ବୋଗୋଟା,୨୦ ।୩: ସାଉଥ ଆମେରିକା ଦେଶ କଲମ୍ବିଆରେ ରବିବାର ଏକ ସେନା ହେଲିକପ୍ଟର କ୍ରାସ ହୋଇଯାଇଛି । ମିଳିଥିବା ସୂଚନା ଅନୁଯାୟୀ, ହେଲିକପ୍ଟରେ ଥିବା ୪ ଜଣ ସେନାଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି । କଲମ୍ବିଆର ରାଷ୍ଟ୍ରପତି ଗୁସ୍ତାଭୋ ପେଟ୍ରୋ ଦୁର୍ଘଟଣାକୁ ସ୍ପଷ୍ଟ କରିଥିବା ବେଳେ କହିଛନ୍ତି ଏଥିରେ କେହି ବି ଜୀବିତ ନାହାନ୍ତି । ପେଟ୍ରୋ ମୃତ ଅଧିକାରୀଙ୍କ ପରିବାର ପ୍ରତି ସମବେଦନା ଜଣାଇଛନ୍ତି ।
ଜଏଣ୍ଟ ଟାସ୍କ ଫୋର୍ସ ଟାଇଟନର କମାଣ୍ଡର, କର୍ନଲ ହେକ୍ଟର ଅଲଫୋସେ କ୍ୟାଂଡେଲାରିୟୋ କହିଛନ୍ତି, ଦୁର୍ଘଟଣାରେ ହେଲିକପ୍ଟରଟି ସମ୍ପୂର୍ଣ୍ଣ ଭାବେ ଜଳିଯାଇଛି । ସୂଚନା ମୁତାବକ ମୃତ ଅଧିକାରୀ ହେଲେ ହେକ୍ଟର ଜେରେଜ ଓକୋଆ, ଜୁଲିୟସ ଗାର୍ସିୟା, ଜୋହାନ ଅରୋଜକୋ ଓ ରୁବେନ ଲେଗୁଇଜାମୋନ ।
ଦୁର୍ଘଟଣାକୁ ନେଇ କିଛି କାରଣ କୁହାଯାଉଥିବା ବେଳେ ସ୍ଥାନୀୟ ଲୋକେ କହିଛନ୍ତି ଖରାପ ପାଗ ଯୋଗୁ ଏଭଳି ହୋଇଛି । ହେଲେ ସେନା ଅଧିକାରୀଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଦୁର୍ଘଟଣାର କାରଣକୁ ଜାଣିବାକୁ ଯାଞ୍ଚ ଆରମ୍ଭ କରାଯାଇଛି ।
