ୍ୟାଣଙ୍କୁ ଭେଟି ତୁରନ୍ତ ବକେୟା ଦରମା ପ୍ରଦାନ କରିବା ସହ ଶ୍ରମ ଅଧିକାରୀ, ଠିକାସଂସ୍ଥା ଓ କମ୍ପାନୀ କର୍ତ୍ତୃପକ୍ଷଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିବେଦନ କରିଛନ୍ତି।
ଶିଳ୍ପ କାରଖାନା ପରିଚାଳନା, ପରିବହନ, ରକ୍ଷଣାବେକ୍ଷଣ, ମରାମତି ଆଦି କ୍ଷେତ୍ରରେ ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ଠିକାସଂସ୍ଥାଗୁଡିକ ନିୟୋଜିତ ଅଛନ୍ତି। ତେବେ କେତେକ ଠିକାସଂସ୍ଥାରେ ନିୟୋଜିତ କୁଶଳୀ ଓ ଅଣକୁଶଳୀ ଶ୍ରମିକମାନଙ୍କୁ ଅଧା ଦରମା ସହ ମାସ ମାସ ଧରି ସେମାନଙ୍କ ପ୍ରାପ୍ୟ ନଦେଇ ଶୋଷଣ କରାଯାଉଥିବା ବିଭିନ୍ନ ସମୟରେ ଅଭିଯୋଗ ହୋଇ ଆସୁଛି। ଜିଏମ୍ ଏଣ୍ଟରପ୍ରାଇଜେସ୍ ଠିକାସଂସ୍ଥା ଅଧୀନରେ କାମ କରିଥିବା ଶ୍ରମିକ ଅଜୟ କୁମାର ରଣା, ଚନ୍ଦ୍ରମଣି ସେଠୀ, ପ୍ରଶାନ୍ତ ଜେନା, ରାମଚନ୍ଦ୍ର ବେହେରା, ତ୍ରିଲୋଚନ ମଲ୍ଲିକ, ସୋମନାଥ ପ୍ରଧାନ, ସେକ ସାଜିଦ, ଶ୍ରୀଧର ରଣା ପ୍ରମୁଖଙ୍କ ଅଭିଯୋଗ ଅନୁସାରେ ୨୦୧୭ରୁ ୨୦୨୨ ନଭେମ୍ବର ପର୍ଯ୍ୟନ୍ତ ଦୈନିକ ୬୦୦ ଟଙ୍କା ହିସାବରେ ଦରମା ମିଳୁଥିଲା। କିନ୍ତୁ ୨୦୨୨ ଡିସେମ୍ବରରୁ ୨୦୨୩ ଏପ୍ରିଲ ପର୍ଯ୍ୟନ୍ତ ଉକ୍ତ ଠିକାସଂସ୍ଥା କାର୍ଯ୍ୟରେ ନିୟୋଜିତ କରିଥିଲେ ହେଁ ୪୬ ଜଣ ଶ୍ରମିକଙ୍କ ଦରମା ପ୍ରଦାନ କରି ନଥିଲା। ଦରମା ମାଗିବାରୁ ଉକ୍ତ ଠିକାସଂସ୍ଥା କର୍ତ୍ତୃପକ୍ଷ ବିଭିନ୍ନ ଧମକ ଦେଇ ମାନସିକ ନିର୍ଯାତନା ଦେଇଥିଲା। ଏ ସଂକ୍ରାନ୍ତରେ ଜିନ୍ଦଲ ଷ୍ଟେନ୍ଲେସ୍ ଷ୍ଟିଲର ଉଚ୍ଚପଦସ୍ଥ ଅଧିକାରୀଙ୍କୁ ବହୁବାର ଅଭିଯୋଗ କରିଥିଲେ। କୌଣସି ସୁଫଳ ନ ମିଳିବାରୁ ସେମାନେ ୧୧ା୫ା୨୦୨୩ରେ ଯୁଗ୍ମ ଶ୍ରମ କମିଶନରଙ୍କ ନିକଟରେ ଲିଖିତ ଅଭିଯୋଗ କରିଥିଲେ। ଉକ୍ତ ଅଭିଯୋଗ ଆଧାରରେ ଅତିରିକ୍ତ ଜିଲା ଶ୍ରମ ଅଧିକାରୀ ସଞ୍ଜିତ କୁମାର ଦେଓ ମାମଲା ପରିଚାଳନା କରିବା ସହ ଠିକାସଂସ୍ଥା ଓ ଜେଏସଏଲ୍ କର୍ତ୍ତୃପକ୍ଷଙ୍କୁ ଶ୍ରମ କାର୍ଯ୍ୟାଳୟରେ ଉପସ୍ଥିତ ରହିବାକୁ ୩ ଥର ନୋଟିସ ଜାରି କରିଛନ୍ତି। କିନ୍ତୁ କମ୍ପାନୀ କିମ୍ବା ଠିକାସଂସ୍ଥା କର୍ତ୍ତୃପକ୍ଷ ଭ୍ରୂକ୍ଷେପ ନ କରି ଶ୍ରମ କାର୍ଯ୍ୟାଳୟରେ ଉପସ୍ଥିତ ହୋଇ ନ ଥିଲେ। ଏପରିକି ଶ୍ରମ ଆଇନ ଅନୁଯାୟୀ ଶ୍ରମ ବିଭାଗ ଅଧିକାରୀ ନିଜ ଆଡୁ କୌଣସି ମାମଲା ମଧ୍ୟ ରୁଜୁ କରି ନ ଥିଲେ। ପ୍ରାୟ ବର୍ଷେ ହେବ କୌଣସି ପଦକ୍ଷେପ ନ ନେଇ ଆଜି ଆସ କାଲି ଆସ ବୋଲି କହି ଶ୍ରମ ବିଭାଗ ପକ୍ଷରୁ ଭୁଅଁା ବୁଲାଯାଉଛି ବୋଲି ଶ୍ରମିକମାନେ ଅଭିଯୋଗରେ ଦର୍ଶାଇଛନ୍ତି। ଏ ସଂକ୍ରାନ୍ତରେ ଜିଲା ଶ୍ରମ ଅଧିକାରୀ ସନ୍ତୋଷ କୁମାର ମହାନ୍ତିଙ୍କୁ ପଚାରିବାରୁ ସେ କହିଛନ୍ତି, ଠିକାସଂସ୍ଥା କର୍ତ୍ତୃପକ୍ଷଙ୍କୁ ଏହାର ସମାଧାନ କରିବାକୁ ନୋଟିସ ଜାରି କରାଯାଇଛି। ଖୁବ୍ଶୀଘ୍ର ଆବଶ୍ୟକ ପଦକ୍ଷେପ ଗ୍ରହଣ କରାଯିବ।
