ନୂଆଦିଲ୍ଲୀ, ୯ା୫(ଆଇଏଏନ୍ଏସ୍) : କରୋନାର ଘାତକ ଦ୍ୱିତୀୟ ଲହର ଆଗକୁ ଭାରତ ପାଇଁ ଆହୁରି ମାରାତ୍ମକ ସ୍ଥିତି ସୃଷ୍ଟି କରିବ। ବିଶେଷକରି ୫ ବର୍ଷରୁ କମ୍ ବୟସର ଶିଶୁଙ୍କ ପାଇଁ ଗମ୍ଭୀର ସ୍ବାସ୍ଥ୍ୟ ସଙ୍କଟ ଦେଖାଦେବ। ସମ୍ପ୍ରତି ଭାରତରେ ଉକ୍ତ ବୟସ ବର୍ଗର ଶିଶୁଙ୍କ ମଧ୍ୟରୁ ଅର୍ଦ୍ଧାଧିକ ଅପପୁଷ୍ଟିର ଶିକାର ହେଉଥିବାବେଳେ କରୋନା ଯୋଗୁ ପୋଷଣ ସମସ୍ୟା ଜଟିଳ ହେବ ବୋଲି ୟୁନାଇଟେଡ୍ ନେସନ୍ସ ଚିଲ୍ଡ୍ରେନ୍ ଫଣ୍ଡ୍ (ୟୁନିସେଫ୍) କହିଛି। କରୋନା କାଳରେ ଭୀଷଣ ସ୍ବାସ୍ଥ୍ୟ ସଙ୍କଟ ଦେଇ ଗତି କରୁଥିବା ଭାରତ ଆଗାମୀ ଦିନରେ ବଡ଼ ଆହ୍ବାନର ସମ୍ମୁଖୀନ ହେବ। କରୋନାର ତୃତୀୟ ଲହର ଶିଶୁଙ୍କ ପାଇଁ ବିପଦ ଆଣିପାରେ ବୋଲି ସ୍ବାସ୍ଥ୍ୟ ବିଶେଷଜ୍ଞ ସତର୍କ କରାଇସାରିଥିବାବେଳେ ଏବେ ଘାତକ ସାଜିଥିବା ଦ୍ୱିତୀୟ ଲହର ଶିଶୁଙ୍କ ପୋଷଣଜନିତ ସଙ୍କଟକୁ ଡାକି ଆଣିବ। ବିଶେଷକରି ୫ ବର୍ଷରୁ କମ୍ ବୟସର ଶିଶୁ ଘୋର ଅପପୁଷ୍ଟିର ଶିକାର ହେବେ ବୋଲି ୟୁନିସେଫ୍ ଚିନ୍ତା ବ୍ୟକ୍ତ କରିଛି।
ପ୍ରତିବର୍ଷ ଭାରତରେ ପ୍ରାୟ ୩ କୋଟି ମହିଳା ଗର୍ଭବତୀ ହେବା ସହ ୨ କୋଟି ୭୦ ଲକ୍ଷ ଶିଶୁ ଭୂମିଷ୍ଠ ହୋଇଥାନ୍ତି। ପ୍ରସବ ସମୟରେ ଗର୍ଭବତୀମାନଙ୍କୁ ଜୀବନ ରକ୍ଷାକାରୀ ସେବା ଯୋଗାଣ ବ୍ୟବସ୍ଥାର ସୁବିଧା ଦେବା କଷ୍ଟକର ହୋଇପଡ଼ିବ ବୋଲି ଭାରତରେ ୟୁନିସେଫ୍ ପ୍ରତିନିଧି ୟଶମିନ୍ ଅଲ୍ଲୀ ହକ୍ ଶୁକ୍ରବାର କହିଛନ୍ତି। ହସ୍ପିଟାଲରେ ବିପୁଳ ସଂଖ୍ୟାରେ କୋଭିଡ୍ ରୋଗୀ ଭର୍ତ୍ତି ହୋଇଥିବାବେଳେ ଗର୍ଭବତୀ ମହିଳାମାନେ ଠିକ୍ ସମୟରେ ଜରୁରୀ ଡାକ୍ତରୀ ପରାମର୍ଶ ପାଇବାରୁ ବଞ୍ଚିତ ହେଉଛନ୍ତି। ଏହା ସିଧାସଳଖ ମା’ ଓ ଶିଶୁର ସ୍ବାସ୍ଥ୍ୟକୁ ପ୍ରଭାବିତ କରିବ। ଦେଶରେ ରେକର୍ଡ ଭାଙ୍ଗିଚାଲିଥିବା କରୋନା ସଂକ୍ରମଣ ଓ ଏଥିଜନିତ ମୃତ୍ୟୁରେ ମଧ୍ୟ ଶିଶୁ ପ୍ରଭାବିତ। ଛୋଟବେଳୁ ମା’ବାପାଙ୍କୁ ହରାଉଥିବା ଶିଶୁମାନେ ଉପଯୁକ୍ତ ଯତ୍ନ ଅଭାବରୁ ମଧ୍ୟ ସ୍ବାସ୍ଥ୍ୟ ସଙ୍କଟର ସମ୍ମୁଖୀନ ହେବେ। ମାତାପିତା ନ ଥିବା ଶିଶୁଙ୍କୁ ବେଆଇନ ଭାବେ ପୋଷ୍ୟ ରୂପେ ଗ୍ରହଣ କରି ଅନେକେ ସେମାନଙ୍କୁ ଚାଲାଣ କରିବା ତଥା ଆପରାଧିକ କାର୍ଯ୍ୟକଳାପରେ ଲଗାଉଥିବା ଖବର ମଧ୍ୟ ନଜରକୁ ଆସୁଛି। ଏହା ବେଶ୍ ଚିନ୍ତାଜନକ ବୋଲି ୟଶମିନ୍ ଅଲ୍ଲୀ କହିଛନ୍ତି। ଅନ୍ୟପକ୍ଷରେ ପ୍ରାଥମିକ ଏବଂ ମାଧ୍ୟମିକ ଶିକ୍ଷାଠାରୁ ପ୍ରାୟ ୨୪ କୋଟି ୭ ଲକ୍ଷ ପିଲା ଏବେ ଦୂରେଇ ରହିଛନ୍ତି। ଅନ୍ଲାଇନ ଯୋଗେ ଶିକ୍ଷାଦାନ ହେଉଥିଲେ ହେଁ ଅନେକେ ଏହି ଡିଜିଟାଲ ଶିକ୍ଷା ପାଇପାରୁନାହାନ୍ତି। ଏଥିଯୋଗୁ ଭାରତରେ କୋଟି କୋଟି ଶିଶୁ ପାଠପଢ଼ାରୁ ବଞ୍ଚିତ ହେବେ ବୋଲି ୟୁନିସେଫ୍ କହିଛି। ଲକ୍ଡାଉନ୍ ଭଳି କଟକଣା ଯୋଗୁ ଘରେ ଆବଦ୍ଧ ରହୁଥିବା ଶିଶୁଙ୍କ ମାନସିକ ସ୍ବାସ୍ଥ୍ୟ ପ୍ରଭାବିତ ହେବା ସହ ଅନେକେ ଘରୋଇ ହିଂସାର ଶିକାର ହେଉଛନ୍ତି। ଭାରତରେ ଯାହା ଘଟୁଛି ତାହା ସମସ୍ତଙ୍କ ପାଇଁ ସତର୍କଘଣ୍ଟି ବଜାଇଛି। ମହାମାରୀ
ଏତେ ଶୀଘ୍ର ଶେଷ ହେବା ଭଳି ଲାଗୁନି। ଏଭଳି ବିପଦ ସମୟରେ ସବୁ ଦେଶ ଏକାଠି ହୋଇ ପରସ୍ପରକୁ ସହଯୋଗର ହାତ ବଢ଼ାଇବା ଉଚିତ ବୋଲି ବିଶ୍ୱବ୍ୟାପୀ ଶିଶୁମାନଙ୍କୁ ମାନବିକ ସହାୟତା ପ୍ରଦାନକାରୀ ଜାତିସଂଘର ଏହି ସଂସ୍ଥା ଆହ୍ବାନ ଦେଇଛି।
