ଭୁବନେଶ୍ୱର,୨୭।୧୧(ବ୍ୟୁରୋ): ଜାତୀୟ ରାଜପଥ ୨୧୫ କାନୁପୁର ସ୍ପିଲ ଚ୍ୟାନେଲ ଉପରେ ୪ ଲାଇନ ବିଶିଷ୍ଟ ପୋଲ ନିର୍ମାଣ ବିଳମ୍ବ ହେବାରେ ଲାଗିଛି। ଦୀର୍ଘଦିନ ହେବ ଏହି ପୋଲ ନିର୍ମାଣ ହୋଇପାରୁ ନ ଥିବାରୁ ମୁଖ୍ୟମନ୍ତ୍ରୀ ଉଦ୍ବେଗ ପ୍ରକାଶ କରିଛନ୍ତି। ଏହାର ନିର୍ମାଣ ତୁରନ୍ତ ଶେଷ କରିବାକୁ ଗୁରୁବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଚିଠି ଲେଖି କେନ୍ଦ୍ର ଭୂପୃଷ୍ଠ ପରିବହନ, ଜାତୀୟ ରାଜପଥ ମନ୍ତ୍ରୀ ନୀତିନ ଗଡ୍କରୀଙ୍କ ହସ୍ତକ୍ଷେପ ଲୋଡ଼ିଛନ୍ତି।
ମୁଖ୍ୟମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି , ବୈତରଣୀ ନଦୀରେ ଓଡ଼ିଶା ସରକାର କାନୁପୁର ବୃହତ୍ ଜଳସେଚନ ପ୍ରକଳ୍ପ ନିର୍ମାଣ କାର୍ଯ୍ୟ ଆରମ୍ଭ କରିଛନ୍ତି। ଏହାଦ୍ୱାରା ଆଦିବାସୀବହୁଳ କେନ୍ଦୁଝର ଜିଲାର ୨୯,୫୭୮ ହେକ୍ଟର ଜମିକୁ ଜଳସେଚନ ସୁବିଧା ଯୋଗାଇ ଦିଆଯାଇପାରିବ। ଏଆଇବିପି ପାଣ୍ଠିରୁ ଏହି ପ୍ରକଳ୍ପ ପାଇଁ କେନ୍ଦ୍ରୀୟ ସହାୟତା ଯୋଗାଇଦେବାର ବ୍ୟବସ୍ଥା ରହିଛି। ଏହି ପ୍ରକଳ୍ପର ନିର୍ମାଣ କାର୍ଯ୍ୟ ୨୦୦୪-୦୫ରୁ ଆରମ୍ଭ ହୋଇଥିଲେ ମଧ୍ୟ ବିଭିନ୍ନ କାରଣରୁ ଏ ପର୍ଯ୍ୟନ୍ତ ଶେଷ ହୋଇନାହିଁ। ପ୍ରକଳ୍ପର ଅଧିକାଂଶ ଭାଗ କାର୍ଯ୍ୟ ଶେଷ ହୋଇଥିବା ବେଳେ ନଦୀର ସ୍ପିଲ୍ ଚ୍ୟାନେଲ ଉପରେ ରିମୁଳି-ରକ୍ସି-ରାଜମୁଣ୍ଡା ସେକ୍ସନ ଏନ୍ଏଚ୍-୨୧୫ରେ ୪ ଲେନ୍ ବିଶିଷ୍ଟ ଏକ ପୋଲ ନିର୍ମାଣ ହେବାକୁ ରହିଛି। ଏହି ପୋଲ ଉକ୍ତ ପ୍ରକଳ୍ପ ପାଇଁ ସମସ୍ୟା ସୃଷ୍ଟି କରିଛି। ବିଭିନ୍ନ ସ୍ତରରେ ବହୁବାର ବୈଠକ ହେବା ପରେ ମଧ୍ୟ ଏନ୍ଏଚ୍ଏଆଇ ଉକ୍ତ କାର୍ଯ୍ୟ ଆରମ୍ଭ କରିନାହିଁ। ଏହି ପୋଲର ଅଟକଳ ପ୍ରଥମେ ୪୦.୬୮ କୋଟି ଟଙ୍କା ଧାର୍ଯ୍ୟ କରାଯାଇଥିଲା। ଏନ୍ଏଚ୍ଏଆଇ ସେଥିରୁ ୮୦ ପ୍ରତିଶତ ଖର୍ଚ୍ଚ ବହନ କରିବାକୁ ରାଜି ହୋଇଥିଲା। ପରେ ଭୌଗୋଳିକ ପରିସ୍ଥିତିକୁ ଦେଖି ପୋଲ ଡିଜାଇନ ପରିବର୍ତ୍ତନ କରାଯାଇଥିଲା। ଏଥିପାଇଁ ୧୦୦.୫୩ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଥିଲା। ତେବେ ସଂଶୋଧିତ ଅର୍ଥର ୮୦ ପ୍ରତିଶତ ବହନ କରିବାକୁ ଏନ୍ଏଚ୍ଏଆଇ ରାଜି ହେଉନାହିଁ। ଏ ନେଇ ୨୦୧୯ ମାର୍ଚ୍ଚ ୭ରେ ନୂଆଦିଲ୍ଲୀଠାରେ ବୈଠକ ହୋଇଥିଲେ ମଧ୍ୟ ଏନ୍ଏଚ୍ଏଆଇ ସଂଶୋଧିତ ପ୍ରକଳ୍ପ ମୂଲ୍ୟର ୮୦ ପ୍ରତିଶତ ବହନ କରିବାକୁ ସମ୍ମତି ପ୍ରକାଶ କରୁନାହିଁ। ଜିଲାର ଅର୍ଥନୈତିକ ବିକାଶ ପାଇଁ ଉକ୍ତ ପୋଲ ନିର୍ମାଣ କାର୍ଯ୍ୟ ଶୀଘ୍ର ଶେଷ କରିବା ଆବଶ୍ୟକ। ଏହି ପୋଲ ରାଜ୍ୟ ନୁହେଁ, କେନ୍ଦ୍ର ସରକାରଙ୍କ ପାଇଁ ମଧ୍ୟ ଜରୁରୀ। ତୁରନ୍ତ ନିର୍ମାଣ କାର୍ଯ୍ୟ ଆରମ୍ଭ କରା ନ ଗଲେ ଜଳସେଚନ ପ୍ରକଳ୍ପର ଖର୍ଚ୍ଚ ମୂଲ୍ୟ ବଢ଼ିଯିବ। ତୁରନ୍ତ ଏଥିରେ ହସ୍ତକ୍ଷେପ କରିବାକୁ ମୁଖ୍ୟମନ୍ତ୍ରୀ ଗଡ୍କରୀଙ୍କୁ ଅନୁରୋଧ କରିଛନ୍ତି।
