ମୁମ୍ବାଇ: ଖୁବଶୀଘ୍ର ବଡ ପରଦାରେ ନଜର ଆସିବେ ବଲିଉଡ କୁଇନ ପରିଣିତି ଚୋପ୍ରା ଓ ଆଗଧାଡିର ପଞ୍ଜାବୀ ଗାୟକ ହର୍ଡି ସଂଧୁ । ଏହି ଯୋଡିଙ୍କୁ ଦର୍ଶକେ ଫିଲ୍ମ ‘କୋଡ ନେମ: ତ୍ରିରଙ୍ଗାରେ ଦେଖିବାକୁ ପାଇବେ । ଆଉ ଫିଲ୍ମଟି ଆସନ୍ତା ମାସରେ ସିନେମା ହଲରେ ରିଲିଜ ହେବାକୁ ଯାଉଛି । ଟି ସିରିଜ, ରିଲାୟନ୍ସ ଏଣ୍ଟରଟେନମେଣ୍ଟ, ଫିଲ୍ମ ହ୍ୟାଙ୍ଗର ଓ ଫିଲ୍ମ ନିର୍ମାତା ରିଭୁ ଦାସଗୁପ୍ତାଙ୍କ ଏହି ଫିଲ୍ମର ରିଲିଜ ଡେଟ ଘୋଷଣା କରାଯାଇଛି । ମିଳିଥିବା ସୂଚନା ଅନୁଯାୟୀ, ଫିଲ୍ମ କୋଡ ନେମ: ତ୍ରିରଙ୍ଗା ଆସନ୍ତା ମାସ ଅର୍ଥାତ୍ ଅକ୍ଟୋବର ୧୪ରେ ରିଲିଜ ହେବ । ଫିଲ୍ମର ରିଲିଜକୁ ନେଇ ଫିଲ୍ମ ମେକର ରିଭୁ ଦାସଗୁପ୍ତା ଖୁବ ଏକ୍ସାଇଟେଡ ଅଛନ୍ତି ।
ସୂଚନାଯୋଗ୍ୟ, ଫିଲ୍ମର ରିଲିଜ ଡେଟ ଘୋଷଣା କରିବା ସମୟରେ ରିଭୁ ଦାସଗୁପ୍ତା କହିଛନ୍ତି, ମୁଁ ମୋର ଆଗାମୀ ଫିଲ୍ମର ରିଲିଜ ଡେଟ ଘୋଷଣା କରି ଖୁବ ଖୁସି ଅନୁଭବ କରୁଛି । ମୋର ଆଶା ଦର୍ଶକଙ୍କୁ ଏହି ଆକ୍ସନ ଏଣ୍ଟଟେନମେଣ୍ଟ ନିଶ୍ଚିତ ଭାବେ ପସନ୍ଦ ଆସିବ । ଦେଶ ପାଇଁ ନିଜର କର୍ତ୍ତବ୍ୟ କରୁଥିବା ଜଣେ ସେନାଙ୍କ ବଳିଦାନ ଉପରେ ଆଧାରିତ ଏହି ଫିଲ୍ମ । ଏହାଏକ ଗୁପ୍ତଚରର କାହାଣୀ । ଏହି ଫିଲ୍ମରେ ପରିଣିତି ଚୋପ୍ରା ଏକ ର ଏଜେଣ୍ଟ ଭୂମିକାରେ ନଜର ଆସିବେ ।
