ରାୟଗଡ଼ା ଅଫିସ,୨୮।୧: ରାୟଗଡ଼ା ଜିଲା ବିଷମକଟକରେ ପିଲାଚୋର ସନ୍ଦେହରେ ଜଣେ ଯୁବକଙ୍କୁ ନିସ୍ତୁକ ମାଡ଼ ମାରି ଅଟକ ରଖିଥିଲେ ଗ୍ରାମବାସୀ। ତେବେ ଅଟକ ଥିବା ଯୁବକଙ୍କୁ ବିଷମକଟକ ପୋଲିସ ଉଦ୍ଧାର କରିଛି।
ବିଷମକଟକ ଥାନା ଅନ୍ତର୍ଗତ ମିନାହଲାରେ ଏହି ଘଟଣା ଘଟିଛି। ବୁଧବାର ସନ୍ଧ୍ୟାରେ ଗ୍ରାମରେ ପର୍ବ ପାଳନ ଚାଲିଥିବା ବେଳେ ୩ ଜଣ ଯୁବକ ଏକ ପଲସର୍ରେ ଆସି ବୁଲାବୁଲି କରୁଥିଲେ। ଗ୍ରାମବାସୀ ଜଣେ ଯୁବକଙ୍କୁ ଏନେଇ ପଚରାଉଚରା କରିବାରୁ ଅନ୍ୟ ୨ ଜଣ ଯୁବକ ସେଠାରୁ ଚମ୍ପଟ ମାରିଥିଲେ। ଅଟକ ରଖିଥିବା ଯୁବକ ଜଣଙ୍କୁ ଗ୍ରାମବାସୀ ପଚାରିବାରୁ ସେ ସନ୍ତୋଷଜନକ ଉତ୍ତର ଦେଇପାରି ନ ଥିଲେ। ଫଳରେ ନିସ୍ତୁକ ପିଟିଥିଲେ ଗ୍ରାମବାସୀ। ଏହା ପରେ ପ୍ରାଣ ବିକଳରେ ଯୁବକ ଜଣକ ଏକ ଡ୍ରେନ୍ ଭିତରେ ପଶି ଯାଇଥିଲେ। ଏନେଇ ଗ୍ରାମବାସୀ ଖବର ଦେବାରୁ ପୋଲିସ ଆସି ଯୁବକଙ୍କୁ ଉଦ୍ଧାର କରି ପ୍ରାଥମିକ ଚିକିତ୍ସା ପାଇଁ ଡାକ୍ତରଖାନା ପଠାଇ ତଦନ୍ତ କରୁଛି। ଯୁବକ ଜଣକ ବିହାରର ବୋଲି ଜଣାପଡ଼ିଛି। ତାଙ୍କ ଠାରୁ ଏକ ମୋବାଇଲ ଜବତ କରାଯାଇଛି।
