ନାଉଗଁା,୧୦ା୧୨(ସ୍ବ.ପ୍ର.): ନାଉଗଁା ବ୍ଲକର ୧୧୯ଟି ଅଙ୍ଗନୱାଡି କେନ୍ଦ୍ର ମଧ୍ୟରୁ ୪୨ ଅଙ୍ଗନୱାଡି କେନ୍ଦ୍ରକୁ ବିଦ୍ୟୁତିକରଣ କରାଯାଇଛି। ମାତ୍ର ଦାୟିତ୍ୱରେ ଥିବା ଠିକାଦାରଙ୍କ ମନମୁଖି କାମ ଯୋଗୁ କୁନି ପିଲାଙ୍କ ଜୀବନ ପ୍ରତି ବିପଦ ଆଶଙ୍କା ରହିଛି। ସିଡିପିଓଙ୍କ କାର୍ଯ୍ୟାଳୟରୁ ମିଳିଥିବା ସୂଚନାନୁଯାୟୀ, ଅଙ୍ଗନୱାଡି କେନ୍ଦ୍ରରେ ବିଦ୍ୟୁତ୍ ସଂଯୋଗ କରିବା ପାଇଁ ଠିକାଦାର ଚୟନ କରାଯାଇଛି। ସମ୍ପୃକ୍ତ ଠିକାଦାରଙ୍କୁ ବ୍ଲକ ପ୍ରଶାସନ ପକ୍ଷରୁ ବିଦ୍ୟୁତ୍ ସଂଯୋଗୀକରଣ ବାବଦରେ ଅର୍ଥ ପ୍ରଦାନ କରିବା ପାଇଁ ନିୟମ ରହିଛି। ଏହି ପରିପ୍ରେକ୍ଷୀରେ ସମ୍ପୃକ୍ତ ଠିକାଦାରଙ୍କ ପକ୍ଷରୁ ୪୨ ଅଙ୍ଗନୱାଡି କେନ୍ଦ୍ର ବାରଣ୍ଡାରେ ବିଦ୍ୟୁତ୍ ମିଟର ବସାଯାଇ ଖୁଣ୍ଡରୁ ତାର ସଂଯୋଗ କରାଯାଇଛି। ହେଲେ କୌଣସି କେନ୍ଦ୍ରର ଗୃହକୁ ବିଦ୍ୟୁତ୍ ସଂଯୋଗ କରାଯାଇନାହିଁ। କିନ୍ତୁ ବିଦ୍ୟୁତ୍ ମିଟରରୁ ଗୃହକୁ ସଂଯୋଗ ହେବା ପାଇଁ ବାହାରିଥିବା ତାର ବାରଣ୍ଡାରେ ଝୁଲି ରହିଛି। ଅଙ୍ଗନୱାଡି କେନ୍ଦ୍ରକୁ ଛୋଟ ଛୋଟ ପିଲା ଆସୁଥିବାବେଳେ କିପରି ଦାୟିତ୍ୱରେ ତାରକୁ ବାହାରେ ଝୁଲାଇ ଦେଇ ଚାଲିଯାଇଛ,ି ସେନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। କୌଣସି ଅଘଟଣ ଘଟିଲେ ଏଥିପାଇଁ ଦାୟୀ କିଏ ରହିବେ ବୋଲି ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି। କେବଳ ଏତିକି ନୁହେଁ କେନ୍ଦ୍ରରେ ବିଦ୍ୟୁତ ମିଟର ଲଗାଯିବା ପରେ ପ୍ରତିମାସରେ ପ୍ରତି ଅଙ୍ଗନୱାଡି ପିଛା ୭୦ରୁ ୧୦୦ଟଙ୍କା ଲେଖାଏ ବିଲ୍ ପୈଠ କରାଯାଉଛି। ଲାଗିଥିବା ବିଦୁତ୍ ପିଲାଙ୍କ ସେବାରେ ଲାଗୁ ନଥିବା ବେଳେ କ’ଣ ପାଇଁ ବିଲ୍ ପୈଠ କରାଯାଉଛି ସେନେଇ ସ୍ଥାନୀୟ ଲୋକେ ପ୍ରଶ୍ନ କରିଛନ୍ତି।
ଏ ସମ୍ପର୍କରେ ନାଉଗଁା ବିଦ୍ୟୁତ୍ ସେକ୍ସନ କନିଷ୍ଠ ଯନ୍ତ୍ରୀ ଦୀପକ ଭୂଇଁ କହିଛନ୍ତି, ଅଙ୍ଗନୱାଡି କେନ୍ଦ୍ରକୁ ବିଦ୍ୟୁତ୍ ସଂଯୋଗ କରିବା ପାଇଁ ଜୈନିକ ଠିକାଦାର ଆସି କାର୍ଯ୍ୟାଳୟରୁ ଅନୁମତି ନେଇଥିଲେ। ଏହା ସିଙ୍ଗିଲ ଫେଜ୍ ଲାଇନ ହୋଇ ଥିବାରୁ ଏହା ଉପରେ ବିଭାଗ ପକ୍ଷରୁ କ୍ଷେତ୍ର ଯାଞ୍ଚର ଆବଶ୍ୟକ ନ ଥିଲା। ଯଦି ସମ୍ପଅକ୍ତ ଠିକାଦାର ବିଦ୍ୟୁତ୍ ସଂଯୋଗ କରି ଫାଙ୍କାରେ ତାର ଝୁଲାଇ ରଖିଥିବେ କୌଣସି ଅଘଟଣ ଘଟିଲେ ସମ୍ପୃକ୍ତ ଠିକାଦାର ଦାୟୀ ରହିବେ ବୋଲି ସେ କହିଛନ୍ତି। ଏସମ୍ପର୍କରେ ସିଡିପିଓ ବାସନ୍ତୀ ମାଇନଙ୍କ ମତାମତ ନେବାପାଇଁ ଯୋଗାଯୋଗ କରାଯାଇଥିଲେ ମଧ୍ୟ ସେ ମୋବାଇଲ୍ ଫୋନ ଉଠାଇ ନ ଥିଲେ।
