କାଠମାଣ୍ଡୁ,୨୭।୨: ନେପାଳର ଦ୍ୱିତୀୟ ବୃହତ୍ ରାଜନୈତିକ ଦଳ ପୂର୍ବତନ ପ୍ରଧାନମନ୍ତ୍ରୀ କେ.ପି.ଶର୍ମା ଓଲିଙ୍କ ସିପିଏନ୍-ୟୁଏମ୍ଏଲ୍ ପୁଷ୍ପ କୁମାର ଦହଲ ‘ପ୍ରଚଣ୍ଡ’ଙ୍କ ନେତୃତ୍ୱାଧୀନ ସରକାରରୁ ସମର୍ଥନ ପ୍ରତ୍ୟାହାର କରିନେଇଛି। ଫଳରେ ନେପାଳରେ ଦୁଇ ମାସ ହେଲା ଗଢ଼ା ହୋଇଥିବା ମେଣ୍ଟ ସରକାର ଏବେ ସଙ୍କଟରେ ପଡ଼ିଯାଇଛି। ରାଷ୍ଟ୍ରପତି ନିର୍ବାଚନ ବେଳେ ରାଜନୈତିକ ସମୀକରଣରେ ପରିବର୍ତ୍ତନକୁ ନେଇ ଓଲିଙ୍କ ଦଳ ଏଭଳି ନିଷ୍ପତ୍ତି ନେଇଛି। ୭ଦଳକୁ ନେଇ ମେଣ୍ଟ ସରକାର ଗଢ଼ା ହୋଇଥିବା ବେଳେ ଡିସେମ୍ବର ୨୫ରେ କରାଯାଇଥିବା ଚୁକ୍ତିନାମାକୁ ପ୍ରଧାନମନ୍ତ୍ରୀ ପ୍ରଚଣ୍ଡ ଉଲ୍ଲଂଘନ କରିଥିବା ସିପିଏନ୍-ୟୁଏମ୍ଏଲ୍ ଅଭିଯୋଗ କରିଛି। ସୋମବାର ଓଲିଙ୍କ ଅଧ୍ୟକ୍ଷତାରେ ସିପିଏନ୍-ୟୁଏମ୍ଏଲ୍ର ଉଚ୍ଚସ୍ତରୀୟ ବୈଠକ ବସି ସରକାରରୁ ଓହରିଯିବା ସହ ସମର୍ଥନ ପ୍ରତ୍ୟାହାର କରିବାକୁ ନିଷ୍ପତ୍ତି ନିଆଯାଇଥିଲା ବୋଲି ଦଳର ଉପମୁଖ୍ୟ ବିଷ୍ଣୁ ରାଜାଲ କହିଛନ୍ତି। ପ୍ରଚଣ୍ଡ ଏବଂ ଓଲିଙ୍କ ଦଳ ମଧ୍ୟରେ ମେଣ୍ଟ ଭାଙ୍ଗିବାର ମୁଖ୍ୟ କାରଣ ହେଲା ମାଓବାଦୀ ନେତା ରାଷ୍ଟ୍ରପତି ପଦ ନିମନ୍ତେ ନେପାଳୀ କଂଗ୍ରେସ(ଏନ୍ସି)ର ବରିଷ୍ଠ ନେତା ରାମଚନ୍ଦ୍ର ପୌଡେଲଙ୍କ ପ୍ରାର୍ଥତ୍ତ୍ୱକୁ ସମର୍ଥନ ଜଣାଇବା। ମାର୍ଚ୍ଚ ୯ରେ ହେବାକୁ ଥିବା ରାଷ୍ଟ୍ରପତି ନିର୍ବାଚନ ଲାଗି ପୌଡେଲ ବିରୋଧୀ ଦଳ ଏନ୍ସି ପ୍ରାର୍ଥୀ ହୋଇଥିବା ବେଳେ ତାଙ୍କୁ ପ୍ରଧାନମନ୍ତ୍ରୀ ସମର୍ଥନ ଜଣାଇ ଡିସେମ୍ବର ୨୫ ଚୁକ୍ତିନାମାର ଉଲ୍ଲଂଘନ କରିବା ସହ ସିପିଏନ୍-ୟୁଏମ୍ଏଲ୍କୁ ପ୍ରତାରିତ କରିଛନ୍ତି। ସେଥିପାଇଁ ସରକାରରୁ ଓହରିଯିବାକୁ ବାଧ୍ୟ ହେଲୁ ବୋଲି ସିପିଏନ୍-ୟୁଏମ୍ଏଲ୍ ଉପମୁଖ୍ୟ କହିଛନ୍ତି। ସରକାରରେ ଉପପ୍ରଧାନମନ୍ତ୍ରୀ ତଥା ଅର୍ଥମନ୍ତ୍ରୀ ଥିବା ବିଷ୍ଣୁ ପୌଡ୍ୟାଲ ଏବଂ ବହିର୍ବ୍ୟାପାର ମନ୍ତ୍ରୀ ମିବଳ ରାୟ ପୌଡ୍ୟାଲ୍ ଇସ୍ତଫା ଦେବାକୁ ଯାଉଛନ୍ତି। ପ୍ରଚଣ୍ଡ ସରକାରରେ ଉପପ୍ରଧାନମନ୍ତ୍ରୀଙ୍କ ସମେତ ୮ ମନ୍ତ୍ରୀ ରହିଥିଲେ। ସେମାନେ ସମୂହ ଇସ୍ତଫା ପ୍ରଦାନ କରିବେ।
