ଦାରିଙ୍ଗବାଡି, ୬।୧ (ଅରୁଣ ସାହୁ ):ଆସନ୍ତା ଗୁରୁବାର ସଂଧ୍ୟାରେ ଦାରିଙ୍ଗବାଡି ଶୀତ ମହୋତ୍ସବର ଶୁଭାରମ୍ଭ ହେବ। ଏଥିପାଇଁ ଆଉ ୨ ଦିନ ବାକି ଥିବା ବେଳେ ଏବେଠାରୁ ଦାରିଙ୍ଗବାଡି ଚଳଚଞ୍ଚଳ ହୋଇପଡିଛ। ଏହି ମହୋତ୍ସବରେ ଦୈନିକ ହଜାର ହଜାର ସଂଖ୍ୟାରେ ଦର୍ଶକ, ପର୍ଯ୍ୟଟକଙ୍କ ଭିଡ଼ ଜମିବାକୁ ରହିଥିବାରୁ ପ୍ରଶାସନ ପକ୍ଷରୁ ପରିବେଶକୁ ଅଧିକା ଗୁରୁତ୍ୱ ଦିଆଯାଇଛି କୌଣସି ସ୍ଥାନରେ ଅଇଁଠା ଖଲିପତ୍ର ସମେତ ପ୍ଲାଷ୍ଟିକ, ଖାଲି ବୋତଲ ଆଦିକୁ ପଡ଼ିବାକୁ ଦିଆଯିବ ନାହିଁ। ଏଥି ପାଇଁ ବିଡ଼ିଓ ତଥା ମହୋତ୍ସବ କମିଟିର ସମ୍ପାଦକ ପ୍ରୀତିରଞ୍ଜନ ରଥ ସଫେଇ କାର୍ଯ୍ୟକ୍ରମକୁ ଗୁରୁତ୍ୱ ଦେଇ ସମସ୍ତଙ୍କୁ ଏଥିରେ ଯୋଗ ଦେବାକୁ କହିଥିଲେ। ଏହି ସଫେଇ ଅଭିଯାନ ମଙ୍ଗଳବାର ଭୋର ସାଢେ ୬ ରୁ ଆରମ୍ଭ କରାଯାଇଛି। ବିଡ଼ିଓ ରଥ ଏବଂ ତହସିଲଦାର ଧୀରଜ ପାତ୍ର, ବ୍ଲକ ଅଧ୍ୟକ୍ଷ ସୁଶାନ୍ତ କୁମାର ପ୍ରଧାନ,ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ ବିଶ୍ୱଜିତ ଜାଲି, ନିଜେ ହାତରେ ଝାଡୁ, ଝୁଡି ଧରି ଏହି ସଫେଇ କାର୍ଯ୍ୟ କରିଥିଲେ। ଦାରିଙ୍ଗବାଡିର ବ୍ଲକ କାର୍ଯ୍ୟାଳୟ ରୋଡ଼ ସମେତ ଚାରିଛକ, ତିନିଛକ, ବଜାର, ମହୋତ୍ସବ ପଡ଼ିଆ ଆଦି ସଫେଇ ଚାଲିଛି ବିଡ଼ିଓ ରଥଙ୍କ ଡାକରାରେ ସମସ୍ତ ଅଧିକାରୀଙ୍କ ସମେତ ସରକାରୀ ଓ ବେସରକାରୀ ସଂସ୍ଥା, ହୋଟେଲ ସଙ୍ଘ, ବଣିକ ସଙ୍ଘ, ମହିଳା ସ୍ବୟଂ ସହାୟକ ଗୋଷ୍ଠୀ, ଅନ୍ତରଙ୍ଗ ଯୁବ ମହାସଂଘ, ଜାଗୃତି କର୍ମକର୍ତ୍ତା, ବିଭିନ୍ନ ରାଜନୈତିକ ଦଳର କର୍ମକର୍ତ୍ତା, ଅଞ୍ଚଳବାସୀ ସମସ୍ତେ ଏହି ସଫେଇରେ ସାମିଲ ହୋଇଥିଲେ ଏଥିଲାଗି ଶୀତ ମହୋତ୍ସବର ଲୋଗୋ ଥାଇ ଧଳା ରଙ୍ଗର ଟି ସାର୍ଟ ପରିଧାନ କରି ଏହି ସଫେଇ କରିଥିଲେ। ଲୋକଙ୍କୁ ଅଳିଆ ଆବର୍ଜନା ଏଣେତେଣେ ନପକାଇ ଗୋଟିଏ ସ୍ଥାନରେ ରଖିବାକୁ ପରାମର୍ଶ ଦିଆଯିବା ସହ ପରିବେଶକୁ ସ୍ବଚ୍ଛା ରଖିବାକୁ ପରାମର୍ଶ ଦିଆଯାଇଛି ବୋଲି ବିଡ଼ିଓ ରଥ କହିଛନ୍ତି।
Dharitri – The Largest & Most Trusted Odia Daily
