ଟିକିରି,୪ା୧୦(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ବ୍ଲକର ଅନେକ ଗାଁକୁ ଏ ପର୍ଯ୍ୟନ୍ତ ମୌଳିକ ସୁବିଧା ପହଞ୍ଚି ପାରିନି। ଅଡାଜୋର ପଞ୍ଚାୟତ ଅନ୍ତର୍ଗତ ଛଟିଗୁଡ଼ା ଗ୍ରାମ ଏହାର ଏକ ଉଦାହରଣ। କାଶୀପୁର ବ୍ଲକ ଠାରୁ ପ୍ରାୟ ୩୦ କିଲୋମିଟର ଦୂର କଳାହାଣ୍ଡି ଜିଲା ସିମାନ୍ତ ଅଞ୍ଚଳରେ ଏହି ଗାଁ ରହିଛି। ପାହାଡ଼ ଏବଂ ଜଙ୍ଗଲ ଘେରା ଗ୍ରାମରେ ପ୍ରାୟ ୩୫ ଆଦିବାସୀ ପରିବାର ବସବାସ କରୁଛନ୍ତି। ବିଜୁଳି ବ୍ୟତୀତ ଅନ୍ୟ କୌଣସି ସୁବିଧା ଏମାନଙ୍କ ନିକଟରେ ପହଞ୍ଚି ନ ଥିବା ଗ୍ରାମବାସୀ ପ୍ରକାଶ କରିଛନ୍ତି।
ଗାଁକୁ ଯାତାୟାତ ନିମନ୍ତେ ରାସ୍ତା, ରହିବା ପାଇଁ ଆବାସ, ସ୍ବାସ୍ଥ୍ୟସେବା, ଶିକ୍ଷାରୁ ଗ୍ରାମବାସୀ ବଞ୍ଚିତ ଅଛନ୍ତି। ଛଟିଗୁଡ଼ା ଗ୍ରାମକୁ ଭଲ ରାସ୍ତା ନ ଥିବାରୁ ମାଟିରାସ୍ତା ସହ ଏକ ଛୋଟ ନଦୀ ଡେଇଁ ଆସିବାକୁ ହୁଏ। ଖରାଦିନେ ବହୁକଷ୍ଟରେ ପାଦଚଲା ରାସ୍ତାଦେଇ ଏମାନେ ଯାତାୟାତ କରିଥାନ୍ତି। ପୋଲ ନ ଥିବାରୁ ବର୍ଷା ଦିନେ ଗାଁକୁ ଯିବା ଏବଂ ଆସିବା କଷ୍ଟକର ହେଉଥିବା ଗ୍ରାମବାସୀ ପ୍ରକାଶ କରିଛନ୍ତି। ଏମିତିକି ଗ୍ରାମର ଅନେକ ଯୋଗ୍ୟ ହିତାଧିକାରୀଙ୍କୁ ଆବାସ ଯୋଜନାରେ ଘର ମିଳି ନ ଥିବା ଅଭିଯୋଗ ହୋଇଛି। ଭଙ୍ଗା ଘରେ ଗ୍ରାମବାସୀ ଦୁର୍ବିସହ ଜୀବନ ବିତାଉଥିବା କହିଛନ୍ତି। ଗାଁ ଲୋକେ ଅନେକ ଥର ସମସ୍ୟା ନେଇ ନେତା ଓ ପ୍ରଶାସନିକ ଅଧିକାରୀଙ୍କ ନିକଟକୁ ଯାଇଥିଲେ ମଧ୍ୟ ସୁଫଳ ପାଇ ନ ଥିବା ପ୍ରକାଶ କରିଛନ୍ତି। ରସ୍ତା କିମ୍ବା ପୋଲ ନ ଥିବାରୁ ବର୍ଷାଦିନେ ଅନେକ ସମୟରେ ରୋଗୀ ଏବଂ ଗର୍ଭବତୀଙ୍କୁ ଡାକ୍ତରଖାନା ନେବା କଷ୍ଟକର ହେଉଛି। ବର୍ଷାରେ ନଦୀ ଫୁଲି ଯାଉଥିବାରୁ ନଦୀପାର ହେବା ସମ୍ଭବ ହେଉନାହିଁ। ସେହିଭଳି ବିଶୁଦ୍ଧ ପାନୀୟଜଳ ମଧ୍ୟ ଗ୍ରାମବାସୀଙ୍କ ପାଇଁ ସ୍ବପ୍ନ ପାଲଟିଛି। ଗାଁରେ ଥିବା ନଳକୂପରୁ ଗୋଳିଆ ପାଣି ବାହାରୁଛି। ଫଳରେ ଲୋକେ ଝରଣା ପାଣି ବ୍ୟବହାର କରୁଥିବା କହିଛନ୍ତି। ଏହି ଗ୍ରାମରେ ଝାଡ଼ାବାନ୍ତିରେ ୩ ଜଣଙ୍କ ମୃତ୍ୟୁ ଘଟିଥିବା ଅଭିଯୋଗ ହେବାପରେ ସରକାରୀ ଅଧିକାରୀ ଏବଂ ନେତା ପହଞ୍ଚିଥିଲେ। ହେଲେ ବିଶୁଦ୍ଧ ପାନୀୟ ଜଳ କିମ୍ବା ପକ୍କାରାସ୍ତାର ସୁବିଧା ଏ ପର୍ଯ୍ୟନ୍ତ ହୋଇପାରିନାହିଁ। ଶୀଘ୍ର ଗାଁକୁ ରାସ୍ତା, ପାନୀୟ ଜଳର ସୁବିଧା କରିବାକୁ ଗ୍ରାମବାସୀ ଦାବି କରିଛନ୍ତି।
