ଲଡର୍ସ, ୧୬।୮: ଲଡର୍ସ କ୍ରିକେଟ ଗ୍ରାଉଣ୍ଡରେ ଅନୁଷ୍ଠିତ ଦ୍ୱିତୀୟ କ୍ରିକେଟ ଟେଷ୍ଟରେ ଉଭୟ ବୋଲିଂ ବ୍ୟାଟିଂରେ କରିସ୍ମା ଦେଖାଉଛନ୍ତି ଭାରତର ଦୁଇ ଦ୍ରୁତ ବୋଲର ମହମ୍ମଦ ସାମି ଓ ଯଶପ୍ରୀତ୍ ବୁମ୍ରା। ଦ୍ୱିତୀୟ ଇନିଂସରେ ଭାରତ ୨୦୯ ରନ୍ ମଧ୍ୟରେ ୮ ଉଇକେଟ ହରାଇ ବିପଦରେ ପଡ଼ିଥିଲା। ମାତ୍ର ସାମି ଓ ବୁମ୍ରା ଅସମାପ୍ତ ୯ମ ଉଇକେଟରେ ୧୨୦ ବଲ୍ରୁ ୮୯ ରନ୍ ଯୋଗ କରି ଦଳକୁ ଦୃଢ଼ ସ୍ଥିତିରେ ପହଞ୍ଚାଇ ଦେଇଥିଲେ। ପରେ ଅଧିନାୟକ ବିରାଟ କୋହଲି ଦ୍ୱିତୀୟ ଇନିଂସକୁ ୨୯୮/୮ରେ ଘୋଷଣା କରିଥିଲେ।
ଇଂଲଣ୍ଡ ସମ୍ମୁଖରେ ୬୦ ଓଭରରେ ୨୭୨ ରନ୍ର ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଇଂଲଣ୍ଡ ଦ୍ୱିତୀୟ ଇନିଂସର ପାଲି ଆରମ୍ଭ କରି ପ୍ରଥମରୁ ଫେଲ୍ ମାରିଥିଲେ। ଓପନିଂ ଜୋଡି ବନର୍ସ- ଡୋମିନିକ୍ ଖାତା ଖୋଲି ନ ପାରି ଆଉଟ ହୋଇଯାଇଥିଲେ। ସେହିପରି ହସିବ ହମିଦ ୯ ରନ୍ କରିଥିବା ବେଳେ ଅଧିନାୟକ ଜୋ ରୁଟ ୩୩ ରନ୍ କରି ବୁମ୍ରାଙ୍କ ବଲ୍ରେ ଆଉଟ ହୋଇଥିଲେ। ସେହିପରି ଜନି ବେୟାରଷ୍ଟୋ ୨ରନ୍ କରି ଇଶାନ୍ତ ଶର୍ମାଙ୍କ ବଲ୍ରେ ଆଉଟ ହୋଇଯାଇଥିଲେ। ଏଭଳି ସ୍ଥିତିରେ ଜୋସ୍ ବଟଲର ଏବଂ ମୋଇନ ଅଲି ବର୍ତ୍ତମାନ ଦଳ ପାଇଁ ସାହସର ସହ ଖେଳୁଛନ୍ତି। ବଟଲର ୮ ରନ୍ କରିଥିବା ବେଳେ ମୋଇନ ୧୨ ରନ୍ କରି ପଡ଼ିଆରେ ରହିଛନ୍ତି। ଭାରତର ବୁମ୍ରା ୨ ଉଇକେଟ ଅକ୍ତିଆର କରିଥିବା ବେଳେ ସାମି ଗୋଟିଏ ଏବଂ ଇଶାନ୍ତ ୨ଟି ଉଇକେଟ ନେବାରେ ସକ୍ଷମ ହୋଇଛନ୍ତି।
