ଛତିଆ,୧୬ା୪(ଡି.ଏନ.ଏ.): ଯାଜପୁର ଜିଲା ବଡ଼ଚଣା ବ୍ଲକ ଅଧୀନ କାଇମାଟିଆ ଏବଂ ଅଭୟପୁର ଗ୍ରାମ ମଧ୍ୟରେ କାଜୁ ମଞ୍ଜି ତୋଳିବାକୁ ନେଇ ଗୋଷ୍ଠୀ ସଂଘର୍ଷ ଘଟିଛି। ଏଥିରେ ଉଭୟ ପକ୍ଷରୁ ୬ ଜଣ ଆହତ ହୋଇଛନ୍ତି। ଏନେଇ ଗ୍ରାମରେ ଚାପା ଉତ୍ତେଜନା ଲାଗି ରହିଥିବାରୁ ପୋଲିସ ଫୋର୍ସ ମୁତୟନ କରାଯାଇଛି।
ସୂଚନା ମୁତାବକ, ୨୦୦୨ରେ ଓଡ଼ିଶା କାଜୁ ଉନ୍ନୟନ ନିଗମ ପକ୍ଷରୁ ଅଭୟପୁର ରାଜସ୍ବ ମୌଜାରେ ୭୦ ଏକର ଜାଗାରେ କାଜୁ ଚାରା ରୋପଣ କରାଯାଇଥିଲା। ଏହି କାଜୁ ବଗିଚାର ନାମ କାଇମାଟିଆ କାଜୁ ଉଦ୍ୟାନ ରଖାଯାଇଥିଲା। ଉକ୍ତ କାଜୁ ବଗିଚାକୁ ଉଭୟ ଗ୍ରାମ ନିଜର ବୋଲି ଦାବି କରିଆସୁଥିଲେ। ଦୀର୍ଘଦିନ ହେବ କାଜୁ ତୋଳାକୁ ନେଇ ଦୁଇ ଗ୍ରାମ ମଧ୍ୟରେ ଛକା ପଞ୍ଝା ଲାଗି ରହୁଥିଲା। ରବିବାର ମଧ୍ୟାହ୍ନରେ ଅଭୟପୁର ଗ୍ରାମର ଲୋକେ ଆସି କାଜୁ ତୋଳୁଥିବା ସମୟରେ କାଇମାଟିଆ ଗ୍ରାମବାସୀ ବିରୋଧ କରିଥିଲେ। ଏହାକୁ ନେଇ ଉଭୟ ଗ୍ରାମବାସୀଙ୍କ ମଧ୍ୟରେ ମାର୍ପିଟ ହୋଇଥିଲା। ଖବର ପାଇ ବୈରୀ ଥାନା ଅଧିକାରୀ ପ୍ରଦୀପ୍ତ କୁମାର କାନୁନଗୋ, ଏସ୍ଆଇ ସୁବ୍ରତ ସାହୁ, ଏଏସ୍ଆଇ ସଂଗ୍ରାମ କେଶରୀ ରାଉତ, ଏଏସ୍ଆଇ ଅକ୍ଷୟ ବେହେରାଙ୍କ ନେତୃତ୍ତ୍ୱରେ ପୋଲିସ ଫୋର୍ସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା। ହେଲେ ଥାନାରେ କୌଣସି ଅଭିଯୋଗ ହୋଇ ନ ଥିବା ଜଣାପଡିଛି।
