ଦଶମନ୍ତପୁର, ୩୦ା୫ (ଡି.ଏନ୍.ଏ.): ଗ୍ରୀଷ୍ମପ୍ରବାହ ଯୋଗୁ ଶୁଖିଯାଉଛି କୂଅ, ନଳକୂଅ। ଟୋପାଏ ପାଣି ପାଇଁ ଗ୍ରାମବାସୀ ଡହଳବିକଳ ହେଉଛନ୍ତି। ପିଇବା ପାଣି ମୁନ୍ଦାଏ ପାଇଁ ବୁଲିବାକୁ ପଡୁଛି କେତେଆଡ଼। ଗୁହାରି କଲେ ବି କୌଣସି ଅଧିକାରୀ ଶୁଣୁନାହାନ୍ତି। ଏଭଳି ଅଭିଯୋଗ କରିଛନ୍ତି କୋରାପୁଟ ଜିଲା ଦଶମନ୍ତପୁର ବ୍ଲକ ଅଧୀନ ଗାଦିଆଗୁଡା ପଞ୍ଚାୟତ ରାଣୀଗୁଡା ଗ୍ରାମବାସୀ।
ଗାଁରେ ୩୭ ପରିବାର ଆଦିବାସୀ କନ୍ଧ ସମ୍ପ୍ରଦାୟର ଲୋକମାନେ ବସବାସ କରନ୍ତି। ସେମାନଙ୍କ ମୁଖ୍ୟ ଜୀବିକା ପୋଡୁ ଚାଷ। ବିଶେଷ କରି ପିଇବା ପାଣିର ସୁବିଧା ନ ଥିବାରୁ ଗାଁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଦୀର୍ଘବର୍ଷ ହେଲା ଗାଁରେ ଏକମାତ୍ର ନଳକୂଅ ରହିଛି। ପୁରୁଣା ହୋଇଯିବା ଯୋଗୁ ସେଥିରୁ ମଧ୍ୟ ଭଲ ପାଣି ବାହାରୁ ନାହିଁ। ଖରା ଯୋଗୁ ନଳକୂଅ ମଧ୍ୟ ଶୁଖି ଯାଉଛି। ହେଲେ ପାଣି ପାଇଁ ଗ୍ରାମବାସୀ ବାରମ୍ବାର ପ୍ରଶାସନକୁ ଦାବି କରି ଆସୁଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଶେଷରେ କୌଣସି ବିକଳ୍ପ ନ ପାଇ ଗାଁ ନିକଟରେ ଥିବା ଏକ ଚୁଆରୁ ପାଇପ୍ ଯୋଗେ ବିଲ ପାଖରେ ଥିବା କୁଣ୍ଡରେ ସଂଯୋଗ କରି ସେଥିରୁ ପାଣି ସଂଗ୍ରହ କରୁଛୁ ବୋଲି ଗାଁର କିତଲ ଜାନୀ, ସଲୋପ ଜାନୀ, ହିରମେ ଜାନୀ ପ୍ରମୁଖ କହିଛନ୍ତି। ଦୂଷିତ ପାଣି ପିଇ ଗ୍ରାମବାସୀ ବିଭିନ୍ନ ସମୟରେ ରୋଗାକ୍ରାନ୍ତ ହେଉଥିବା ଗ୍ରାମବାସୀ କ୍ଷୋଭର ସହ ପ୍ରକାଶ କରିଛନ୍ତି। ଏସମ୍ପର୍କରେ ସ୍ଥାନୀୟ ପିଇଓ ସୁଶାନ୍ତ କୁମାର ଶତପଥୀଙ୍କୁ ଯୋଗାଯୋଗ କରିବାରୁ ଉକ୍ତ ଗାଁରେ ଏକ ନୂତନ ନଳକୂଅ ଖୋଳିବା ବ୍ୟବସ୍ଥା କରିବୁ ବୋଲି କହିଛନ୍ତି।
