ଚଣ୍ଡିଖୋଲ,୩୦ା୩(ପ୍ରଦୀପ୍ତ କୁମାର ପୃଷ୍ଟି): ଯାଜପୁର ଜିଲାର ଏକ ପ୍ରମୁଖ ନିବାଚନମଣ୍ଡଳୀ ଭାବେ ବଡ଼ଚଣା ବିଧାନସଭା କ୍ଷେତ୍ର ପରିଗଣିତ। ଯାଜପୁର ଜିଲାର ପ୍ରବେଶ ଦ୍ୱାର ଭାବରେ ସଦାସର୍ବଦା ଏହା ଚର୍ଚ୍ଚାରେ ଥାଏ। ତେବେ ୨୦୨୪ ନିର୍ବାଚନରେ କାହାକୁ ଦଳ ପକ୍ଷରୁ ପ୍ରାର୍ଥୀ କରାଯିବ ତାକୁ ନେଇ ଅଙ୍କକଶା ଆରମ୍ଭ ହୋଇଛି। ବହୁ ଆଶାୟୀ ପ୍ରାର୍ଥୀ ଥିବାବେଳେ ପ୍ରଦେଶ କଂଗ୍ରେସ କମିଟି ଉପସଭାପତି ଶୁଭେନ୍ଦୁ ମହାନ୍ତି ଓ ଗତଥର ଏଠାରୁ ପ୍ରାର୍ଥୀ ହୋଇଥିବା ଅଜୟ କୁମାର ସାମଲଙ୍କ ମଧ୍ୟରୁ କିଏ ପ୍ରାର୍ଥୀ ହେବ ତାହା ଜଣାପଡ଼ିନାହିଁ। ୨୦୦୯ ବିଧାନ ସଭା ନିର୍ବାଚନ ପରେ ପ୍ରତ୍ୟେକ ଥର ଏଠାରୁ ପ୍ରାର୍ଥୀ ବଦଳ ପ୍ରକ୍ରିୟା ଚାଲିଛି। ଏପରିକି ଟିକେଟ ପାଇବା ପରେ ଟିକେଟ ଫେରସ୍ତ କରିଛନ୍ତି ପ୍ରାର୍ଥୀ। ୧୯୭୭ରୁ ୨୦୦୯ ପର୍ଯ୍ୟନ୍ତ ସୀତାକାନ୍ତ ମହାପାତ୍ର ଏଠାରୁ କଂଗ୍ରେସରୁ ନିର୍ବାଚନ ଲଢି ୩ ଥର ବିଜୟୀ ହୋଇଥିଲେ। ସେ ୧୯୮୦, ୧୯୮୫ ଓ ୨୦୦୪ରେ ବିଜୟୀ ହୋଇ ବିଧାନ ସଭାରେ ପ୍ରତିନିଧିତ୍ୱ କରିଥିଲେ। ଏହାପରେ ୨୦୦୯ରେ ତାଙ୍କ ଉପରେ ଦଳ ଭରସା କରି ତାଙ୍କୁ ଟିକେଟ ଦେଇଥିଲା। ସେତେବେଳର କଂଗ୍ରେସ ଯୁବନେତା ଜନ୍ମେଜୟ ଲେଙ୍କାଙ୍କୁ କଂଗ୍ରେସ ପକ୍ଷରୁ ଧର୍ମଶାଳା ବିଧାନସଭା ନିର୍ବାଚନମଣ୍ଡଳୀରୁ ଟିକେଟ ପ୍ରଦାନ କରାଯାଇଥିଲା।
ଧର୍ମଶାଳା ନିର୍ବାଚନମଣ୍ଡଳୀରୁ ଲଢ଼ିବା ପାଇଁ ମନା କରି ଟିକେଟ ଫେରାଇ ଦେଇ ବଡ଼ଚଣାରୁ ସ୍ବାଧୀନ ପ୍ରାର୍ଥୀ ଭାବେ ଲଢ଼ିଥିଲେ। ସ୍ବାଧୀନ ଭାବରେ ଲଢି ସେ ୨୫,୪୦୯ ଭୋଟ ପାଇଥିଲେ। ପରବର୍ତ୍ତୀ ସମୟରେ ୨୦୧୪ରେ ସୀତାକାନ୍ତ ମହାପାତ୍ରଙ୍କୁ ଦଳ ଟିକେଟ ନ ଦେଇ ଜନ୍ମଜେୟ ଲେଙ୍କାଙ୍କୁ ଟିକେଟ ଦେଇଥିଲା। ହେଲେ ଜନ୍ମେଜୟ ନିର୍ବାଚନ ଲଢି ହାରି ଯାଇଥିଲେ। ୨୦୧୪ରେ ସୀତାକାନ୍ତ ମହାପାତ୍ରଙ୍କ ପୁତ୍ର କ୍ୟାପଟେନ ରାଜନାରାୟଣ ମହାପାତ୍ର ସ୍ବାଧୀନ ଭାବରେ ଲଢି ୫୦୪୮ ଖଣ୍ଡ ଭୋଟ ପାଇଥିଲେ। ୨୦୧୯ରେ ନିର୍ବାଚନ ଅବ୍ୟବହିତ ପୂର୍ବରୁ ଜନ୍ମେଜୟ କଂଗ୍ରେସ ଛାଡି ବିଜେଡିରେ ଯୋଗ ଦେଇଥିଲେ। ଶେଷ ମୁହୂର୍ତ୍ତରେ ପୁନର୍ବାର ସୀତାକାନ୍ତ ମହାପାତ୍ରଙ୍କୁ ଦଳ ଟିକେଟ ଦେବାରୁ ସେ ଟିକେଟ ଫେରସ୍ତ କରି ଦେଇଥିଲେ। ଦଳ ପକ୍ଷରୁ ଅନ୍ୟ ଉପାୟ ନ ପାଇ ଶେଷରେ ଅଜୟ କୁମାର ସାମଲଙ୍କୁ ଦଳ ପ୍ରାର୍ଥୀ କରିଥିଲା। ଏପରିକି ସମୟ କମଥିବାରୁ ସେତେବେଳେ ଶୁଭେନ୍ଦୁ ମହାନ୍ତି ମଧ୍ୟ ନିର୍ବାଚନ ଲଢ଼ିବାକୁ ମନା କରି ଦେଇଥିଲେ। ୨୦୧୯ ନିର୍ବାଚନ ସରିବା ପରେ ରାଜନାରାୟଣ ମହାପାତ୍ର ଧୀରେଧୀରେ କଂଗ୍ରେସର ନେତୃତ୍ୱ ନେଇ ସଂଗଠନ ବୃଦ୍ଧି କରି ଚାଲିଥିଲେ। ହେଲେ ୨୦୨୪ ନିର୍ବାଚନ ଘୋଷଣା ହେବା ପୂର୍ବରୁ ସେ କଂଗ୍ରେସରୁ ଇସ୍ତଫା ଦେଇଛନ୍ତି।
୬ ତାରିଖରେ ସେ ଦଳରୁ ଇସ୍ତଫା କରିବା ପରେ ଏବେ କାହା ଉପରେ ଦଳ ଭରସା କରିବ ତାକୁ ନେଇ ଦଳୀୟ କର୍ମୀ ଅପେକ୍ଷା କରିଛନ୍ତି। ଗତ ୪ଟି ନିର୍ବାଚନକୁ ଅନୁଧ୍ୟାନ କଲେ କଂଗ୍ରେସ ନେତାମାନେ ଦଳ ଉପରେ ଭରସା କରି ପାରୁନାହାନ୍ତି। ଯେଉଁଥି ପାଇଁ ଟିକେଟ ଫେରସ୍ତ ଓ ନିର୍ବାଚନ ପୂର୍ବରୁ ଦଳ ଛାଡ଼ିବା ନେତାମାନଙ୍କର ଅଭ୍ୟାସ ହୋଇ ଯାଇଛି। ଫଳରେ ଧୀରେଧୀରେ କଂଗ୍ରେସ ଦୁର୍ବଳ ହେବାରେ ଲାଗିଛି ବୋଲି କୁହାଯାଉଛି।
