ନୂଆଦିଲ୍ଲୀ,୧୦ା୧୨: ସୂଚନା ଅଧିକାର ଆଇନ ବଳରେ କଲେଜିୟମର ୨୦୧୮ ଡିସେମ୍ବର ୧୨ ତାରିଖ ବୈଠକର ସବିଶେଷ ବିବରଣୀ ପ୍ରଦାନ ଲାଗି ହୋଇଥିବା ଆବେଦନକୁ ସୁପ୍ରିମକୋର୍ଟ ଶୁକ୍ରବାର ଖାରଜ କରିଦେଇଛନ୍ତି। ବହୁସଦସ୍ୟ ବିଶିଷ୍ଟ କଲେଜିୟମର ପରୀକ୍ଷାମୂଳକ ନିଷ୍ପତ୍ତିକୁ ସର୍ବସାଧାରଣରେ ପ୍ରକାଶ କରାଯାଇପାରିବ ନାହିଁ ବୋଲି ସର୍ବୋଚ୍ଚ ଅଦାଲତ କହିଛନ୍ତି। ପ୍ରସ୍ତାବରେ କଲେଜିୟମର ସମସ୍ତ ସଦସ୍ୟ ସ୍ବାକ୍ଷର କରିବା ପରେ ଏହା ଚୂଡ଼ାନ୍ତ ନିଷ୍ପତ୍ତି ହୋଇପାରିବ ବୋଲି ଜଷ୍ଟିସ୍ ଏମ୍.ଆର୍. ଶାହା ଏବଂ ସି.ଟି. ରବିକୁମାରଙ୍କ ଖଣ୍ଡପୀଠ କହିଛନ୍ତି। ପରୀକ୍ଷାମୂଳକ ପ୍ରସ୍ତାବଗୁଡ଼ିକ ସଦସ୍ୟମାନଙ୍କ ମଧ୍ୟରେ ଆଲୋଚନା ଓ ପରାମର୍ଶ ପାଇଁ ଅଣାଯାଇଥାଏ। ସେଗୁଡ଼ିକୁ ଚୂଡ଼ାନ୍ତ ନିଷ୍ପତ୍ତି କୁହାଯାଇପାରିବ ନାହିଁ। ୨୦୧୮ ଡିସେମ୍ବର ୧୨କଲେଜିୟମ ବୈଠକରେ କେତେଜଣ ବିଚାରପତିଙ୍କ ନାମକୁ ନେଇ ଆଲୋଚନା ହୋଇଥିଲେ ହେଁ ଚୂଡ଼ାନ୍ତ ନିଷ୍ପତ୍ତି ହୋଇପାରି ନ ଥିଲା। ଉକ୍ତ ବୈଠକର ସବିଶେଷ ତଥ୍ୟ ଜାଣିବା ପାଇଁ ଆର୍ଟିଆଇ କର୍ମୀ ଅଞ୍ଜଳି ଭରଦ୍ୱାଜ କରିଥିବା ଆବେଦନ ଦିଲ୍ଲୀ ହାଇକୋର୍ଟରେ ଖାରଜ ହୋଇଯିବା ପରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ଧର୍ମୀୟ ଶୋଭାଯାତ୍ରା ନିୟନ୍ତ୍ରଣ ଆବେଦନ ଖାରଜ
ଦେଶରେ ଧର୍ମୀୟ ଶୋଭାଯାତ୍ରାଗୁଡ଼ିକୁ ନିୟନ୍ତ୍ରଣ କରିବା ଲାଗି ନିର୍ଦ୍ଦେଶ ଦେବା ନିମନ୍ତେ ହୋଇଥିବା ଜନସ୍ବାର୍ଥ ମାମଲାକୁ ସୁପ୍ରିମକୋର୍ଟ ଶୁକ୍ରବାର ଖାରଜ କରିଦେଇଛନ୍ତି। ସିଟିଜେନ୍ସ ଫର୍ ଜଷ୍ଟିସ୍ ଆଣ୍ଡ ପିସ୍ ନାମକ ଏନ୍ଜିଓ ପକ୍ଷରୁ ଏହି ପିଆଇଏଲ୍ ଦାଏର କରାଯାଇଥିଲା। ସମସ୍ତ ଧର୍ମୀୟ ଶୋଭାଯାତ୍ରାକୁ ଦଙ୍ଗାର ଉତ୍ସ ଭାବେ ଚିତ୍ରଣ ନ କରିବାକୁ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ୍ ପି.ଏସ୍. ନରସିଂହଙ୍କ ଖଣ୍ଡପୀଠ କହିଛନ୍ତି। ଆଇନ ଶୃଙ୍ଖଳା ରାଜ୍ୟ ପ୍ରସଙ୍ଗ। ସବୁ ଅଞ୍ଚଳର ଆଇନ ଶୃଙ୍ଖଳା ମଧ୍ୟକୁ ସୁପ୍ରିମକୋର୍ଟଙ୍କୁ ଟଣାଯାଇପାରିବ ନାହିଁ ବୋଲି ଖଣ୍ଡପୀଠ କହିଛନ୍ତି। ଏନ୍ଜିଓ ପକ୍ଷରୁ ବରିଷ୍ଠ ଆଇନଜୀବୀ ସି.ୟୁ. ସିଂ ଅଦାଲତଙ୍କୁ କହିଥିଲେ, ଧର୍ମୀୟ ଉତ୍ସବ ବେଳେ ଶୋଭାଯାତ୍ରାରେ ଖଣ୍ଡା ଆଦି ଅସ୍ତ୍ରକୁ ସାମିଲ କରାଯାଉଛି। ଏଗୁଡ଼ିକ ଉପରେ ନିୟନ୍ତ୍ରଣ ଲାଗି ଗାଇଡ୍ଲାଇନ ଆବଶ୍ୟକ ବୋଲି ସେ ଯୁକ୍ତି ବାଢ଼ିଥିଲେ।
