କେସିଙ୍ଗା,୧୩।୪(ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକ ବାଲସି ଗ୍ରାମପଞ୍ଚୟତ ବାଲସି ଗ୍ରାମରେ ନିର୍ମାଣାଧୀନ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ନିମ୍ନମାନର କାମ ଓ ବିନା ସୂଚନା ଫଳକରେ ଚାଲିଛି। ଏ ନେଇ ଗ୍ରାମବାସୀ ସିଡିଏମଓଙ୍କ ନିକଟରେ ଅଭିଯୋଗ କରାଯାଇଛି। ଏହି କାମରେ ଶିଶୁ ଶ୍ରମିକଙ୍କୁ ମଧ୍ୟ ନିୟୋଜିତ କରାଯାଇଥିବା ଅଭିଯୋଗ ହେଉଛି। ବାଲସି ଗ୍ରାମରେ ସ୍ବାସ୍ଥ୍ୟସେବା ବ୍ୟବସ୍ଥା ଭୁଶୁଡି ପଡ଼ିଥିବାରୁ ଗ୍ରାମବାସୀ ସ୍ବାସ୍ଥ୍ୟସେବା ପାଇବାରୁ ବଞ୍ଚତ୍ତ ହେଉଛନ୍ତି। ସୂଚନାଯୋଗ୍ୟ ଯେ, ୨୦୨୨ ଅକ୍ଟୋବରରୁ ଗ୍ରାମପଞ୍ଚାୟତ କାର୍ଯ୍ୟାଳୟ ନିକଟରେ ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ନିର୍ମାଣ କାମ ଚାଲିଛି। ଉକ୍ତ ବିଲ୍ଡିଂଗର ଫାଉଣ୍ଡେଶନ ଖୋଳାଠାରୁ କେନ୍ଦ୍ରର କାମ ସରିବାକୁ ବସିଲାଣି ହେଲେ ସୂଚନା ଫଳକ ଲେଖାଯାଇ ନାହିଁ। ଫଳରେ ଏହା କେଉଁ ବିଭାଗ ଦ୍ୱାରା, କେତେ ଟଙ୍କା, କାର୍ଯ୍ୟ ଆରମ୍ଭ ଏବଂ ଶେଷ ତାରିଖ ସମ୍ପର୍କରେ କୌଣସି ସୂଚନା ଲୋକେ ଜାଣିପାରୁନାହାନ୍ତି। ଏହି କେନ୍ଦ୍ର ପରିସରରେ ଗୋଟିଏ ହଲ, ଶୌଚାଳୟ, ଏକ ଶଯ୍ୟା, ବାରଣ୍ଡା, ରୋଷେଇ ଘର ରହିଛି। ଅତିନିମ୍ନମାନର ଭାବେ ଫାଉଣ୍ଡେଶନ କାମ ହେବା ସହ ସ୍ଲାପ, କଲମରେ ନିମ୍ନମାନର ଲୁହାଛଡ଼ ଲଗାଯାଇଥିବା ଅଭିଯୋଗ ହୋଇଛି। ବାଲି, ଚିପ୍ସ କମ ପରିମାଣରେ ସିମେଣ୍ଟ ମିଶାଇ ବିଲ୍ଡିଂଗ କାମ କରାଯାଇଛି। ଆଜକୁ ୩ ମାସ ହେଲାଣି ବିଲ୍ଡିଂଗ ପରିସରରେ ଏକ ନଳ କୂପ ଖୋଲାଯାଇଛି। କିନ୍ତୁ ବିଦ୍ୟୁତ୍ ସଂଯୋଗ କରାଯାଇ ନ ଥିବାରୁ ସିମେଣ୍ଟ ଇଟାରେ ନିର୍ମିତ ଉକ୍ତ କେନ୍ଦ୍ରରେ ପାଣି ସିଞ୍ଚନ କରାଯାଉ ନାହିଁ। ୨୦୦୩-୪ ଆର୍ଥିକ ବର୍ଷରେ ବାଲସି ଏମଇ ସ୍କୁଲ ନିକଟରେ ଉପ ସ୍ବାସ୍ଥ୍ୟକେନ୍ଦ୍ର ଅତିନିମ୍ନମନର ଭାବେ ନିର୍ମାଣ କରାଯାଇଥିଲା। ଯାହା ଆଜକୁ ୨୦ ବର୍ଷ ହେଲା ଗୋଟିଏ ବିଲ୍ଡିଂଗ ଭାଙ୍ଗି ନଷ୍ଟ ହେଇଛି। ଅତିନିମ୍ନମାନର ଭାବେ ନିର୍ମାଣ କରାଯାଇଥିବାରୁ ବର୍ଷା ଋତୁରେ ପାଣି ଗଳି ଭାଙ୍ଗି ନଷ୍ଟ ହେଇଯାଇଛି। ସ୍ବାସ୍ଥ୍ୟ କର୍ମୀ ରହିବା ପାଇଁ ଘର ନ ଥିବାରୁ ଅସ୍ଥାୟୀ ଭାବେ ବାଲସି ଗ୍ରାମପଞ୍ଚାୟତ ଏକ ପ୍ରକୋଷ୍ଠରେ ସ୍ବାସ୍ଥ୍ୟ କର୍ମୀ ରହି କାମ କରୁଛନ୍ତି। ଗ୍ରାମବାସୀ ବହୁବାର ସିଡିଏମଓଙ୍କୁ ଲିଖିତ ଅଭିଯୋଗ ପରେ ଏହି ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର ପାଇଁ ଅର୍ଥ ମଞ୍ଜୁରୀ କରିଛନ୍ତି। ଠିକାଦାରଙ୍କ ମୁନ୍ସୀଙ୍କ ଦ୍ୱାରା ନିମ୍ନମାନର କାମ ଚାଲିଛି। ଏହି ବିଲ୍ଡିଂଗ ମଧ୍ୟ ୧୫ ରୁ୨୦ ବର୍ଷ ମଧ୍ୟରେ ଭାଙ୍ଗି ନଷ୍ଟ ହେବାର ସମ୍ଭାବନା ରହିଛି। ସେହିପରି କାଣ୍ଡେଲ ଗ୍ରାମରେ ମଧ୍ୟ ତଦୃପ ଚାଲିଛି ସ୍ବାସ୍ଥ୍ୟ ଆରୋଗ୍ୟ କେନ୍ଦ୍ର। ଆଜକୁ ଏକ ବର୍ଷରୁ ଊଦ୍ଧର୍ବ ହେଲାଣି ଭୁତ କୋଠି ପରି ପଡିରହିଛି। ମନ୍ଥର ଗତି ନିମ୍ନମାନର କାମ ଚାଲିଥିବାରୁ କାଣ୍ଡେଲ ଗ୍ରାମ ସାସ୍ଥ୍ୟ କର୍ମୀ ମଧ୍ୟ କାମ କରିବା ଓ ରହିବାରେ ଘୋର ସମସ୍ୟା ସମ୍ମୁଖୀନ ହେଉଛନ୍ତି। ଏ ନେଇ କଳାହାଣ୍ଡି ସିଡିଏମଓଙ୍କୁ ପଚାରିବାରୁ ବିଲ୍ଡିଂଗ ଦାୟିତ୍ୱରେ ଥିବା ବିପିଏମଙ୍କୁ ଗୁରୁବାର ପଠାଇବି ବୋଲି ପ୍ରକାଶ କରିଥିଲେ।
