ଚେନ୍ନାଇ,୫।୭: କରୋନା ଭାଇରସ୍ର ଦ୍ୱିତୀୟ ଲହର ସାରା ଦେଶରେ ଆତଙ୍କ ଖେଳାଇଥିବା ବେଳେ ବର୍ତ୍ତମାନ ସ୍ଥିତି ନିୟନ୍ତ୍ରଣକୁ ଆସିଛି। ଦୈନିକ ସଂକ୍ରମଣ ହାର ହ୍ରାସ ପାଇଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ କମିବାରେ ଲାଗିଛି। କରୋନା ଲଢ଼େଇରେ ଡାକ୍ତରମାନେ ଭଗବାନ ସାଜି ଅହରୋହ ରୋଗୀଙ୍କ ସେବା କରୁଛନ୍ତି। ସେହିପରି ଏହି ସ୍ଥିତିରେ ଲୋକଙ୍କ ସହାୟତା ପାଇଁ ଅନେକ ସେଲିବ୍ରିଟି ଓ ସ୍ବେଚ୍ଛାସେବୀ ସଂଗଠନ ମଧ୍ୟ କରୋନା ଯୋଦ୍ଧା ଭାବେ ଆଗକୁ ଆସିଛନ୍ତି। ବର୍ତ୍ତମାନ ଦେଶରେ କରୋନାକୁ ହରାଇବା ପାଇଁ ସରକାର ଟିକାକରଣ ଅଭିଯାନ ଚଳାଇଛନ୍ତି। ଇତିମଧ୍ୟରେ ଚେନ୍ନାଇର ଜଣେ କଳାକାର ଲୋକଙ୍କୁ ଟିକାକରଣ ପ୍ରତି ସଚେତନ ଓ ଏହାର ସକରାତ୍ମକ ପ୍ରଭାବ ବିଷୟରେ ଜଣାଇବା ପାଇଁ ନିୟାରା ପ୍ରୟାସ ଆପଣାଇଛନ୍ତି। ଲୋକଙ୍କୁ ଟିକାକରଣ କରାଇବାକୁ ପ୍ରୋତ୍ସାହିତ କରିବା ଓ ଏହାର ମହତ୍ୱ ବିଷୟରେ ଜଣାଇବା ପାଇଁ ଏକ ଅଟୋରେ କୋଭିଡ-୧୯ର ଟିକାର ଡିଜାଇନ କରିଛନ୍ତି। ଆଉ ଏହି ଅଟୋର ନାଁ ରଖାଯାଇଛି ‘ଭାକ୍ସିନ ଅଟୋ’।
ଏହି ଅଟୋକୁ ବ୍ଲୁ ରଙ୍ଗରେ ରଙ୍ଗାଯାଇଥିବା ବେଳେ ଏଥିରେ ଭିନ୍ନ ପ୍ରକାରର ସିରିଞ୍ଜ୍ ଓ ଭାକ୍ସିନ ବୋତଲ ନିର୍ମାଣ କରାଯାଇଥିବା ଦେଖିବାକୁ ମିଳିଛି। ଏହି ଆର୍ଟ ମଡେଲକୁ ଅନାବଶ୍ୟକ ପାଇପ୍, ପୁରୁଣା ପ୍ଲାଷ୍ଟିକ୍ ବୋତଲ ଓ ଅନାବଶ୍ୟକ ପ୍ଲାଏଉଡ୍ରେ ନିର୍ମାଣ କରାଯାଇଛି। ଏହି ଅଟୋକୁ ମଡେଲ ଆର୍ଟ ଫର୍ମ ଓ ଆର୍ଟ କିଙ୍ଗଡମ୍ର ପରିଚାଳକ ବି. ଗୌତମ ଡିଜାଇନ୍ କରିଥିବା ଜଣାପଡ଼ିଛି। ଦୁଇ ମାସ ପୂର୍ବରୁ ପ୍ରଥମ ଥର ଚେନ୍ନାଇର ନଗର ନିଗମଙ୍କ ସମ୍ମୁଖରେ ଗୌତମ ଏହି ଅଟୋର ଡିଜାଇନ୍କୁ ଉପସ୍ଥାପନ କରିଥିଲେ। ଏହାପରେ ଏହି ଅଟୋକୁ ତିଆରି କରିବା ପାଇଁ ତାଙ୍କୁ ପ୍ରାୟ ୧୦ଦିନର ସମୟ ଲାଗିଥିଲା। ଟିକାକରଣ ପାଇଁ ଲୋକଙ୍କୁ ପ୍ରୋତ୍ସାହିତ କରିବା ଲାଗି ଏହି ଅଟୋକୁ ୧୫ଟି ଜୋନ୍ରେ ବ୍ୟବହାର କରାଯିବ। ବର୍ତ୍ତମାନ ପର୍ଯ୍ୟନ୍ତ ଏହି ଅଟୋକୁ ସକରାତ୍ମକ ପ୍ରତିକ୍ରିୟା ମିଳିଛି ବୋଲି ଗୌତମ କହିଛନ୍ତି।
