ନୂଆଦିଲ୍ଲୀ,୧୭ ।୯: ଭାରତ-ଚାଇନା ସୀମା ବିବାଦ ବେଳକୁ ବେଳ ନୂଆ ରୂପ ନେଉଥିବା ବେଳେ ଚାଇନା ପ୍ରତି ମୁହୂର୍ତ୍ତରେ କିଛି ନା କିଛି ଚାଲ ଚଲାଉଥିବା ଦେଖାଯାଇଛି । ଏବେ ଚାଇନା ଏଲ୍ଏସିର ଫିଙ୍ଗର-୪ ଅଞ୍ଚଳରେ ଲାଉଡ ସ୍ପିକର ଜରିଆରେ ପଞ୍ଜାବି ଗୀତ ବଜାଉଥିବା ସୂଚନା ମିଳିଛି । କୁହାଯାଉଛି ଏହା ମାଧ୍ୟମରେ ସେ ଭାରତୀୟ ସେନା ଉପରେ ଚାପ ପକାଇବାକୁ ଚେଷ୍ଟା କରୁଛି । ନ୍ୟୁଜ ଏଜେନ୍ସି ଏଏନ୍ଆଇର ସୂଚନା ଅନୁଯାୟୀ, ଚାଇନା ଯେଉଁ ସ୍ଥାନରେ ଲାଉଡ ସ୍ପିକର ଜରିଆରେ ଗୀତ ବଜାଉଛି ତାହା ୨୪ ଘଣ୍ଟିଆ ଭାରତୀୟ ସେନା ନଜରରେ ରହିଛି । ତେଣୁ କୁହାଯାଉଛି କି ଭାରତୀୟ ସେନାଙ୍କୁ ବିଚଳିତ କରିବାକୁ ଚାଇନାର ଏହା ଏକ ନୂଆ ଯୋଜନା । ଭାରତୀୟ ସେନାରେ ଶିଖ ସାମିଲ ଥିବାରୁ ଚାଇନା ଏମାନଙ୍କ ମନରେ ମାନସିକ ଚାପ ସୃଷ୍ଟି କରିବାକୁ ଏଭଳି ଗୀତ ବଜାଉଛି । ସୂଚନାଯୋଗ୍ୟ, ଫିଙ୍ଗର-୪ ଏମିତି ଏକ ଅଞ୍ଚଳ ଯେଉଁଠାରେ ଭାରତ-ଚାଇନା ସୀମା ବିବାଦ ଘନେଇଛି । ସେପ୍ଟେମ୍ବର ୮ରେ ଏହିଠାରେ ହିଁ ୨ଦେଶର ସେନାଙ୍କ ମଧ୍ୟରେ ଖୁବ୍ ଗୁଳି ବିନିମୟ ହୋଇଥିଲା । ଉଭୟ ପକ୍ଷରୁ ୧୦୦ରୁ ଅଧିକ ରାଉଣ୍ଡ ଗୁଳି ଚାଳନା ହୋଇଥିଲା । ଗତ ୨୦ ଦିନ ମଧ୍ୟରେ ଭାରତ ଓ ଚାଇନା ସେନା ମଧ୍ୟରେ ପୂର୍ବ ଲଦ୍ଦାଖରେ ଅତିକମରେ ୩ଥର ଗୁଳି ବିନିମୟ ହୋଇ ସାରିଲାଣି ।
