ଯାଜପୁର ଅଫିସ,୧୫।୧: ନକଲି ବାର୍ଷିକ ଦେୟ ରସିଦ ଓ ବିବାହ ପ୍ରମାଣପତ୍ର ପ୍ରସ୍ତୁତ କରି ନିର୍ମାଣ ଶ୍ରମିକ କଲ୍ୟାଣ ପାଣ୍ଠିରୁ ୫୪ ଲକ୍ଷ ୩୫ ହଜାର ଟଙ୍କା ହଡପ କରାଯାଇଥିବା ଯାଜପୁର ଜିଲାପାଳ, ଯୁଗ୍ମ ଶ୍ରମ ଆୟୁକ୍ତ ଏବଂ ଶ୍ରମ ଆୟୁକ୍ତଙ୍କ ନିକଟରେ ଅଭିଯୋଗ ହୋଇଛି। ସୂଚନା ଅଧିକାର ଆଇନ(ଆରଟିଆଇ) ବଳରେ ତଥ୍ୟ ହାସଲ କରି କଳ୍ପତରୁ ଧଳ ଉପରୋକ୍ତ ଅଭିଯୋଗ ଆଣିଛନ୍ତି। ଏଥିରେ ଯାଜପୁର ଶ୍ରମ କାର୍ଯ୍ୟାଳୟରୁ ଏକାଧିକ ଅଧିକାରୀ ସଂପୃକ୍ତ ଥିବା ତାଙ୍କ ଅଭିଯୋଗରେ ଦର୍ଶାଇଛନ୍ତି।
ଅଭିଯୋଗ ଅନୁସାରେ ଯେଉଁ ବିବାହ ପ୍ରମାଣ ପତ୍ର ପଇଠ କରାଯାଇ ହିତାଧିକାରୀଙ୍କ ନାମରେ ଟଙ୍କା ଉଠାଣ ହୋଇଛି, ସେସବୁ ପ୍ରମାଣ ପତ୍ର ଜାଲ୍ ବୋଲି ବ୍ଲକ ସୂତ୍ରରୁ ସୂଚନା ମିଳିଛି। ୨୦୧୮-୧୯ରେ ରସୁଲପୁର ଓ ସୁକିନ୍ଦା ବ୍ଲକର ୧୭୯ ଜଣ ନିର୍ମାଣ ଶ୍ରମିକଙ୍କୁ ବିବାହ ସହାୟତା ରାଶି ପ୍ରଦାନ କରାଯାଇଛି। ୨୫ହଜାର ଟଙ୍କା କରି ୧୭୯ ହିତାଧିକାରୀଙ୍କୁ କାର୍ଯ୍ୟାଳୟ ପକ୍ଷରୁ ୪୪ଲକ୍ଷ ୭୫ ହଜାର ଟଙ୍କା ଦିଆଯାଇଛି। କିନ୍ତୁ ତଥ୍ୟ ହାସଲ କରିବା ପରେ ସୂଚନା କର୍ମୀ ଧଳ ସୁକିନ୍ଦା ଏବଂ ରସୁଲପୁର ବ୍ଲକରୁ ପଞ୍ଜିକୃତ ଶ୍ରମିକଙ୍କ ବିବାହ ପ୍ରମାଣ ପତ୍ରର ରେଜିଷ୍ଟର ଆରଟିଆଇରେ ମାଗିବା ପରେ ବହୁ ଗୁମର ଫିଟିଛି। ତଥ୍ୟ ଅନୁଯାୟୀ ରସୁଲପୁର ଏବଂ ସୁକିନ୍ଦା ବ୍ଲକରୁ ମିଳିଥିବା ବିବାହ ପଞ୍ଜିକୃତ ରେଜିଷ୍ଟରରେ କାର୍ଯ୍ୟାଳୟ ପକ୍ଷରୁ ପ୍ରଦାନ କରାଯାଇଥିବା ହିତାଧିକାରୀଙ୍କ ନଁା ଗନ୍ଧ ନ ଥିଲା। କିନ୍ତୁ ହିତାଧିକାରୀମାନେ ବିବାହ ପ୍ରମାଣ ପତ୍ର ପଇଠ କରି ସହାୟତା ରାଶି ନେଇଥିବା ଶ୍ରମ କାର୍ଯ୍ୟାଳୟ ତଥ୍ୟରେ ଦର୍ଶାଯାଇଥିଲା। କେବଳ ବିବାହ ପ୍ରମାଣ ପତ୍ର ବଳରେ ନୁହେଁ ଜାଲ ରସିଦ୍ ବଳରେ ୯ଲକ୍ଷ ୬୦ ହଜାର ଟଙ୍କା ହଡପ କରାଯାଇଛି ବୋଲି ଅଭିଯୋଗ ହୋଇଛି।
ତଥ୍ୟ ଅନୁଯାୟୀ କୌଣସି ପଞ୍ଜିକୃତ ଶ୍ରମିକ ପ୍ରତିବର୍ଷ ତାଙ୍କ ନାମକୁ ପୁନଃପଞ୍ଜିକରଣ କରି ପାରିବେ। ଏବାବଦରେ ସେହି ଶ୍ରମିକଙ୍କୁ ବାର୍ଷିକ ୫୦ଟଙ୍କା ପଇଠ କରିବାକୁ କୁହାଯାଇଛି। ପଇଠ କରିବା ପରେ ଶ୍ରମିକଙ୍କ ସଦସ୍ୟତା ବୈଧ ରହିବ। ପରେ ସେମାନେ ସରକାରୀ ସହାୟତା ପାଇବାକୁ ଯୋଗ୍ୟ ବିବେଚିତ ହେବେ। କିନ୍ତୁ ଶ୍ରମ କାର୍ଯ୍ୟାଳୟରେ ପୁନଃ ପଞ୍ଜିକରଣ କରି ନ ଥିବା ଶ୍ରମିକଙ୍କ ନଁାରେ ଲକ୍ଷାଧିକ ଟଙ୍କା ପ୍ରଦାନ କରାଯାଇଛି। ଏଭଳି ଭାବେ ଅଣପଞ୍ଜିକୃତ ୩୦ଜଣ ନିର୍ମାଣ ଶ୍ରମିକଙ୍କୁ ବିବାହ ସହାୟତା ଏବଂ ୨ଜଣଙ୍କୁ ମୃତ୍ୟୁ କାଳୀନ ସହାୟତା ଯୋଗାଇ ଦିଆଯାଇଛି। ଯାହାକି ସମ୍ପୂର୍ଣ୍ଣ ବେଆଇନ। ହେଲେ ନାମ ପଞ୍ଜିକରଣରୁ ବାଦ ପଡ଼ିଥିବା ଶ୍ରମିକଙ୍କୁ ବିବାହ ସହାୟତା ଏବଂ ମୃତ୍ୟୁ କାଳୀନ ସହାୟତା ଯୋଗାଇ ଦେବା ବାବଦରେ ୯ ଲକ୍ଷ ୫୦ ହଜାର ଟଙ୍କା ପ୍ରଦାନ କରାଯାଇଥିବା ଶ୍ରମ କାର୍ଯ୍ୟାଳୟ ତଥ୍ୟ ପ୍ରଦାନ କରିଥିବା ନେଇ ସୂଚନା କର୍ମୀ ଧଳ ଅଭିଯୋଗ କରିଛନ୍ତି । ଏ ସଂକ୍ରାନ୍ତରେ ଯାଜପୁରରୋଡ ଯୁଗ୍ମ ଶ୍ରମ ଆୟୁକ୍ତ ସୁନିଲ କୁମାର ସାହୁଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲା। ହେଲେ ତାହା ସମ୍ଭବ ହୋଇ ପାରିନାହିଁ।
