ଢେଙ୍କାନାଳ ଅଫିସ,୧୯।୮: ଲଗାଣବର୍ଷା ହେଲେ ଢେଙ୍କାନାଳର ଐତିହାସିକ କୁଞ୍ଜକାନ୍ତ ପୋଖରୀର ଚିତ୍ର ବଦଳିଯାଉଛି। ପାଣି ନିଷ୍କାସନ ହୋଇ ନ ପାରି ୩ନଂ. ଓ୍ବାର୍ଡରେ ପ୍ରବାହିତ ହେଉଛି। ଏହି କାରଣରୁ ରାସ୍ତାଘାଟ କ୍ଷତିଗ୍ରସ୍ତ ହେଉଥିବାବେଳେ ପ୍ରଭାବିତ ହେଉଛି ସାଧାରଣ ଲୋକଙ୍କ ଜୀବନଯାତ୍ରା। ଲଘୁଚାପ ପ୍ରଭାବରେ ହୋଇଥିବା ପ୍ରବଳ ବର୍ଷାରେ ଗତ ୧୨ ତାରିଖରୁ ଏଭଳି ସ୍ଥିତି ଉତ୍ପନ୍ନ ହୋଇଥିଲା। ଏ ନେଇ ଗଣମାଧ୍ୟମରେ ଖବର ପ୍ରସାରିତ ହେବା ପରେ ପୌର ପ୍ରଶାସନର ଚିନ୍ତା ବଢ଼ିଛି। ଗୁରୁବାର ପୂର୍ବାହ୍ନରେ ପୌରାଧ୍ୟକ୍ଷା ଜୟନ୍ତୀ ପାତ୍ର ପୋଖରୀ ଉଛୁଳୁଥିବା ସ୍ଥାନ ପରିଦର୍ଶନ କରିଛନ୍ତି। ସମସ୍ୟାର ସମାଧାନ ଲାଗି ତୁରନ୍ତ ବ୍ୟବସ୍ଥା କରିବାକୁ ସେ ପ୍ରତିଶ୍ରୁତି ଦେଇଛନ୍ତି।
ଢେଙ୍କାନାଳ ସହରବାସୀଙ୍କ ଭାବାବେଗ ସହିତ ଜଡ଼ିତ କୁଞ୍ଜକାନ୍ତ ପୋଖରୀ। ଏହା ଯେତିକି ପ୍ରାଚୀନ, ସେତିକି ଐତିହ୍ୟସମ୍ପନ୍ନ ମଧ୍ୟ। ଆଧ୍ୟାତ୍ମିକ ଦୃଷ୍ଟିକୋଣରୁ ମଧ୍ୟ ଏହା ଗୁରୁତ୍ୱପୂର୍ଣ୍ଣ। ଏହା ଉପରେ ନିର୍ଭରଶୀଳ ୩ନଂ. ଓ୍ବାର୍ଡବାସୀ। ତେବେ ଏହି ବିଶାଳକାୟ ଜଳାଶୟ ଚାରିପଟେ ଜନବସତି ଗଢ଼ି ଉଠିଛି। ଉପଯୁକ୍ତ ପରିଚାଳନା ଓ ରକ୍ଷଣାବେକ୍ଷଣ ଅଭାବରୁ ଜଳ ନିଷ୍କାସନ ପାଇଁ ରହିଥିବା ଆଉଟ୍ଲେଟ୍ଗୁଡ଼ିକ ପୋତି ହୋଇଗଲାଣି। ଫଳରେ ଲଗାଣବର୍ଷାରେ ପୋଖରୀ ଭର୍ତ୍ତି ହୋଇଗଲେ ପାଣି ୩ନଂ. ଓ୍ବାର୍ଡ ପାର୍ଶ୍ୱରେ ଉଛୁଳି ଉଠୁଛି, ଯାହାକୁ ନେଇ ଅଞ୍ଚଳବାସୀ ହନ୍ତସନ୍ତ ହେଉଛନ୍ତି। ଏହାକୁ ନେଇ ଅସନ୍ତୋଷ ତୀବ୍ର ହେବା ପରେ ସମସ୍ୟାର ସମାଧାନ ଲାଗି ଗୁରୁବାର ପୌରାଧ୍ୟକ୍ଷା ପାତ୍ର ଏବଂ ପୌରଯନ୍ତ୍ରୀ ରଶ୍ମିତା ମିଶ୍ର ପୋଖରୀ ପରିଦର୍ଶନ କରି ସ୍ଥାନୀୟ କାଉନ୍ସିଲର ଅଭିମନ୍ୟୁ ପଣ୍ଡାଙ୍କ ସହ ଆଲୋଚନା କରିଛନ୍ତି। କାଉନ୍ସିଲର ପଣ୍ଡା ଆଉଟ୍ଲେଟ୍ ସମସ୍ୟା ସମ୍ପର୍କରେ ବିସ୍ତୃତ ଭାବେ ପୌରାଧ୍ୟକ୍ଷାଙ୍କ ସହ ଆଲୋଚନା କରିଥିଲେ। ଏ ନେଇ ତହସିଲ କର୍ତ୍ତୃପକ୍ଷଙ୍କୁ ପତ୍ର ମାଧ୍ୟମରେ ଅବଗତ କରାଯିବ। ଆଲୋଚନା ପରେ ପୋଖରୀ ନିକଟରେ ଥିବା ସରକାରୀ ଜମି ଚିହ୍ନଟ କରାଯାଇ ଆଉଟ୍ଲେଟ୍ ନିର୍ମାଣ କରାଯିବ। ପୋଖରୀରୁ ଯେପରି ଜଳ ନିଷ୍କାସନ ଠିକ୍ ଭାବେ ହୋଇପାରିବ ସେ ଦିଗରେ ପଦକ୍ଷେପ ନିଆଯିବ ବୋଲି ପୌରାଧ୍ୟକ୍ଷା ସୂଚନା ଦେଇଛନ୍ତି। ସେହିପରି ପୌରାଧ୍ୟକ୍ଷା ୧୦ନଂ. ଓ୍ବାର୍ଡ ପରିଦର୍ଶନ କରି ରାସ୍ତାଘାଟ ଓ ଡ୍ରେନ୍ ସମସ୍ୟା ସମ୍ପର୍କରେ କାଉନ୍ସିଲର ସୁମିତ୍ରା ମଲ୍ଲିକଙ୍କ ସହ ବିସ୍ତୃତ ଆଲୋଚନା କରିଛନ୍ତି।
