ବେଙ୍ଗାଲୁରୁ,୮।୧୦: କର୍ଣ୍ଣାଟକର ରାଜଧାନୀ ବେଙ୍ଗାଲୁରୁରେ ଶନିବାର ଆଟିବେଲେରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଏଠାରେ ଥିବା ଏକ ବାଣ ଦୋକାନରେ ଅଗ୍ନିକାଣ୍ଡରେ ୧୪ଜଣଙ୍କର ମୃତ୍ୟୁ ଘଟିଛି। ମୁଖ୍ୟମନ୍ତ୍ରୀ ସିଦ୍ଧରାମାୟା ଏହି ଘଟଣାକୁ ନିନ୍ଦା କରିଛନ୍ତି। ସେ ରବିବାର ଘଟଣା ସ୍ଥଳ ପରିଦର୍ଶନ କରିଛନ୍ତି।
ସିଦ୍ଧରାମାୟା କହିଛନ୍ତି ଯେ ବେଙ୍ଗାଲୁରୁରେ ଏକ ଦୁଃଖଦ ଘଟଣା ୧୪ଜଣଙ୍କ ଜୀବନ ନେଇଛି। ତେବେ ଦୋକାନରେ ଆବଶ୍ୟକ ଲାଇସେନ୍ସ ଏବଂ ସୁରକ୍ଷା ସାବଧାନତା ଅଛି କି ନାହିଁ ତାହା ଯାଞ୍ଚ କରିବା ଆବଶ୍ୟକ।
ପୁଙ୍ଖାନୁପୁଙ୍ଖ ଅନୁସନ୍ଧାନ ପରେ ଦୋକାନ ମାଲିକଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଭବିଷ୍ୟତରେ ଏପରି ଦୁଃଖଦ ଘଟଣାକୁ ରୋକିବା ପାଇଁ ସୁରକ୍ଷା ପଦକ୍ଷେପ ଗୁଡ଼ିକର ମହତ୍ତ୍ୱ ବିଷୟରେ ଏହି ଭୟଙ୍କର ଘଟଣା ଏକ ଉଦାହରଣ ବୋଲି ସେ କହିଛନ୍ତି।
